ពួកឧទ្ទាមស៊ីរីអះអាងកាលពីថ្ងៃទី៣០ សីហា ថា ពួកគេបាញ់ធ្លាក់យន្តហោះ១គ្រឿងរបស់កងទ័ពនៅភាគពាយ័ព្យប្រទេស ហើយការពារ បណ្តាទីតាំងពួកគេនៅក្រុងដាម៉ាស់ ដែលនៅទីនោះការប្រយុទ្ធគ្នា មានភាពខ្លាំងក្លាចាប់តាំងពីជាង១ខែមកហើយ ។
ទន្ទឹមនឹងនេះ ប្រធានាធិបតីអេហ្ស៊ីបលោកម៉ូហាម៉េដ ម័រស៊ី បានបរិហារនៅអីុរ៉ង់ជាសម្ព័ន្ធមិត្តស៊ីរីចំពោះរបបប្រធានាធិបតីស៊ីរីលោកបាចាអាល់អាសាដ ។
នៅលើទីលានការប្រយុទ្ធគ្នាពុំមានសញ្ញាចុះថយណាមួយឡើយដោយកាលពីថ្ងៃទី៣០ សីហា អង្គការOSDH រៀបរាប់ពីតុល្យការបណ្តោះអាសន្ននៃអ្នកស្លាប់ថាមានចំនួនយ៉ាងតិច៧៧នាក់ ក្នុងនោះមានជនស៊ីវិល៤៦នាក់ ទាហាន២១នាក់ និងពួកឧទ្ទាម១០នាក់ក្នុងទូទាំងប្រទេស។ នៅក្រុងដាម៉ាស់ នាយកមន្ទីរពេទ្យយោធា TECHRINE ថ្លែងថា សមាជិកនៃកម្លាំងរដ្ឋាភិបាល៤៧នាក់បានត្រូវស្លាប់កាលពីថ្ងៃទី២៩ សីហា ធ្វើឱ្យចំនួនទាហានដែលស្លាប់តាំងពីចាប់ផ្តើមមានការបះបោរពីខែមីនា ២០១១មកឡើងដល់៨.០០០នាក់ហើយ ។
ពួកប្រឆាំងស៊ីរីបានទាមទារកាលពីថ្ងៃទី៣០ សីហា ដល់ក្រុមប្រឹក្សាសន្តិសុខអ.ស.ប ឱ្យបង្កើតតំបន់ហាមហោះហើរនិងបង្កើតស្ពានមនុស្សធម៌មួយសម្រាប់ជួយដល់ប្រជាជនស៊ីរី ។ក្នុងតុល្យការរបស់ខ្លួនរយៈពេល១៧ខែនៃអំពើហិង្សា OSDH រៀបរាប់ពីចំនួនសមាជិកកងកម្លាំងសន្តិសុខស៊ីរីស្លាប់ថាមានជិត៦.៥០០នាក់ក្នុងចំណោមមនុស្សស្លាប់សរុបជាង២៥.០០០នាក់ក្នុងទូទាំងប្រទេស ។
វរសេនីយឯកអាវីហ្វ ម៉ាមូដ ស្លីម៉ាន ប្រមុខក្រុមប្រឹក្សាយោធាពួកឧទ្ទាមនៅខេត្តអីុដលីបអះអាងកាលពីថ្ងៃទី៣០ សីហា ថាពួកឧទ្ទាមជាច្រើនរយនាក់បានវាយប្រហារនាពេលព្រឹកលើព្រលានយន្តហោះអាប៊ូអែល ហ្សូហួរ ហើយបាញ់ធ្លាក់យន្តហោះចម្បាំងធុនMIG ១គ្រឿងរបស់កងទ័ពពេលហោះឡើង ។ ក្រៅពីយន្តហោះត្រូវបាញ់ធ្លាក់ដោយកាំភ្លើងស្វ័យប្រវត្តិ យើងនៅបានដុតចោលយន្តហោះMIG១១គ្រឿង ក្នុងព្រលានយន្តហោះនេះ រួចយើងត្រួតត្រាទីនោះទាំងស្រុង ៕
ចែករំលែកព័តមាននេះ