ខេត្តបាត់ដំបង ៖ ការប្រឹងប្រែងដោយអំណត់របស់សមត្ថកិច្ចក្នុងការតាមបំបែកសម្បុកក្រុមចោរប្លន់បុគ្គលិកក្រុមហ៊ុនចិនធ្វើថ្នល់នៅស្រុកកំរៀង ទីបំផុតឈានដល់ការចាប់ខ្លួនជនសង្ស័យបានចំនួន៦នាក់ក្នុងចំណោម៧នាក់ កាលពីរសៀលថ្ងៃទី២៩ សីហា ២០១២ ក្នុងនោះកងរាជអាវុធហត្ថក៏ចាប់បានម្នាក់ផងដែរ ។
លោកឈឹម គឹមហុង អធិការស្រុកកំរៀងបានប្រាប់កោះសន្តិភាពថា អំពើប្លន់បុគ្គលិកក្រុមហ៊ុនចិនធ្វើផ្លូវកាលពីរំលងអធ្រាត្រឈានចូលថ្ងៃទី២៩ សីហា នៅភូមិអូរដាលើ ឃុំបឹងរាំង ស្រុកកំរៀង ត្រូវកម្លាំងរបស់លោកដែលដឹកនាំផ្ទាល់ដោយលោកជេត វណ្ណនី ស្នងការរងខេត្តបានស្រាវជ្រាវចាប់ខ្លួនជនសង្ស័យបានចំនួន៥នាក់ជាបន្តបន្ទាប់នៅរសៀលថ្ងៃដដែល ។ រីឯកម្លាំងកងរាជអាវុធហត្ថក៏ចាប់បានបក្សពួកក្រុមនេះបានម្នាក់ដែរ ប៉ុន្តែនៅមានម្នាក់ទៀតកំពុងរត់គេចខ្លួន ។ លោកអះអាងថា សំណុំរឿងនេះចាត់ទុកថា សមត្ថកិច្ចយើងបង្ក្រាបបានស្ទើរទាំងស្រុងហើយ ក្រោយពីកើតហេតុ ។
លោកឈឹម គឹមហុង បានប្រាប់ថា ជនសង្ស័យទាំងនេះ មាន ១-ឈ្មោះសូរ ខ្លឹង អាយុ២២ឆ្នាំ ជាអ្នកបើកបររថយន្តឱ្យក្រុមហ៊ុនចិន និងជាអ្នកផ្តើមគំនិត «ប្លន់» ២-ឈ្មោះស្តើង ជា ហៅដេត អាយុ៣២ឆ្នាំ ៣-ឈ្មោះម៉ៅ ចក់ អាយុ៥០ឆ្នាំ ៤-ឈ្មោះនៅ វីរៈ អាយុ២១ឆ្នាំ ៥-ឈ្មោះតាំង ចិត្រា អាយុ៣០ឆ្នាំ និងម្នាក់ទៀតដែលកម្លាំងកងរាជអាវុធហត្ថចាប់បាននោះឈ្មោះសោម ស៊ីនុច អាយុ២៩ឆ្នាំ ។ លោកបញ្ជាក់ថា ក្រុមនេះត្រូវកម្លាំងរបស់លោកស្រាវជ្រាវចាប់បានជាបន្តបន្ទាប់ក្រោយពីប្រព្រឹត្តបទល្មើស។ លោកបន្តថា អំពើប្លន់នេះផ្តើមគំនិតដោយឈ្មោះសូរ ខ្លឹង ជាអ្នកបើកបររថយន្តឱ្យជនជាតិចិន ដែលរងគ្រោះនោះតែម្តង ដែលជននេះអះអាងថា មិនសប្បាយចិត្ត និងចិនឱ្យស៊ីចុកមិនគ្រប់គ្រាន់ និងខ្ចីប្រាក់តិចតួចមិនបាន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ