រាជធានីភ្នំពេញ ៖ ក្រុមហ៊ុនQool (ឃូល)ដែលជាក្រុមហ៊ុនធំ មានសិទ្ធិស្របច្បាប់នាំចូល និងចែកចាយទូរស័ព្ទដៃHTCនៅក្នុងទីផ្សារនៃព្រះរាជាណាចក្រកម្ពុជា រួមសហការជាមួយនឹងសាកលវិទ្យាល័យបៀលប្រាយរៀបចំឡើងនូវសិក្ខាសាលាមួយស្តីពីបច្ចេកវិទ្យាថ្មីរបស់ទូរស័ព្ទ HTC One Series ដែលរួមមានដូចជា HTC One X ,One S និង One V ។
សិក្ខាសាលានេះធ្វើនៅថ្ងៃទី២១ សីហា ឆ្នាំ២០១២ ចាប់ផ្តើមពីម៉ោង១០ព្រឹករហូតដល់ម៉ោង១១និង៣០នាទីថ្ងៃត្រង់ដោយទទួលបាននូវការអញ្ជើញចូលរួមជាអធិបតីពីលោក មាស រ៉េនរិទ្ធ ជាសាកលវិទ្យាធិការរងនៃសាកលវិទ្យាល័យបៀលប្រាយ និងលោក ខ្លូត ពិសិដ្ឋ ប្រធានផ្នែកលក់របស់ក្រុមហ៊ុនQool (ឃូល)រួមទាំងនិស្សិត និងសាស្ត្រាចារ្យចំនួនជាង១០០នាក់ ។
ក្រុមហ៊ុនQool(ឃូល)បានបញ្ជាក់ឱ្យដឹងថា គោលបំណងសំខាន់នៃការរៀបចំឡើងនូវសិក្ខាសាលានេះ គឺដើម្បីធ្វើការចែករំលែកនូវចំណេះដឹង បទពិសោធន៍ ព្រមទាំងបច្ចេកវិទ្យាទំនើបៗ ដែលមាននៅក្នុងទូរស័ព្ទHTC One Series ជូនដល់និស្សិត និងសាស្ត្រាចារ្យទាំងអស់នៃសាកលវិទ្យាល័យ បៀលប្រាយ ដើម្បីឱ្យពួកគាត់បានសិក្សាស្វែងយល់កាន់តែច្បាស់ និងធ្វើតេស្តដោយផ្ទាល់មុននឹងសម្រេចជ្រើសរើសប្រើប្រាស់ផលិតផលនីមួយៗ ពីព្រោះថា សព្វថ្ងៃនេះទូរស័ព្ទដៃHTC One Series គឺមិនត្រឹមតែមានការពេញនិយមពីសំណាក់អ្នកប្រើប្រាស់ជាច្រើននៅប្រទេសកម្ពុជានោះទេ នៅលើពិភពលោកក៏កំពុងតែមានការពេញនិយមយ៉ាងខ្លាំងផងដែរ ។ ឆ្លៀតក្នុងឱកាសនោះដែរ ក្រុមហ៊ុនក៏មានរៀបចំកម្មវិធីសំណួរចម្លើយជាមួយនឹងចំណេះដឹងនានា ដែលទាក់ទងទៅនឹងបច្ចេកវិទ្យាទំនើបៗដែលមាននៅក្នុងទូរស័ព្ទHTC One Series ហើយអ្នកដែលឆ្លើយត្រូវ ក្រុមហ៊ុនQool បានផ្តល់ជូននូវកាដូអនុស្សារីយ៍ជាច្រើន ។
ក្រុមហ៊ុនQool(ឃូល)បានបញ្ជាក់ឱ្យដឹងបន្ថែមទៀតថា បន្ទាប់ពីសិក្ខាសាលានេះនៅពេលថ្ងៃត្រង់ទី២១ សីហា ឆ្នាំ២០១២ ក្រុមហ៊ុនបានរៀបចំឡើងនូវកម្មវិធីពិសេសៗជាច្រើនសម្រាប់និស្សិត និងសាស្ត្រាចារ្យនៅសាកលវិទ្យាល័យបៀលប្រាយ រហូតដល់ថ្ងៃទី២២ សីហា ឆ្នាំ២០១២ ពេញមួយថ្ងៃតែម្តង នៅក្នុងនោះរួមមានដូចជា កម្មវិធីលក់ជាកញ្ចប់ទៅលើទូរស័ព្ទដៃHTC One Series ដែលជាមួយនឹងការជាវទូរស័ព្ទមួយគ្រឿងនៅក្នុងចំណោមម៉ូដែលទាំងនេះ ទទួលបាននូវការបន្ថែមកាសស្តាប់ត្រចៀកBeat Solo (Original) ដ៏ស្រស់ស្អាតចំនួនមួយ ដែលកម្មវិធីនេះគឺផ្តល់ជូនសម្រាប់តែនិស្សិត និងសាស្ត្រាចារ្យនៃសាកលវិទ្យាល័យបៀលប្រាយតែប៉ុណ្ណោះ ៕
ចែករំលែកព័តមាននេះ