រាជធានីភ្នំពេញ ៖ ចោរឆក់២នាក់ជិះម៉ូតូវីវ៉ាបានធ្វើសកម្មភាពឆក់កាបូបស្ពាយពីស្ត្រីជនជាតិចិនម្នាក់ដែលកំពុងជិះម៉ូតូកង់បីនៅតាមបណ្តោយផ្លូវឌួងងៀប ត្រង់ចំណុចផ្ទះលក់ចំណីសត្វស៊ីភី ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ កាលពីវេលាម៉ោង១១និង៣០នាទីថ្ងៃត្រង់ថ្ងៃទី៣០ សីហា ២០១២ បានដោយសុវត្ថិភាព ដោយមិនរំខានដល់ប៉ូលិសនោះឡើយ ។
ស្ត្រីរងគ្រោះជាជនជាតិចិនឈ្មោះ Wujioyan អាយុ២០ឆ្នាំ ជាសិស្ស ។ មុនពេលកើតហេតុនារីរងគ្រោះបានជិះម៉ូតូកង់បីចេញពីសាលាទៅផ្ទះក្នុងសង្កាត់ចោមចៅ ខណ្ឌពោធិ៍សែនជ័យ លុះមកដល់ចំណុចកើតហេតុក៏ត្រូវចោរ២នាក់ជិះម៉ូតូវីវ៉ា ពណ៌ខ្មៅ មកក្បែរ ហើយបានលូកដៃឆក់ទាញយកកាបូបស្ពាយជិះគេចខ្លួនបាត់ស្រមោលតែម្តង ។ នារីរងគ្រោះបានឱ្យដឹងថា នៅក្នុងកាបូបដែលចោរឆក់យកទៅបាត់នោះមានលុយចំនួន៦០ដុល្លារ និងស្ព័រផ្ទាល់ខ្លួនចំនួន១ រួមទាំងសម្ភារមួយចំនួនទៀត ។
គួរបញ្ជាក់ថា សកម្មភាពចោរឆក់កាបូបលុយ និងឆក់ទូរស័ព្ទនៅក្នុងរាជធានីភ្នំពេញ បានកើតឡើងវិញហើយ ដោយគ្រាន់តែពីមុន ក្រុមចោរបានធ្វើសកម្មភាពឆក់នៅពេលថ្ងៃតែប៉ុណ្ណោះ ប៉ុន្តែបច្ចុប្បន្ននេះសកម្មភាពក្រុមចោរឆក់បានធ្វើនៅពេលយប់ថែមទៀត បើទោះបីសមត្ថកិច្ចបានតាមប្រមាញ់ចាប់បានខ្លះៗកន្លងមកក៏ដោយ ៕
ចែករំលែកព័តមាននេះ