រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី៣០ សីហា ២០១២ បានសម្រេចឃុំខ្លួនស្ត្រីម្នាក់ដែលមានតួនាទីជាអ្នកគ្រប់គ្រងក្រុមហ៊ុនវេងស្រេងហុង ដាក់ពន្ធនាគារប៉េហ្ស៊ីជាបណ្តោះអាសន្នរង់ចាំការស៊ើបអង្កេតឈានទៅសវនាការផ្តន្ទាទោស ។
ស្ត្រីអ្នកគ្រប់គ្រងក្រុមហ៊ុននោះមានឈ្មោះហ៊ាន សោភ័ណ្ឌ អាយុ៣២ឆ្នាំ ទីលំនៅផ្ទះលេខ៩ ផ្លូវលេខ៥១៦ សង្កាត់បឹងកក់១ ខណ្ឌទួលគោក រាជធានីភ្នំពេញ ។
ការឃាត់ខ្លួន និងបញ្ជូនស្ត្រីឈ្មោះហ៊ាន សោភ័ណ្ឌ ទៅកាន់សាលាដំបូងរាជធានីភ្នំពេញនេះ ត្រូវបាននគរបាលព្រហ្មទណ្ឌក្រសួងមហាផ្ទៃធ្វើឡើងតាមដីកាបញ្ជាឱ្យចូលខ្លួនរបស់សាលាដំបូងដោយយោងទៅលើពាក្យបណ្តឹងរបស់អ្នកស្រីសៀម ជូ នាយិកាក្រុមហ៊ុនហេងស្រេងហុង ។
ប្រភពព័ត៌មានបានឱ្យដឹងទៀតថា អ្នកស្រី សៀម ជូ មានក្រុមហ៊ុនច្រើន និងជាប់រវល់ការងារមមាញឹកបានសំឡឹងមើលឃើញនាងហ៊ាន សោភ័ណ្ឌ ជាអ្នកគួរឱ្យទុកចិត្ត និងជ្រើសរើសឱ្យឡើងធ្វើជាអ្នកគ្រប់គ្រងក្រុមហ៊ុនរយៈពេល១៤ឆ្នាំមកហើយ ពោលគឺចាប់តាំងពីឆ្នាំ១៩៩៨ មកម៉្លេះ ។ កន្លងមកក្រុមហ៊ុនបានបើកដៃឱ្យនាងចាត់ចែងការងារទាំងអស់នៅក្នុងក្រុមហ៊ុនហេងស្រេងហុង និងចាត់ចែងបុគ្គលិកទូទៅផង តែគ្មានតួនាទីទទួលប្រាក់ចំណូលចំណាយទេ ។ រហូតដល់ថ្ងៃទី២៥ កក្កដា ២០១២ នេះ ដោយសារប្រាក់ចំណូលត្រូវថយចុះ និងមានការសង្ស័យអំពីការបាត់បង់ប្រាក់មិនប្រក្រតីនោះ អ្នកស្រីនាយិកាក្រុមហ៊ុនក៏បានកោះប្រជុំជាមួយអ្នកគ្រប់គ្រង និងអ្នកទទួលខុសត្រូវតាមផ្នែក តាមជំនាញ រហូតរកឃើញការកិបកេងប្រាក់ជិត១លានដុល្លារ ហើយក៏ឈានទៅធ្វើការឃាត់ខ្លួនតែម្តង។
ការចោទប្រកាន់ និងការឃាត់ខ្លួនអ្នកស្រីហ៊ាន សោភ័ណ្ឌ នេះ កោះសន្តិភាពបានស្វែងរកការបំភ្លឺពីភាគីជនជាប់ចោទផងដែរ ប៉ុន្តែពុំអាចសុំការបំភ្លឺបាន…។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ