រាជធានីភ្នំពេញ ៖ ព្រឹត្តិការណ៍ប្រកួតក្បាច់គុនបុរាណខ្មែរនៅសង្វៀនបាយ័នបឹងស្នោស្អែកនេះ (១ កញ្ញា) នឹងធ្វើឱ្យរញ្ជួយសង្វៀនជាក់ជាមិនខាន ខណៈដែលអ្នកស្នេហាវិស័យប្រដាល់កំពុងទន្ទឹងរង់ចាំមើលថា តើក្នុងចំណោមជើងខ្លាំងទាំង៤រូបដែលឡើងមកអង្រួនសង្វៀនបាយ័ន នរណាមានឱកាសឡើងទៅប្រកួតដណ្តើមខ្សែក្រវាត់អាជ្ញាធរជាតិប្រឆាំងគ្រឿងញៀន ពីអ្នកប្រដាល់កែងឆេះ ជង្គង់ទិព្វ អូត ភូថង បាន។
ដើម្បីបង្ហាញពីឥទ្ធិពលខ្លួន កីឡាករអ៊ុង វីរៈ មកពីក្លិបកងពលតូចឆត្រយោង៩១១ បានធ្វើការប្រកាសថា នឹងផ្តួលកីឡាករវ៉ែន សុវណ្ណ មកពីក្លិបកងកេងខេត្តបាត់ដំបង ឱ្យបាន ព្រោះកន្លងមកលោកធ្លាប់សាកកណ្តាប់ដៃគ្នាបាន៣លើកដែរ ក្នុងនោះឈ្នះ២ ចាញ់១ ទើបលោកដឹងច្បាស់ពីក្បាច់ប្រដាល់របស់វ៉ែន សុវណ្ណ ថាមានចំណុចណាខ្លះដែលអាចយកឈ្នះគាត់បាន ។ វ៉ែន សុវណ្ណ គាត់ពូកែខាងប្រើកណ្តាប់ដៃ និងជើង ដូច្នេះលោកត្រៀមខ្លួនរួចរាល់ហើយទាំងក្បាច់ទប់ទល់ និងសម្លាប់ក្នុងការផ្តួលគាត់ ។
ដោយឡែកកីឡាករចាន់ រតនា ដែលអ្នកណា ក៏ស្គាល់ថាជាជើងខ្លាំងម្នាក់ដែរនោះ ក៏បានអះអាងពីការផ្តួលដៃគូវ៉ោយ សុធន ឱ្យទាល់តែបានដែរដើម្បីបានឡើងទៅតតាំងជាមួយអូត ភូថង ។ កីឡាករចាន់ រតនា មកពីក្លិបខេមរៈខ្លាហោះ បានថ្លែងថា លោកមិនដែលមានប្រវត្តិប្រកួតជាមួយវ៉ោយ សុធន ទេ នេះជាលើកទីមួយ ដូច្នេះលោកត្រូវតែបញ្ចេញឱ្យអស់ពីសមត្ថភាពដើម្បីផ្តួលដៃគូឱ្យខាងតែបានដោយលោកបានប្រឹងហ្វឹកហាត់តាំងពីបានដឹងពីសមាសភាពគូប្រជែងមកម៉្លេះ ។ រតនា បានបញ្ជាក់ពីចំណុចពិសេសរបស់សុធន ទោះបីលោកមិនធ្លាប់ជួបប្រកួតជាមួយក៏ដោយ ក៏ដឹងបានថា គាត់(សុធន) ធ្វើបានល្អខាងប្រើជង្គង់ និងមានកម្លាំងខ្លាំង រីឯកម្ពស់វិញ ក៏ល្អដែលផ្ទុយពីលោកពូកែខាងទាត់។តែយ៉ាងណាលោកបានត្រៀមក្បាច់ពិសេសៗរួចជាស្រេចដើម្បីការពារខ្លួន រួចប្រើក្បាច់សម្លាប់គាត់តែម្តង និងសង្ឃឹមថាចុងក្រោយបានប៉ះជាមួយអូត ភូថង ។
គួរបញ្ជាក់ថា កីឡាករចាន់ រតនា ចាប់ផ្តើមអាជីពប្រដាល់ដំបូងនាឆ្នាំ២០០៦ ប្រកួតក្នុងប្រភេទទម្ងន់៥៧គីឡូក្រាម តែសព្វថ្ងៃលោកប្តូរមកវាយក្នុងប្រភេទទម្ងន់៧៧គីឡូក្រាមប្រមាណ២ឆ្នាំហើយ ។ កីឡាកររូបនេះធ្លាប់បានទទួលឱកាសចេញទៅប្រដាល់នៅប្រទេសបារាំងម្តងកាលពីចុងឆ្នាំ២០១០ កន្លងទៅដោយទទួលបានខ្សែក្រវាត់ពីខាងសហព័ន្ធកីឡាប្រដាល់នៅប្រទេសបារាំង ។ រយៈពេលជិត៧ឆ្នាំ ចាន់ រតនា ប្រកួតបានជាង៥០ដងហើយដោយលោកធ្វើបានល្អខាងប្រើជើងទាត់ធ្វើឱ្យមហាជនកត់ចំណាំ ។ រីឯកីឡាករអ៊ុង វីរៈ ទើបតែចាប់ផ្តើមអាជីពប្រដាល់កាលពីឆ្នាំ២០១១ ប្រកួតក្នុងទម្ងន់ចាប់ពី៦៥ដល់៦៩គីឡូក្រាម ។ វីរៈ ពូកែខាងប្រើជង្គង់ និងកណ្តាប់ដៃ ធ្លាប់ប្រកួតជើងឯកទូទាំងប្រទេសនៅឆ្នាំ២០១១ ទទួលបានមេដាយសំរឹទ្ធិ និងធ្លាប់ទទួលបានជើងឯកពានរង្វាន់ស៊ីម៉ង់ត៍រូបភ្នំកាលពីដើមឆ្នាំនេះនៅសង្វៀនស្ថានីយទូរទស្សន៍បាយ័ន។
ចាំមើលតើអ៊ុង វីរៈ និងចាន់ រតនា អាចផ្តួលគូប្រកួតបានដូចការអះអាងដែរ ឬទេ? ខណៈដែលកីឡាករពីររូប (វ៉ែន សុវណ្ណ និងវ៉ោយ សុធន) ក៏ប្រកាសពីការតាំងចិត្តយកឈ្នះគូប្រកួតដែរនោះ ដូច្នេះមានតែរង់ចាំតាមដានទាំងអស់គ្នានាថ្ងៃសៅរ៍ស្អែកនេះ តើអ្នកណាជាតួឯកពិតប្រាកដ ។ ដោយឡែកសម្រាប់គូប្រកួតជាលក្ខណៈមិត្តភាពវិញ កីឡាករចាន់ ប៊ុនឡេក មកពីក្លិបនិរោធមានជ័យ ប៉ះជាមួយកីឡាករផាន ចំណាន មកពីក្លិបរតនគិរី ។ កីឡាការិនីសម សំណាង មកពីក្លិបពន្លឺសាមគ្គីខេត្តបាត់ដំបង ដែលបាត់មុខមួយរយៈ ប្រកួតជាមួយកីឡាការិនីវី អិច មកពីក្លិបអេភូថងកីឡា និងគូចុងក្រោយកីឡាករម៉ន ភិរម្យ មកពីក្លិបព្រែកឯងកីឡា ប្រកួតជាមួយកីឡាករគុន សំណាង មកពីក្លិបខេមរិន្ទកីឡា ៕
ចែករំលែកព័តមាននេះ