រាជធានីភ្នំពេញ ៖ សម្តេចព្រះមហាសុមេធាធិបតី នន្ទ ង៉ែត សម្តេចព្រះសង្ឃនាយកនៃព្រះរាជាណាចក្រកម្ពុជា ព្រះចៅអធិការវត្តបទុមវតីបានចូលវះកាត់នៅមន្ទីរពេទ្យកាល់ម៉ែត កាលពីព្រឹកថ្ងៃទី៣០ សីហា ២០១២ ដោយសារអាការរោគក្រពះ បើទោះជាសម្តេចទើបនឹងមកពីពិនិត្យ និងព្យាបាលនៅប្រទេសសិង្ហបុរីក៏ដោយ ។
ប្រភពព័ត៌មានពីមន្ត្រីសង្ឃ ដែលគង់នៅវត្តបទុមវតី បានឱ្យដឹងថា បន្ទាប់ពីសម្តេចព្រះសង្ឃនាយកយាងនិមន្តទៅប្រទេសសិង្ហបុរី ដើម្បីពិនិត្យ និងសម្រាកព្យាបាលអាការរោគក្រពះ កាលពីថ្ងៃទី២៥ សីហា ២០១២ ក្រោយមកព្រះរាជសុខភាពរបស់ព្រះអង្គបានធូរស្បើយ ព្រះអង្គក៏យាងមកប្រទេសកម្ពុជាវិញ ស្រាប់តែនៅព្រឹកថ្ងៃទី២៩ សីហា ២០១២ ឃើញគេជូនព្រះអង្គទៅកាន់មន្ទីរពេទ្យកាល់ម៉ែតយ៉ាងប្រញាប់ប្រញាល់ដោយឱ្យព្រះអង្គគង់នៅបន្ទប់លេខ០៥៥នៃអគារវះកាត់ «ក» ។
គ្រូពេទ្យមួយរូបនិយាយក្នុងន័យសុំមិនឱ្យបញ្ចេញឈ្មោះបានបង្ហើបឱ្យដឹងថា នៅព្រឹកថ្ងៃទី៣០ សីហា ២០១២ សម្តេចព្រះមហាសុមេធាធិបតី នន្ទ ង៉ែតបានវះកាត់រួចរាល់ហើយ ព្រះរាជសុខភាពរបស់ព្រះអង្គមិនមានបញ្ហាធ្ងន់ធ្ងរនោះទេ ហើយព្រះអង្គមិនមានអាការរោគផ្សេងក្រៅពីបញ្ហាក្រពះនោះឡើយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ