ខេត្តកំពត ៖ ចោរប្លន់ប្រដាប់ដោយកាំភ្លើងខ្លី៥នាក់បានធ្វើសកម្មភាពចូលប្លន់ផ្ទះប្រជាពលរដ្ឋមួយគ្រួសារ ស្ថិតក្នុងភូមិវត្តអង្គ ឃុំព្រៃឃ្មុំ ស្រុកទឹកឈូ កាលពីវេលាម៉ោង៨យប់ថ្ងៃទី២៨ សីហា ២០១២ ខណៈពេលម្ចាស់ផ្ទះកំពុងអង្គុយមើលទូរទស្សន៍នៅក្នុងផ្ទះ ។
មន្ត្រីនគរបាលស្រុកទឹកឈូ បានឱ្យដឹងថា ម្ចាស់ផ្ទះដែលត្រូវចោរប្លន់ប្តីឈ្មោះនី ឈីវ អាយុ៤៩ឆ្នាំ ប្រពន្ធឈ្មោះសោ សៀប អាយុ៤៩ឆ្នាំ មានទីលំនៅភូមិកើតហេតុខាងលើ ។ នគរបាលបន្តទៀតថា នៅថ្ងៃកើតហេតុម្ចាស់ផ្ទះពីរនាក់ប្តីប្រពន្ធនេះពុំបាននៅផ្ទះទេ មានតែម្តាយចាស់ជរាម្នាក់ និងកូនៗពីរនាក់ និងអ្នកជិតខាងម្នាក់កំពុងអង្គុយមើលទូរទស្សន៍ក្នុងផ្ទះ ។ តាមសម្តីកូនម្ចាស់ផ្ទះ និងម្តាយបានរៀបរាប់ប្រាប់សមត្ថកិច្ចឱ្យដឹងថា មុនពេលកើតហេតុអ្នកនៅក្នុងផ្ទះទាំងអស់គ្នាកំពុងអង្គុយមើលទូរទស្សន៍ ស្រាប់តែឮសំឡេងឆ្កែព្រុស ខណៈនោះកូនប្រុសម្ចាស់ផ្ទះក៏បានចេញមកមើលពុំឃើញមានអ្វីក៏ចូលក្នុងផ្ទះវិញ ។ មិនទាន់ទាំងអង្គុយផង ស្រាប់តែមានមនុស្ស៥នាក់សម្រុកចូលមកពីក្រោយដោយ៣នាក់ប្រដាប់ដោយកាំភ្លើងខ្លីកាន់នៅនឹងដៃ ពេលនោះពួកវាបានចាប់ស្ត្រីចំណាស់ត្រូវជាម្តាយម្ចាស់ផ្ទះ និងជាជីដូនយកស្កុតផ្លាស្ទិចបិទមាត់កុំឱ្យស្រែក ហើយគំរាមអ្នកនៅក្នុងផ្ទះទាំងប៉ុន្មានឱ្យដេកផ្កាប់មុខទាំងអស់គ្នារួចពួកវាក៏ចូលរើកកាយពេញក្នុងផ្ទះប្រមូលយកមាសប្រាក់គេចខ្លួនបាត់អស់ទៅ ។
តាមសម្តីស្ត្រីជាប្រពន្ធម្ចាស់ផ្ទះបានរៀបរាប់ប្រាប់សមត្ថកិច្ចថា ទ្រព្យសម្បត្តិដែលបាត់បង់មានមាស៣តម្លឹង៦ជី, ប្លាទីន៦ជី លុយដុល្លារ៩.០០០ដុល្លារ លុយខ្មែរ៨លានរៀល សរុបជាង២ម៉ឺនដុល្លារ ។ ទោះបីបែបណា សមត្ថកិច្ចពុំទាន់កំណត់មុខសញ្ញា និងអត្តសញ្ញាណជនសង្ស័យបាននៅឡើយទេ ដោយពេលនេះសមត្ថកិច្ចកំពុងធ្វើការស្រាវជ្រាវ ដើម្បីកំណត់មុខសញ្ញាជនសង្ស័យឱ្យខាងតែបាននាពេលដ៏ខ្លីខាងមុខនេះដើម្បីចាប់មកផ្តន្ទាទោសតាមច្បាប់ ៕
ចែករំលែកព័តមាននេះ