រាជធានីភ្នំពេញ ៖ មានការលេចឮថាលោកយុត្ថារ៉ា ឆានី និងអ្នកនាងចនចាន់លក្ខិណា ដែលជាគូស្វាមីភរិយា តារាធ្លាប់ទទួលការសរសើរថាមានចំណងស្នេហ៍រឹងមាំយូរអង្វែងនោះ ឥឡូវនេះរស់នៅបែកផ្ទះគ្នា គឺជាសញ្ញានៃការប្រេះឆាឈានទៅលែងលះគ្នា ។
តើរឿងនេះជាការពិតទេ ?
តាមប្រភពស្និទ្ធស្នាលជាមួយលោកយុត្ថារ៉ា ឆានី ឱ្យដឹងថា សព្វថ្ងៃលោកឆានី និងភរិយារស់នៅបែកគ្នា ។ ចំពោះមូលហេតុគឺមកពីលោកឆានីប្រចណ្ឌ និងអន់ចិត្តអ្នកនាង ចន ចាន់លក្ខិណា ខណៈនាងចូលចិត្តដើរលេងសប្បាយរហូតយប់ជ្រៅ ។កាលពីថ្ងៃទី២៧ សីហា ឆ្នាំ២០១២ ភ្នាក់ងារកោះសន្តិភាពព្យាយាមទាក់ទងទៅលោកយុត្ថារ៉ា ឆានី តាមទូរសព័ព្ទសុំឱ្យជួយបំភ្លឺជុំវិញរឿងលេចឮថា លោក និងភរិយារស់នៅបែកផ្ទះគ្នានេះ ដើម្បីឱ្យមានភាពប្រាកដប្រជា ចៀសវាងការចោទថាចុះផ្សាយដោយមិនសួរសាមីខ្លួន ប៉ុន្តែលោកពុំព្រមបកស្រាយទេ ។
ផ្ទុយទៅវិញលោកបញ្ចេញអារម្មណ៍ឆេវឆាវ ប្រហែលមកពីលោកមានរឿងបែបនោះមែនឬ? បើគ្មានរឿងបែបនោះលោកទំនងមិនខឹង ហើយបកស្រាយដោយរីករាយហើយ ។ ជាទូទៅអ្នកសិល្បៈជើងចាស់តែងតែរួសរាយ រាក់ទាក់ជាមយយអ្នកយកព័ត៌មានគួរឱ្យចូលចិត្ត គឺមិនឆ្មើងឆ្មៃទេ។ ចំពោះរឿងរបស់លោកយុត្ថារ៉ា ឆានី ដោយលោកមិនបកស្រាយ ដូច្នេះយើងក៏មិនហ៊ានសន្និដ្ឋានថាជាការពិត ឬយ៉ាងណាដែរ ។ យើងនៅតែសរសើរលោកជាតារាដ៏ភ្លឺចែងចាំង ហើយសង្ឃឹមថាលោកនឹងសម្រួលអារម្មណ៍ឱ្យរីករាយបំភ្លឺការពិត ជាអ្វីដែលមហាជនចង់ដឹង ព្រោះលោកជាបុគ្គលសាធារណៈ ហើយយើងក៏មិនជឿថាលោកចង់ឱ្យសារព័ត៌មានផ្សាយពីលោកដោយមិនបានសួរនាំលោកដែរ ។
ចំណែកអ្នកនាងចន ចាន់លក្ខិណា វិញ ពេលអ្នកយកព័ត៌មានយើងទាក់ទងសួរនាំតាមទូរស័ព្ទ បានអះអាងថា ប្តី-ប្រពន្ធនាងមិនដែលមានបញ្ហាជាមួយគ្នាទេ ។ ប្តី-ប្រពន្ធ នាងមិនរស់នៅបែកគ្នាដូចការលេចឮនោះទេ តែនាងទទួលស្គាល់ថា ពួកនាងបានជួបមុខគ្នាតែពេលល្ងាចប៉ុណ្ណោះ ព្រោះរវល់ធ្វើការងាររៀងខ្លួន ។ ម៉្យាងទៀតពួកនាងមានរថយន្តតែមួយ ដូច្នេះលោកឆានី មិនអាចជូននាងទៅធ្វើការ ឬទៅទទួលនាងញឹកញាប់ទេ ព្រោះលោករវល់ណាស់ ។ ក្នុងស្ថានភាពបែបនេះ ពេលខ្លះនាងទៅធ្វើការជាមួយម្តាយ ពេលខ្លះទៅជាមួយមិត្តភក្តិ ។
តារាភាពយន្តនាងខ្ពស់ស្រឡះនេះ បញ្ជាក់ថា ដោយសារស្ថានភាពរស់នៅរបស់ប្តី-ប្រពន្ធនាងបែបនោះហើយ ទើបអ្នកដទៃយល់ច្រឡំមកលើពួកនាង ។ ទាក់ទិននឹងរឿងនាងចូលចិត្តដើរលេងយប់ជ្រៅ នាំឱ្យលោកឆានីអន់ចិត្ត និងប្រចណ្ឌនោះ អ្នកនាងចន ចាន់លក្ខិណា អះអាងថាវាក៏មិនពិតដែរ។អ្នកនាងចន ចាន់លក្ខិណា និងលោកយុត្ថារ៉ា ឆានី រៀបអាពាហ៍ពិពាហ៍ជាមួយគ្នានៅឆ្នាំ១៩៩៩ និងទទួលបានចំណងដៃស្នេហាកូនស្រីម្នាក់ ។ គូស្នេហ៍នេះធ្លាប់ទទួលបានការលើកសរសើរថា ជាគូស្នេហ៍មានចិត្តស្មោះ និងជាប្តី-ប្រពន្ធគំរូនៅក្នុងចង្កោមអ្នកសិល្បៈ ។ នៅឆ្នាំ២០១២នេះ ស្រាប់តែបែកធ្លាយព័ត៌មានថាអ្នកទាំងពីរមានទំនាស់ជាមួយគ្នារហូតដល់លោកឆានីចាកចេញពីផ្ទះទៅគេងនៅខាងក្រៅ ។ កន្លងមកអ្នកនាងចន ចាន់លក្ខិណា ធ្លាប់ទទួលស្គាល់ថាស្វាមីរបស់នាងគេងនៅក្រៅផ្ទះមែន ប៉ុន្តែមិនមែនមានទំនាស់ជាមួយគ្នាទេគឺមកពីស្វាមីនាងមានមុខជំនួញ ហើយដោយខ្លាចនាងពិបាករង់ចាំបើកទ្វារក៏ទៅគេងនៅខុនដូ ឬសណ្ឋាគារយូរៗម្តងទេ មិនមែនជាប្រចាំឡើយ ។
ទោះបីជាលោកយុត្ថារ៉ា ឆានី មិនបកស្រាយ ឯអ្នកនាងចន ចាន់លក្ខិណា បដិសេធ តែតាមប្រភពជិតស្និទ្ធ លោកឆានី និយាយថា អ្នកទាំងពីរមានភាពរកាំរកូសនឹងគ្នា ហើយតាមស្ថានភាពបែបនេះអាចឈានទៅដល់ការលែងលះគ្នានាពេលខាងមុខ ។នេះគ្រាន់តែជាប្រភពអះអាងមួយប៉ុណ្ណោះ ប៉ុន្តែអ្វីដែលសំខាន់គឺការអះអាងរបស់សាមីខ្លួនផ្ទាល់លោកយុត្ថារ៉ា ឆានី និងអ្នកនាងចន ចាន់លក្ខណា ។ អ្នកគាំទ្រគូស្វាមី-ភរិយាមួយគូនេះច្រើននាក់ចង់ឃើញអ្នកទាំងពីរនៅតែជាគូស្នេហ៍តារាមានភាពល្អូកល្អិននឹងគ្នាមិនចេះសាបសូន្យ គឺមិនចង់ឃើញការបែកបាក់គ្នាទេ ៕
ចែករំលែកព័តមាននេះ