ក្រុងប៉ោយប៉ែត ៖ លោកផាន់ ភីរម្យំ ព្រះរាជអាជ្ញារងខេត្ត ដឹកនាំកម្លាំងសមត្ថកិច្ចចម្រុះចំនួនប្រមាណ៥០នាក់ ចុះអនុវត្តសាលក្រមរបស់តុលាការកំពូលនៅព្រឹកថ្ងៃទី៣០ សីហា ២០១២ នេះនៅលើចំណុចដីទំនាស់ជាមួយប្រជាពលរដ្ឋប្រមាណ៨០គ្រួសារ ស្ថិតក្នុងភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត ។
ការចុះអនុវត្តសាលក្រមនេះ គេឃើញមានប្រជាពលរដ្ឋមួយចំនួនដែលរស់នៅកន្លែងកើតហេតុបាននាំគ្នាជ្រួលច្រាល់ត្រៀមខ្លួនតតាំងជាមួយសមត្ថកិច្ចផងដែរ ប៉ុន្តែមិនមានបាតុភាពអ្វីកើតឡើងគួរឱ្យកត់សម្គាល់នោះឡើយ ។ ប្រភពព័ត៌មានពីប្រជាពលរដ្ឋបានឱ្យដឹងថា ពួកគាត់បានរស់នៅលើដីនេះតាំងពីឆ្នាំ២០០០មកម៉្លេះ ដោយមានលិខិតកាន់កាប់ដីធ្លីពីអាជ្ញាធរមូលដ្ឋានបានចេញទទួលស្គាល់ត្រឹមត្រូវថែមទៀតផង ។ ទើបតែនៅឆ្នាំ ២០០៨ ស្រាប់តែលេចឮមន្ត្រីជាន់ខ្ពស់ និងឈ្មោះយស អ៊យ បានដាក់ពាក្យបណ្តឹងជំទាស់ថា ដីស្រះទឹករបស់ពួកគាត់ដែលមានទំហំ៣៣ម៉ែត្រគុណ១០៧ម៉ែត្រ ថា ជាដីពួកគេទៅវិញ ។
ក្នុងការចុះអនុវត្តសាលក្រមនេះដែរ លោកផាន់ ភីរម្យំ បានមានប្រសាសន៍ទៅកាន់ប្រជាពលរដ្ឋឱ្យដឹងថា ការដឹកនាំកម្លាំងចុះមកនៅពេលនេះមិនមែនមកធ្វើបាប ឬរករឿងឱ្យពលរដ្ឋមានការភ័យខ្លាចអ្វីឡើយ គឺក្នុងគោលបំណងមកពិនិត្យមើលជាក់ស្តែងចំពោះពលរដ្ឋដែលរស់នៅលើចំណុចដីទំនាស់នេះហើយនឹងរកដំណោះស្រាយឱ្យមានភាពយុត្តិធម៌ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ