ខេត្តកំពង់ឆ្នាំង ៖ រថយន្តដឹកគ្រឿងចក្រ (អេស្កាវ៉ាទ័រ)មួយគ្រឿង បានបើកក្នុងល្បឿនលឿនដល់ផ្លូវកោងបត់មិនរួចក៏ជ្រុលចូលទៅក្នុងសួនច្បារ បុកបង្គោលច្រវាក់ដាក់លម្អជុំវិញស្តូបអនុស្សាវរីយ៍កម្ពុជា-វៀតណាម បណ្តាលឱ្យខូចខាតបង្គួរ និងធ្វើឱ្យមានការភ្ញាក់ផ្អើលប្រជាពលរដ្ឋរាប់រយនាក់ទៅចោមរោមមើល ។
ហេតុការណ៍នេះបានកើតឡើងកាលពីវេលាម៉ោង៤ និង៣០នាទីរសៀលថ្ងៃទី៣០ សីហា ២០១២ នៅផ្លូវបំបែកជា៤ ចំណុចចន្លោះមុខមន្ទីរបរិស្ថាន និងស្នងការដ្ឋាននគរបាលខេត្ត ។ ទោះបីយ៉ាងណា អ្នកបើកបររថយន្តខាងលើនេះ ដែលប៉ូលិសបានអះអាងថា ស្រវឹងហើយបាត់បង់ម្ចាស់ការត្រូវបានប៉ូលិសឃាត់ខ្លួនភ្លាមៗផងដែរ តែសំណាងណាស់ដែលមិនមាននរណាម្នាក់រងគ្រោះក្នុងហេតុការណ៍នោះទេ ។
លោកអៀរ ប៊ុនធឿន នាយការិយាល័យប៉ូលិសចរាចរផ្លូវគោកនៃស្នងការដ្ឋាននគរបាលខេត្តបានឱ្យដឹងថា រថយន្តបង្កហេតុម៉ាកហ៊ីយ៉ាន់ដាយ ដឹកគ្រឿងចក្រមួយគ្រឿង ដែលបើកដោយឈ្មោះវ៉ន សុថុន អាយុ៣២ឆ្នាំ មានទីលំនៅភូមិសន្ទូច ឃុំស្រែថ្មី ស្រុករលាប្អៀរ ។ នេះជាករណីគ្រោះថ្នាក់ពុំធ្លាប់មានទេ ពីមុនមក ប៉ុន្តែសំណាងណាស់ នៅកន្លែងកើតហេតុ គឺជាកន្លែងហាត់ប្រាណ និងទាត់សីរបស់ប្រជាពលរដ្ឋរៀងរាល់ល្ងាច ប៉ុន្តែនៅល្ងាចនោះមិនទាន់ដល់ម៉ោងពួកគាត់មកហាត់ប្រាណ និងជួនជាមានរលឹមតិចៗផង ទើបមិនមានមនុស្ស បើសិនជាដូចសព្វដងវិញ ពិតជាមានសោកនាដកម្មជាក់ជាពុំខាន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ