ខេត្តបន្ទាយមានជ័យ ៖ ការប្រកួតបាល់ទាត់ស្ត្រីជ្រើសរើសជើងឯកថ្នាក់ជាតិឆ្នាំ២០១២ ដែលចាប់ផ្តើមធ្វើតាំងពីថ្ងៃទី២២ សីហា នៅទីលានបាល់ទាត់ខេត្តបន្ទាយមានជ័យនោះ នៅព្រឹកថ្ងៃទី២៩ សីហា ការប្រកួតបានឈានចូលដល់វគ្គផ្តាច់ព្រ័ត្រហើយ ដោយមានការចូលរួមប្រគល់ពានរង្វាន់ពីសំណាក់លោកអ៊ុង អឿន អភិបាលខេត្តបន្ទាយមានជ័យ និងគណៈប្រតិភូកីឡា ភ្ញៀវជាតិ អន្តរជាតិ ព្រមទាំងកម្លាំងកងរាជអាវុធហត្ថជាច្រើនរូប ។ លទ្ធផលនៃការប្រកួតវគ្គផ្តាច់ព្រ័ត្រនេះ គឺក្រុមបាល់ទាត់អង្គការកម្មវិធី Salt របស់ខេត្តបាត់ដំបង យកឈ្នះក្រុមអធិរាជភ្នំស្វាយខេត្តបន្ទាយមានជ័យ ២ ទល់នឹង ១ មានឱកាសលើកពានជើងឯកថ្នាក់ជាតិឆ្នាំ២០១២ នេះ ។
ក្រមបាល់ទាត់អង្គការកម្មវិធី Salt របស់ខេត្តបាត់ដំបង បានក្លាយជាក្រុមជើងឯកម្តងទៀត បន្ទប់ពីប្រកួតនៅវគ្គផ្តាច់ព្រ័ត្រឈ្នះក្រុមអធិរាជភ្នំស្វាយខេត្តបន្ទាយមានជ័យ ២ ទល់នឹង ១ ខណៈកាលពីឆ្នាំ២០១១ ការប្រកួតបានរៀបចំធ្វើនៅខេត្តបាត់ដំបង ហើយក្រុមអង្គការកម្មវិធី Salt ដែលជាម្ចាស់ផ្ទះជាអ្នកលើកពាននេះម្តងរួចមកហើយ ។ ក្នុងឆ្នាំ២០១២ នេះ ការប្រកួតធ្វើនៅខេត្តបន្ទាយមានជ័យ ជាឱកាសសម្រាប់ក្រុមអធិរាជភ្នំស្វាយខេត្តបន្ទាយមានជ័យ យកឈ្នះដើម្បីលើកពានម្តង ដោយសារលេងលើទឹកដីរបស់ខ្លួន ប៉ុន្តែបែរជាក្រុមអង្គការកម្មវិធី Salt ជាអ្នកលើកពានទៅវិញ បើទោះជាលេងលើទឹកគេក៏ដោយ ។
គួរបញ្ជាក់ថា ក្រុមទាំង២នេះ ស្ថិតនៅក្នុងពូលជាមួយគ្នាដែលកាលជួបគ្នាក្នុងពូលក្រុមអង្គការកម្មវិធី Salt ឈ្នះក្រុមអធិរាជភ្នំស្វាយខេត្តបន្ទាយមានជ័យ ៤ទល់នឹង ២ ។ ពេលនេះក្រុមអង្គការកម្មវិធី Salt ទទួលបានចំណាត់ថ្នាក់លេខ១ ក្រុមអធិរាជភ្នំស្វាយខេត្តបន្ទាយមានជ័យ លេខ២ និងក្រុមលេខ៣ ស្ទួនគឺខេត្តកំពង់ឆ្នាំង និងខេត្តសៀមរាប ។ ព្រឹត្តិការណ៍ប្រកួតបាល់ទាត់ស្ត្រីជ្រើសរើសជើងឯកថ្នាក់ជាតិឆ្នាំ២០១២ នេះ មានក្រុមបាល់ទាត់ចំនួន១០ចូលរួមប្រកួត និងបែងចែកជា២ពូល (A និង B) ដែលក្នុងមួយពូលៗមាន៥ក្រុម។
សម្រាប់ពូល A មានក្រុមអធិរាជភ្នំស្វាយខេត្តបន្ទាយមានជ័យ, ក្រុមខេត្តកំពង់ធំ, ក្រុមអភិវឌ្ឍន៍បាល់ទាត់ស្ត្រី, ក្រុមអង្គការកម្មវិធី Salt និងក្រុមខេត្តក្រចេះ ។ ចំណែកពូល B មានក្រុមខេត្តកំពង់ឆ្នាំង, ក្រុមខេត្តប៉ៃលិន, ក្រុមខេត្តព្រះសីហនុ, ក្រុមខេត្តបាត់ដំបង និងក្រុមខេត្តសៀមរាប ៕
ចែករំលែកព័តមាននេះ