ខេត្តឧត្តរមានជ័យ ៖ ជនរងគ្រោះឈ្មោះហែម ណាង ភេទប្រុស អាយុ៤៤ឆ្នាំ រស់នៅក្នុងភូមិបុស្សធំ ឃុំគោកខ្ពស់ ស្រុកបន្ទាយអំពិល បានស្លាប់ចោលប្រពន្ធកូនកាលពីថ្ងៃទី២៦ សីហា ២០១២ ខណៈចេញទៅបរបាញ់សត្វហើយត្រូវបានគេសន្និដ្ឋានថា អំបែងកាណុងដែលបែកខ្ទាតមកត្រូវថ្ងាសលលាដ៍ក្បាលផុងចូលទៅខាងក្នុងខួរក្បាល ។
ប្រពន្ធឈ្មោះចិន ភឿប អាយុ៤៣ឆ្នាំ បានរៀបរាប់ឱ្យកោះសន្តិភាពដឹងថា នៅព្រឹកថ្ងៃទខាងលើ ប្តីរបស់ខ្លួនបានប្រាប់ថា អញចេញទៅបរបាញ់សត្វនៅឯព្រៃ និងយកអន្ទាក់ដាក់សត្វផង ហើយមានកាំភ្លើងកែច្នៃសម្រាប់បាញ់សត្វ១ដើមក៏ដើរចេញទៅតែម្នាក់ឯង ។ ចំណែកខ្លួនជាប្រពន្ធនៅផ្ទះចេះតែរង់ចាំមើលផ្លូវដោយមិនឃើញប្តីវិលត្រឡប់មកផ្ទះវិញនោះរហូតមកទល់នឹងថ្ងៃទី២៩ សីហា ២០១២ ក៏មានការព្រួយបារម្ភ ហើយបានដើររកសាកសួរគេឯង គេបានឆ្លើយថា មិនបានដឹងទេ បន្ទាប់មករូបគាត់បានរត់ទៅពឹងអ្នកភូមិឱ្យជួយដើររកនៅក្នុងព្រៃ ។ ប្រពន្ធជនរងគ្រោះបន្តថា អ្នកភូមិបានជួយខិតខំដើររកពាសពេញក្នុងព្រៃហើយក៏បានប្រទះឃើញសពប្តីរបស់គាត់ដេកស្លាប់នៅក្នុងព្រៃដោយមានស្លាកស្នាមផុងលលាដ៍ក្បាលចំថ្ងាសលើចិញ្ចើម១កន្លែង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ