រាជធានីភ្នំពេញ ៖ អាជីវករប្រុសស្រីប្រមាណ៥០នាក់ក្នុងចំណោមអាជីវករ២២៣នាក់នៅផ្សារទំនប់ ហៅផ្សាររងិនអាន បាននាំគ្នាតវ៉ាដោយលើកបដា និងរូបថតសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹត្តិបណ្ឌិត ប៊ុន រ៉ានី ហ៊ុន សែន ព្រោងព្រាតឈរបិទផ្លូវលេខ៥៩៨ និងផ្លូវលេខ៣៥៥ ដើម្បីប្រឆាំងការអនុវត្តដីកាសម្រេចរបស់សាលាឧទ្ធរណ៍ ដែលបណ្តេញអាជីវករដែលបញ្ចប់កិច្ចសន្យាដើម្បីយកដីរៀបចំអភិវឌ្ឍន៍ផ្សារជាថ្មី។
ការផ្ទុះចេញនូវការតវ៉ានេះ បានកើតឡើងកាលពីវេលាម៉ោង៦ព្រឹកថ្ងៃទី៣០ សីហា រហូតដល់វេលាម៉ោង៨ព្រឹកនៅបរិវេណផ្លូវចូលផ្សារដែលស្ថិតនៅភូមិទួលគោក សង្កាត់ទួលសង្កែ ខណ្ឌឫស្សីកែវ ខណៈពេលកម្លាំងចម្រុះដឹកនាំដោយលោកហៀង សុភ័ក្ត្រ ព្រះរាជ្ញារងអមសាលាដំបូងរាជធានីភ្នំពេញចុះទៅអនុវត្តដីកាសម្រេចលេខ០៦ ដកសក្រ របស់សាលាឧទ្ធរណ៍ចុះថ្ងៃទី១៥ សីហា ឆ្នាំ២០១២ ។ ទោះបីជាយ៉ាងណា ការអនុវត្តនេះពុំបានសម្រេចឡើយ ដោយលោកកែប ជុតិមា អភិបាលរាជធានីភ្នំពេញបញ្ជាឱ្យផ្អាកវិញ ។
តាមព័ត៌មានឱ្យដឹងថា សមត្ថកិច្ចបានប្រើប្រាស់កម្លាំងប្រមាណ៥០នាក់ធ្វើការឡោមព័ទ្ធទីតាំងផ្សារតាំងពីវេលាម៉ោង៣ និង៣០នាទីទៀបភ្លឺដើម្បីបិទផ្លូវមិនឱ្យអាជីវករចូលទៅលក់ដូរ និងបង្ខំឱ្យចាកចេញពីផ្សារទៅតាមអំណាចដីកាតុលាការ។ ទន្ទឹមនោះ អាជីវករខ្លះបានត្រៀមជាស្រេចនូវបដា រូបថតសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ហើយខ្លះទៀតបាននាំគ្នាជញ្ជូនអីវ៉ាន់ចេញ ។ នៅព្រឹកនោះ មុនដំបូងគេឃើញអាជីវករប្រមាណ៣០នាក់ចេញមកតវ៉ាជាមួយប៉ូលិស ប៉េអឹម ដែលស្ទាក់ផ្លូវមិនឱ្យអាជីវករចូលនៅច្រកខាងលិចផ្សារ ព្រមទាំងនាំគ្នាឈរបិទផ្លូវលេខ៥៩៨ បង្កឱ្យមានការកកស្ទះចរាចរណ៍ ។ ក្រោយពីការឈរបិទផ្លូវប្រមាណ១០នាទី ក្រុមអាជីវករក៏ចូលទៅក្នុងផ្សារវិញ បន្ទាប់ពីមានការសម្របសម្រួល និងបើកផ្លូវឱ្យអាជីវករបានចូលផ្សារវិញ ។ នៅវេលាម៉ោងប្រមាណ៧ព្រឹក លោកហៀង សុភ័ក្ត្រ ព្រះរាជអាជ្ញារង បានមកដល់នៅច្រកចូលខាងជើង ហើយអាជីវករក៏នាំគ្នាតវ៉ា និងលើកបដាឈរបិទផ្លូវលេខ៥៩៨ទៀតដែលតាមការប៉ាន់ប្រមាណមានប្រហែលជា៥០នាក់ ។ ស្របពេលនោះសមត្ថកិច្ចរួមទាំងព្រះរាជអាជ្ញារងបានបញ្ជាឱ្យក្រុមកម្មករធ្វើការបិទផ្សារដោយយកសង្ក័សីបាំងតែត្រូវបានអាជីវករលើកគ្នាចេញពីដងផ្លូវធ្វើការរារាំង ព្រមទាំងមានការប្រទាញប្រទង់គ្នាផងដែរ តែពុំមានការប៉ះទង្គិចគ្នាធ្ងន់ធ្ងរឡើយ ។
តាមព័ត៌មានឱ្យដឹងទៀតថា នៅព្រឹកនោះក្រុមអាជីវករបានក្រាញននៀល និងលើកបដាព្រោងព្រាតដើម្បីរារាំងការអនុវត្តដីកា ហើយនៅវេលាម៉ោង៨ព្រឹក តាមរយៈមន្ត្រីសាលាខណ្ឌឫស្សីកែវ បានទទួលបញ្ជាពីលោកកែប ជុតិមា អភិបាលរាជធានីភ្នំពេញ ឱ្យដកថយពន្យារការអនុវត្ត ។ នៅព្រឹកនោះ គេឃើញលោកហូ វ៉ាន់ តំណាងរាស្ត្រខាងគណបក្សសម រង្ស៊ី ក៏បានទៅដល់និងស្ថិតក្នុងចំណោមអាជីវករផងដែរ ។
ក្រុមអាជីវករបានឱ្យដឹងថា ទីតាំងផ្សារទំនប់ហៅផ្សារងិនអាននេះជាដីជនជាតិកូរ៉េ ហើយត្រូវក្រុមហ៊ុន New Rich ដែលមានលោកកុយ សុទ្ធី ជាអ្នកវិនិយោគធ្វើផ្សារតាំងពីឆ្នាំ២០០៨ ដោយមានតូបចំនួន៣១៥ ហើយអាជីវករធ្វើកិច្ចសន្យាជួល៣ឆ្នាំ ។ កាលនោះតម្លៃជួល១ថ្ងៃ២ពាន់រៀល មួយខែ៣៥ដុល្លារ និងមួយឆ្នាំ១០០ដុល្លារ ប៉ុណ្ណោះ ស្រាប់តែនៅថ្ងៃទី២ តុលា ឆ្នាំ២០១១ ពេលបញ្ចប់កិច្ចសន្យាផ្សារ ត្រូវឈ្មោះអ៊ូ សេដ្ឋានូ ជាអ្នកដេញថ្លៃបាន ទាមទារយកផ្សារជួលជុលដើម្បីចាក់ដី ដាក់លូ ធ្វើដំបូលដែក និងដំឡើងថ្លៃតូបដែលជួរមុខ២.៥០០ដុល្លារ ទៅ២.៨០០ដុល្លារ និងជួរក្រោយតម្លៃ១.៥០០ដុល្លារ ទៅ១.៨០០ដុល្លារ ក្នុងរយៈពេល៣ឆ្នាំ ហើយកុងត្រាតែ៣ឆ្នាំ និងបានដេញពួកគាត់ឱ្យចេញដើម្បីរៀបចំជួសជុល ព្រមទាំងប្តឹងទៅតុលាការ ។ក្រុមអាជីវករបន្តទៀតថា ពួកគាត់ជាអាជីវករតូចតាចតើមានប្រាក់ឯណាបង់នោះ ទើបធ្វើការតវ៉ាឱ្យចុះតម្លៃឈ្នួល និងទាមទារឱ្យមានកិច្ចសន្យារយៈពេល៦ឆ្នាំ ។
លោកហៀង សុភ័ក្ត្រ ព្រះរាជអាជ្ញារងសាលាដំបូងរាជធានី ដែលដឹកនាំការអនុវត្តដីកាមានប្រសាសន៍ថា ការតវ៉ារបស់អាជីវករបែបនេះតើច្បាប់នៅឯណា? អាជីវករបានជួលតូបតែ៣ឆ្នាំផុតកិច្ចសន្យា ហើយបន្តលក់ដូរដោយមិនបានបង់ថ្លៃតូបប្រមាណ១ឆ្នាំ ។ ចំណែកលោកឃុត កែវសុត្ថា មេធាវីតំណាងម្ចាស់បំណុលឈ្មោះអ៊ូ សេដ្ឋានូ បានចាត់ទុកថា ការតវ៉ាជាការរំលោភកិច្ចសន្យាជួលតូប និងសិទ្ធិកាន់កាប់អចលនទ្រព្យ ។ បើឱ្យតែគ្នាច្រើនតវ៉ាធ្វើអ្វីមិនកើត តើប្រទេសយើងជាប្រទេសនីតិរដ្ឋ ឬទេ? ការធ្វើបែបនេះអ្នកវិនិយោគណាគេហ៊ានមករកស៊ីទៅ ។
លោកមេធាវីនិយាយថា វាអយុត្តិធម៌ណាស់សម្រាប់កូនក្តីលោកជាអ្នករកស៊ី ។ ក្នុងចំណោមអាជីវករទាំងអស់ចំនួន៣១៥តូប គឺនៅសល់តែ២២៣តូបមិនគោរពកិច្ចសន្យារើចេញ ហើយនិងមិនធ្វើកិច្ចសន្យាជួលបន្ត ព្រមទាំងមិនបង់ប្រាក់ទៀត ចំណែកមួយចំនួនទៀតគេនាំគ្នារើចេញអស់ហើយ ។ លោកមេធាវីបញ្ជាក់ថា ទីតាំងផ្សារចាស់ទ្រុឌទ្រោម គ្មានប្រព័ន្ធលូ ទឹកដក់ ត្រូវរុះរើចាក់ដី ជួសជុលធ្វើដំបូល ធ្វើរបងឱ្យមានអនាម័យ និងសន្តិសុខ អភិវឌ្ឍន៍ឡើងវិញ តែត្រូវរារាំងដោយក្រុមអាជីវករ ។
ទោះបីជាបែបណា ដំណោះស្រាយមួយដែលឈ្នះទាំងអស់គ្នា គឺជាការល្អប្រសើរបំផុត ។ សង្ឃឹមថា អាជ្ញាធរនឹងស្វែងរកការសម្របសម្រួលគ្នាមួយក្នុងការបញ្ចៀសបញ្ហាដែលធ្ងន់ធ្ងរជាងនេះ ៕
ចែករំលែកព័តមាននេះ