រាជធានីភ្នំពេញ ៖ អ្នកទោសចំនួន៥៧នាក់ ត្រូវបានដោះលែងឱ្យមានសេរីភាពឡើងវិញ បន្ទាប់ពីពួកគេបានជាប់ឃុំឃាំងអស់រយៈពេលច្រើនឆ្នាំនៅពន្ធនាគារព្រៃស ហើយទទួលការហ្វឹកហាត់វិជ្ជាជីវៈទៅតាមជំនាញច្រើនមុខវិជ្ជា និងមានការកែប្រែអត្តចរិត បុគ្គលិកលក្ខណៈ ទៅជាមនុស្សល្អក្នុងសង្គមបានច្រើនគួរឱ្យទុកចិត្ត ។
ពិធីដោះលែងអ្នកទោសនេះត្រូវបានរៀបចំឡើងកាលពីវេលាម៉ោង៩ព្រឹកថ្ងៃទី៨ ធ្នូ ២០១០ នៅមណ្ឌលកែប្រែ «ម២) នៃពន្ធនាគារព្រៃស ក្រោមអធិបតីភាពលោកឧត្តមសេនីយ៍ឯក លីវ ម៉ូវ អគ្គនាយករងនៃអគ្គនាយកដ្ឋានពន្ធនាគារ និងមានការអញ្ជើញចូលរួមពីលោកឧត្តមសេនីយ៍ទោយឹម ងេង ប្រធាននាយកដ្ឋានអប់រំកែប្រែនៃក្រសួងមហាផ្ទៃ លោកម៉ុង គឹមហេង ប្រធានមណ្ឌលអប់រំកែប្រែ «ម១» លោកវរសេនីយ៍ឯកខ្លូត តារា ប្រធានមណ្ឌលអប់រំកែប្រែ «ម២» ។
អ្នកទោសទាំង៥៧នាក់ ដែលត្រូវដោះលែងនេះគឺមិនមានជាប់ព័ន្ធនឹងបទឧក្រិដ្ឋធ្ងន់ធ្ងរទេ ហើយពួកគេក៏ជិតដល់ថ្ងៃកំណត់ត្រូវដោះលែងឱ្យមានសេរីភាពឡើងវិញដែរ ម្យ៉ាងខាងសមត្ថកិច្ចបានឃ្លាំមើលតាមដានពួកគេឃើញថា មានការកែប្រែអត្តចរិតបុគ្គលិកលក្ខណៈ ទំលាប់មកជាមនុស្សល្អបានច្រើន ទើបរៀបចំឱ្យមានការដោះលែង ៕
ចែករំលែកព័តមាននេះ