រាជធានីភ្នំពេញ ៖ ក្បួនយុទ្ធនាការប្រកាសប្រមូលកុមារដែលគ្រប់អាយុឱ្យចុះឈ្មោះចូលរៀនធ្វើនៅសាលាបឋមសិក្សាភូមិឫស្សី សង្កាត់ស្ទឹងមានជ័យ ខណ្ឌមានជ័យ កាលពីថ្ងៃទី៣០ សីហា ២០១២ ។ ពិធីដង្ហែក្បួន យុទ្ធនាការមានការចូលរួមពីលោកសេង សាញ់ ចៅសង្កាត់ស្ទឹងមានជ័យ លោកហ៊ឹម សាមិត្ត ប្រធានគម្រោងនៃអង្គការទស្សនៈពិភពលោកប្រចាំតំបន់ស្ទឹងមានជ័យ លោកឌី សុផល អនុប្រធានអប់រំខណ្ឌមានជ័យ លោកផៃ បុរី នាយកប្រធានកម្រងសាលាស្ទឹងមានជ័យ អង្គការនានា និងលោកគ្រូ អ្នកគ្រូ សិស្សានុសិស្ស ព្រមទាំងអាជ្ញាធរមានសមត្ថកិច្ចប្រចាំសង្កាត់ស្ទឹងមានជ័យ។
លោកសេង សាញ់ ចៅសង្កាត់ស្ទឹងមានជ័យ បានមានប្រសាសន៍ថា ការដង្ហែក្បួនយុទ្ធនាការនេះក្នុងគោលបំណងប្រកាសដល់មាតាបិតាដែលមានកូនគ្រប់វ័យសិក្សាឱ្យនាំកូនទៅចុះឈ្មោះចូលរៀនឱ្យបានគ្រប់ៗគ្នាសម្រាប់ឆ្នាំ២០១២-២០១៣ ដែលការទទួលចុះឈ្មោះចូលរៀនចាប់ផ្តើមពីថ្ងៃទី១ កញ្ញា រហូតដល់ថ្ងៃទី៣០ កញ្ញា ២០១២ ជាសេចក្តីប្រកាសរបស់ក្រសួងអប់រំ យុវជន និងកីឡា ។ លោកចៅសង្កាត់បន្តថា យុទ្ធនាការនេះ គឺជាចំណុចដៅមួយរបស់សង្កាត់ក្នុងការសម្រេចឱ្យបាននូវផែនការជាតិអប់រំសម្រាប់អ្នកទាំងអស់គ្នានាឆ្នាំ ២០១៥ ចំពោះកុមារ១០០% ត្រូវបានចូលរៀន និងរៀនប្រកបដោយគុណភាព ។ បញ្ហានេះជាក្តីកង្វល់ដ៏ធ្ងន់ធ្ងររបស់អាជ្ញាធរ ព្រោះថា សង្កាត់ស្ទឹងមានជ័យ បច្ចុប្បន្នមានប្រជាជនចំណាកស្រុកមករស់នៅ និងចូលច្រើនដែលពួកគាត់ភាគច្រើនជាកម្មករបម្រើការតាមរោងចក្រ កម្មករសំណង់ និងអ្នករត់ម៉ូតូឌុបជាដើម ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ