អាជីពវាយកូនបាល់ឯកត្តជនរបស់នាងគីម ឃ្លីស្ទ័របានមកដល់ទីបញ្ចប់ដូចដែលនាងប៉ងប្រាថ្នាហើយ ប៉ុន្តែគ្រាន់តែការបញ្ចប់នេះវាមិនដូចបំណងដែលនាងចង់បានពីមុននោះ ។ ម្ចាស់ពាន Grand Slam៤ជំនាន់រូបនេះកាលពីថ្ងៃពុធទី២៩សីហាបានបរាជ័យក្រោមថ្វីដៃកីឡាការិនីវ័យ១៨ឆ្នាំរបស់អង់គ្លេស Laura Robsonក្នុងលទ្ធផល ៧-៦និង៧-៦ធ្លាក់ចេញពីជុំទី២ក្របខណ្ឌ U.S Open។ កីឡាការិនីបែលហ្ស៊ិករូបនេះនឹងចូលនិវត្តន៍បន្ទាប់ពីបញ្ចប់ការប្រកួតវាយគូនៅទីលាន Flushing Meadows។
នាងឃ្លីស្ទ័រធ្លាប់បានចូលនិវត្តន៍ម្តងរួចមកហើយកាលពីខែឧសភា ឆ្នាំ ២០០៧ហើយត្រឡប់ចូលប្រកួតជាថ្មី២ឆ្នាំកន្លះក្រោយមក ។ ពេលនេះស្ថិតក្នុងវ័យ២៩ឆ្នាំនិងជាម្តាយក្មេងម្នាក់ផងនោះ នាងបានប្រកាសថា លទ្ធផលប្រកួតក្នុងក្របខណ្ឌធំ U.S Openគឺជាការកាត់សេចក្តីនិងជាក្របខណ្ឌធំចុងក្រោយក្នុងអាជីពរបស់នាង ។
ថ្លែងក្នុងភាពរលីងរលោងទឹកភ្នែក នាងបានបញ្ជាក់ថា ៖«វាជាកន្លែងដែលបាននាំឱ្យខ្ញុំធ្វើរឿងរ៉ាវបានល្អនិងអស្ចារ្យមួយចំនួន ។ វាពិតជាពិបាកពន្យល់ពីមូលហេតុ ។ នេះជាទីកន្លែងល្អមួយសម្រាប់ការចូលនិវត្តន៍ ប៉ុន្តែអ្វីដែលខ្ញុំចង់បានគឺមិនមែននៅថ្ងៃនេះទេ »។
ការបរាជ័យកាលពីថ្ងៃពុធបានបញ្ចប់នូវជ័យជម្នះ២២ប្រកួតបន្តបន្ទាប់គ្នារបស់នាងឃ្លីស្ទ័រនៅក្នុងទីក្រុងញូវយ៉កដោយក្នុងនោះបូករួមទាំងជ័យជម្នះពានជើងឯកឆ្នាំ ២០០៥, ២០០៩និង២០១០ហើយនឹងជ័យជម្នះក្នុងជុំទី១កាលពីថ្ងៃចន្ទសប្តាហ៍នេះផងដែរ ។
ឃ្លីស្ទ័របានខកខានការប្រកួតក្របខណ្ឌ U.S Openឆ្នាំ២០០៤, ២០០៦, ២០០៧,២០០៨និងឆ្នាំ ២០១១ដោយសាតែមានរបួសនិងឈប់សម្រាកកសាងគ្រួសារ ។កូនស្រីរបស់នាងឈ្មោះ Jadaកើតនៅខែកុម្ភៈឆ្នាំ២០០៨ ។ ខែសីហាឆ្នាំ២០០៩ នាងបានវិលចូលប្រកួតក្នុងក្របខណ្ឌ Tourជាថ្មី ។ បើទោះជានាងគ្មានចំណាត់ថ្នាក់ក៏ដោយ តែនាងបានយកឈ្នះពានជើងឯក U.S Openឆ្នាំនោះផងដែរ ។ នៅមុនចូលរួមក្នុង U.S Open ឃ្លីស្ទ័រប្រកួតបានតែ២កម្មវិធីប៉ុណ្ណោះ ។
នាងបានថ្លែងថា៖«ចាប់តាំងពីការចូលនិវត្តន៍លើកដំបូង សម្រាប់គ្រួសារខ្ញុំវាបានក្លាយជាការផ្សងព្រេងដ៏អស្ចារ្យមួយ ។ អ្វីទាំងនោះពិតជាមានតម្លៃ ប៉ុន្តែខ្ញុំក៏ត្រូវសម្លឹងមើលជីវិតរបស់ខ្ញុំទៅថ្ងៃអនាគត »។ គីម ឃ្លីស្ទ័រទទួលបរាជ័យលើកដំបូងលើទីលាន Flushing Meadowsនៅថ្ងៃទី៦ខែកញ្ញាឆ្នាំ ២០០៣ក្រោមថ្វីដៃកីឡាការិនីមិត្តរួមជាតិនាងយ៉ាស្ទីន ហេនីន ។ កាលនោះនាង Robsonមានអាយុទើបតែ៩ឆ្នាំប៉ុណ្ណោះ ។
ស្ថិតក្នុងចំណាត់ថ្នាក់ពិភពលោកទី៨៩ នាង Robsonត្រូវបានមើលឃើញក្នុងនាមជាកីឡាការិនីដែលនឹងលេចធ្លោនៅថ្ងៃខាងមុខ ។ បច្ចេកទេសប្រកួតប្រើដៃឆ្វេងដ៏ឥតខ្ចោះនឹងជួយនាងឱ្យបន្តការប្រកួតបានយូរទៅមុខទៀតក្នុងក្របខណ្ឌ U.S Openឆ្នាំនេះ ។ បើទោះជាយ៉ាងនេះក្តី រហូតមកទល់នឹងពេលនេះ Robsonមិនទាន់បានយកឈ្នះច្រើនជាង១ប្រកួតក្នុងក្របខណ្ឌធំ Grand Slamនៅឡើយទេ ។ ថ្លែងបន្ទាប់ពីបញ្ចប់ការប្រកួតជាមួយនាងឃ្លីស្ទ័រលើកនេះ Robsonបានបញ្ជាក់ថា ៖«ខ្ញុំសូមថ្លែងអំណរគុណដល់នាងគីម ឃ្លីស្ទ័រដែលនាងគឺជាគំរូល្អមួយសម្រាប់ខ្ញុំជាយូរមកហើយ »។
ចូលរួមក្តីរីករាយជាមួយនាង Robsonក្នុងពេលជាមួយគ្នាដែរនោះ គឺកីឡាការិនីអាមេរិក Mallory Burdette ។ Burdette ដែលទើបតែចូលរួមប្រកួតក្នុងក្របខណ្ឌធំជាលើកដំបូងបានឈានចូលដល់ជុំទី៣បន្ទាប់ពីនាងយកឈ្នះកីឡាការិនីលំដាប់ទី៦៩ពិភពលោក Lucie Hradeckaក្នុងលទ្ធផល ៦-២និង៦-៤ ។ នៅជុំបន្ទាប់ កីឡាការិនីលំដាប់ទី២៥២ពិភពលោករូបនេះនឹងជួបជាមួយនាងម៉ារីយ៉ា សារ៉ាប៉ូវ៉ាឬនាង Lourdes Dominguez Lino។
កីឡាការិនីចិនលីណាក៏បានឈានចូលដល់ជុំទី៣ផងដែរបន្ទាប់ពីបានបំបាក់កីឡាការិនីអូស្ត្រាលី Casey Dellacquaក្នុងលទ្ធផល ៦-៤និង៦-៤ ។ កីឡាការិនីលំដាប់ទី៩ក្នុងកម្មវិធីរូបនេះមិនដែលមានប្រវត្តិឆ្លងផុតវគ្គ១/៤ផ្តាច់ព្រ័ត្រនៅទីក្រុងញូវយ៉កនេះទេ ៕
ចែករំលែកព័តមាននេះ