ខេត្តបាត់ដំបង ៖ វគ្គបណ្តុះបណ្តាលដល់ម្ចាស់គ្រប់គ្រងសិប្បកម្មផលិតចំណីអាហារដែលប្រារព្ធធ្វើនៅសណ្ឋាគារសេងហួត ក្នុងក្រុងបាត់ដំបង រយៈពេល៣ថ្ងៃ បានបញ្ចប់កាលពីថ្ងៃទី២៤ សីហា ក្រោមការរៀបចំរបស់ក្រសួងសុខាភិបាល និងជួយសម្រួលពីអាជ្ញាធរ និងមន្ទីរសុខាភិបាលខេត្ត ។
ចូលរួមក្នុងពិធីនោះមានលោកទេព លន់ អគ្គនាយកបច្ចេកទេសក្រសួងសុខាភិបាល លោកស្រី ស៊ីម ម៉ារី អភិបាលរងខេត្ត លោកឱសថបណ្ឌិត វឿង បុនរេត អនុប្រធានមន្ទីរសុខាភិបាលខេត្ត និងម្ចាស់សិប្បកម្មផលិតចំណីអាហារមាន អាហារដ្ឋាន ភោជនីយដ្ឋាន ចុងភៅម្ហូបបុណ្យ និងមង្គលការ សិប្បកម្មផលិតទឹកបរិសុទ្ធ និងសិប្បករផ្សេងៗទៀតសរុបប្រមាណ៥០នាក់ ។
លោកហាប់ សារ៉ាវុធ អ្នកគ្រប់គ្រងកម្មវិធីបានរាយការណ៍ពីការបណ្តុះបណ្តាលកន្លងមកនេះ គឺទទួលបានផលទ្ធផលល្អ៧ចំណុចសំខាន់ៗដូចជា ១-ការត្រួតពិនិត្យធានាសុវត្ថិភាពលើចំណីអាហារដែលបានផលិតរួច ២-ការចម្លងមេរោគពីគ្រប់ទង្វើទាំងអស់ទៅលើចំណីអាហារកំពុងផលិត និងផលិតរួច ៣-ការថែរក្សាអនាម័យគ្រប់ទីកន្លែងក្នុងការផលិត ៤-ការវិភាគទៅលើចំណីអាហារឱ្យដឹងពីកម្រិតមេរោគ និងមានសារធាតុគីមី ៥-ការរៀបចំឱ្យមានអនាម័យជុំវិញទាំងទីតាំងផលិត និងកន្លែងបរិភោគ ៦-វិធីសម្លាប់មេរោគទៅលើបន្លែ ត្រីសាច់ មុនយកមកផលិតជាចំណីអាហារ និង៧-ត្រួតពិនិត្យឧបករណ៍របស់សិប្បកម្មឱ្យមានអនាម័យក្នុងការផលិតចំណីអាហារ ។
លោកស្រី ស៊ីម ម៉ារី អភិបាលរងខេត្ត បានថ្លែងថា ក្នុងនាមអាជ្ញាធរសុំគាំទ្រជួយលើកទឹកចិត្តបន្ថែមទៀតក្នុងកម្មវិធីរបស់ក្រសួងសុខាភិបាលនេះ ដែលបានគិតគូរពីបញ្ហាសុខុមាលភាពរបស់ប្រជាពលរដ្ឋទូទៅឱ្យមានសុខភាពល្អក្នុងការផលិត និងការបរិភោគចំណីអាហារដែលយើងត្រូវការរៀងរាល់ថ្ងៃនេះ ។ លោកស្រីបន្តថា វាមិនត្រឹមតែទទួលបានគុណភាពប៉ុណ្ណោះទេ គឺត្រូវការសោភ័ណភាពបន្ថែមទៀត និងមានអនាម័យយ៉ាងខ្ពស់បំផុត ហើយនាំគ្នាលុបបំបាត់នូវសម្ភារណាដែលយកមកប្រើប្រាស់ក្នុងការវេចខ្ចប់ចំណីអាហារអាចមានសារធាតុគីមីទៅលើចំណីអាហារ និងគ្រោះថ្នាក់ដល់សុខភាពទៅថ្ងៃក្រោយដោយមិនដឹងខ្លួន ។
លោកទេព លន់ អគ្គនាយកបច្ចេកទេសនៃក្រសួងសុខាភិបាលថ្លែងថា បច្ចុប្បន្ននេះរាជរដ្ឋាភិបាលបាននិងកំពុងជំរុញ និងកែប្រែពីទម្លាប់ដើមមកឱ្យមានការរៀបចំអនាម័យល្អទៅលើការផលិត ការហូបចុកជារួម ព្រមទាំងសោភ័ណភាពផងដែរ ដើម្បីចូលរួមប្រឡងប្រណាំងទីក្រុងស្អាត មានពណ៌បៃតងនៅក្នុងប្រទេសកម្ពុជា។ជាមួយនេះរៀបចំឱ្យមានច្បាប់ផលិតចំណីអាហារតាមអាហារដ្ឋាននានាពីពេលនេះដល់ឆ្នាំ២០១៥ ឱ្យមានអនាម័យល្អ ដើម្បីរួមចំណែកអូសទាញភ្ញៀវទេសចរទាំងជាតិ និងអន្តរជាតិបន្ថែមទៀតដោយទទួលបានទាំងគុណភាព សោភ័ណភាព និងអនាម័យល្អគ្រប់ទីកន្លែង ៕
ចែករំលែកព័តមាននេះ