រាជធានីភ្នំពេញ ៖ ការប្រកួតប្រដាល់ក្បាច់ខ្មែរបុរាណដណ្តើមជើងឯកខ្សែក្រវាត់ K-cement ប្រភេទទម្ងន់៦៥គីឡូក្រាមនៅលើសង្វៀនស្ថានីយទូរទស្សន៍ប៉ុស្តិ៍លេខ៥ នាថ្ងៃអាទិត្យទី២ កញ្ញា នេះ ឈានចូលដល់វគ្គផ្តាច់ព្រ័ត្រហើយ ។ កីឡាករផល សុផាត មកពីក្លិបកងរាជអាវុធហត្ថរាជធានីភ្នំពេញ ត្រូវជួបប្រកួតជាមួយកីឡាករសៅ ប៊ុននឿន មកពីសមាគមកីឡាប្រដាល់ក្រសួងមហាផ្ទៃ ដើម្បីដណ្តើមតំណែងជាម្ចាស់ខ្សែក្រវាត់ រីឯឡុង សុវណ្ណពៅ មកពីក្លិបសាលវ័ន្តកីឡា ជួបជាមួយយឹម ឌៀប មកពីសមាគមកីឡាប្រដាល់ក្រសួងការពារជាតិ យកតំណែងលេខ៣ ។
ផល សុផាត និងសៅ ប៊ុននឿន សុទ្ធតែជាកំពូលអ្នកប្រដាល់ដែលមានល្បិចប្រយុទ្ធនៅលើសង្វៀនល្អដូចគ្នា ។ ផល សុផាត ល្អទាំងស្នៀតកែង និងជង្គង់ ហើយរាល់ការវាយចេញ គឺចំទិសដៅល្អខ្លាំងណាស់ និងមានកម្លាំងខ្លាំងទៀតផង ។ រីឯប៊ុននឿន មានស្នៀតកណ្តាប់ដៃល្អ អាចវាយចេញបានរហ័ស ហើយមានទម្ងន់ធ្ងន់ទៀតផង។ ចរិតរបស់ប៊ុននឿនឆាប់ច្រឡោតមិនសូវចេះសំចៃកម្លាំងប៉ុន្មានឡើយ ហើយបើដឹងថាចាញ់ដៃគូប្រកួត គេនឹងវាយសម្រុកមិនដកថយឡើយ ។ ទោះបីជាយ៉ាងណា រវាងគូនេះគេមិនហា៊នវាយតម្លៃទុកមុនថា នរណាខ្លាំងជាងនរណាឡើយ មានតែរង់ចាំមើលប៉ុណ្ណោះ ។
ឡុង សុវណ្ណពៅ និងយឹម ឌៀប ជួបគ្នាលើកនេះ គឺស្វែងរកតំណែងលេខ៣ ។ សុវណ្ណពៅ ក៏ជាកំពូលអ្នកប្រើស្នៀតជើងយ៉ាងស្ទាត់ជំនាញម្នាក់ដែរ ព្រោះគេអាងកម្ពស់ខ្ពស់អាចវាយចេញជាប្រយោលក៏បានចូលកៀកក៏បាន ប៉ុន្តែចិត្តរបស់គេរាងតូចបន្តិចហើយ ។ ឯយឹម ឌៀប វិញ គ្រប់គ្នាតែងកោតក្រែងស្នៀតកណ្តាប់ដៃឆ្វេងរបស់គេដែលវាយចេញចំគោលដៅបានល្អ និងមានទម្ងន់ធ្ងន់ទៀតផង ។ ប៉ុន្តែយឹម ឌៀប ភាគច្រើនចូលចិត្តមើលងាយគូប្រកួត និងមិនសូវជាមានការប្រុងប្រយ័ត្នទៀតផង ។ និយាយរួមគូនេះមានល្បិចប្រយុទ្ធនៅលើសង្វៀនមិនលើសមិនខ្វះគ្នាប៉ុន្មានឡើយ ដូច្នេះចាំមើលតំណែងលេខ៣ធ្លាក់ទៅលើអ្នកណា ?
រីឯគូប្រកួតមិត្តភាពវិញ ឡុង សុវណ្ណឌឿន មកពីក្លិបសាលវ័ន្តកីឡា ជួបប្រកួតជាមួយពេជ្រ សម្បត្តិ មកពីសមាគមកីឡាប្រដាល់ក្រសួងការពារជាតិ ។ ស៊ិន សារ៉េត មកពីក្លិបកងពលតូចឆត្រយោង៩១១ ជួបប្រកួតជាមួយកីឡាករចាន់ សំអាត មកពីក្លិបកងពលធំអន្តរាគមន៍លេខ៣ព្រះវិហារ ៕
ចែករំលែកព័តមាននេះ