ខេត្តកំពង់ចាម ៖ យុវជនម្នាក់ឈ្មោះឡាច ឡា អាយុ២០ឆ្នាំ មានទីលំនៅភូមិល្វាទេ ឃុំមានជ័យ ស្រុកស្រីសន្ធរ ត្រូវបានគេលួចកាប់ប្រហារត្រូវ១កាំបិត ចំស្លឹកត្រចៀកខាងឆ្វេងរយះប្រវែង១៥សង់ទីម៉ែត្រ បណ្តាលឱ្យស្លាប់យ៉ាងអាណោចអាធ័មនៅក្នុងថ្លុកឈាមក្រោយពីមានជម្លោះពាក្យសម្តីនៅក្នុងវង់ផឹកស៊ីមួយកន្លែង ស្ថិតនៅភូមិបេងថ្មី ឃុំសេដា ស្រុកតំបែរ កាលពីវេលាម៉ោង៩យប់ថ្ងៃទី២៩ សីហា ២០១២ ត្រូវបានសមត្ថកិច្ចស្រាវជ្រាវចាប់ខ្លួនបានជនសង្ស័យម្នាក់ផងដែរ ។
តាមលោកស៊ាន ម៉េងស៊ា អធិការរងនគរបាលស្រុកតំបែរ ទទួលផែនការយុត្តិធម៌ប្រាប់ឱ្យដឹងថា នៅនឹងផ្ទះរបស់បុរសឈ្មោះសាំង សុខឃាង អាយុ៥០ឆ្នាំ នៅភូមិកើតហេតុខាងលើមានការជួបជុំផឹកស៊ី ដោយមានគ្នា៥នាក់ ក្នុងនោះមានអ្នករងគ្រោះម្នាក់ និងជនសង្ស័យឈ្មោះហេង ភាង ភេទប្រុស អាយុ២៦ឆ្នាំ ដែលត្រូវបានចាប់ខ្លួនផងដែរ ។ លោកស៊ាន ម៉េងស៊ា បានប្រាប់បន្តថា ក្នុងពេលដែលកំពុងផឹកស៊ីនោះមិនដឹងយ៉ាងម៉េច ស្រាប់តែមានទំនាស់ពាក្យសម្តីកើតឡើងដោយមានបោកកែវស្រាបែកអស់២ទៅ៣កែវផងដែរ ។ បន្ទាប់មកជនរងគ្រោះឈ្មោះឡា បានក្រោកដើរចេញពីផ្ទះរបស់ឪពុកមាឈ្មោះឃាង បានចម្ងាយ២១ម៉ែត្រ ត្រូវបានជនមិនស្គាល់មុខលួចកាប់ប្រហារ១កាំបិត បណ្តាលឱ្យស្លាប់តែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ