ខេត្តស្ទឹងត្រែង ៖ លោកមិន ឃិន រដ្ឋមន្ត្រីក្រសួងធម្មកា និងសាសនា និងលោកស្រី ងួន ធួន ទីប្រឹក្សារាជរដ្ឋាភិបាលអមដំណើរដោយមន្ត្រីក្រោមឱវាទបាននាំយកថវិកា និងគ្រឿងឧបភោគបរិភោគមួយចំនួនចែកជូនដល់ក្រុមយុវជនស្ម័គ្រចិត្តសម្តេចតេជោក្រុមទី៥៦ ដែលកំពុងសហការជាមួយមន្ត្រីជំនាញចំនួន៣២នាក់ ធ្វើការវាស់វែងដីធ្លីជូនប្រជាពលរដ្ឋក្នុងភូមិច្រប់ ឃុំក្បាលរមាស ស្រុកសេសាន ។ ពិធីប្រគល់អំណោយនេះបានធ្វើឡើងនៅបរិវេណសាលាបឋមសិក្សាភូមិច្រប់ ស្ថិតក្នុងភូមិច្រប់ ឃុំក្បាលរមាស ស្រុកសេសាន កាលពីថ្ងៃទី៣០ សីហា ២០១២ ។
លោកមិន ឃិន បានមានប្រសាសន៍ពាំនាំនូវការផ្តាំផ្ញើសួរសុខទុក្ខពីសំណាក់សម្តេច និងលោកជំទាវកិត្តិព្រឹទ្ធបណ្ឌិតដែលតែងយកចិត្តទុកដាក់ចំពោះក្រុមនិស្សិតស្ម័គ្រចិត្តចុះវាស់វែងដីធ្លីជូនប្រជាពលរដ្ឋ ដែលកំពុងដំណើរការគោលនយោបាយចាស់សកម្មភាពថ្មីលើវិស័យដីធ្លីនាពេលនេះ ។ លោកបានកោតសរសើរ និងវាយតម្លៃខ្ពស់ចំពោះបេសកកម្មរបស់ក្រុមយុវជនស្ម័គ្រចិត្តទាំងអស់ថា ជាគំរូវីរភាពមួយដ៏ល្អសម្រាប់យុវជនជំនាន់ក្រោយៗទៀត ពោលគឺជាបេសកកម្មប្រវត្តិសាស្ត្រក្នុងឆាកជីវិតរបស់ប្អូនៗ ។
និស្សិតលឹមបូរ៉ា ជាយុវជនស្ម័គ្រចិត្តក្រុមទី៥៦ ដែលចុះមកបំពេញការងារនៅស្រុកសេសាន បានបង្ហាញពីលទ្ធផលជាបណ្តោះអាសន្នដោយសម្រេចបានក្នុងភូមិក្របីជ្រំមាន១៤០ក្បាលដីស្មើនឹង១០៨គ្រួសារ ដីកសិកម្ម១៣៨ក្បាលដីស្មើនឹង៤៣០ហិកតា ដីលំនៅឋាន២ក្បាលដីស្មើនឹង៧៩ហិកតា សរុបក្បាលដីទាំងអស់៤៣៦ហិកតា ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ