ខេត្តតាកែវ ៖ បុរសជាឪពុកចុងម្នាក់បានរងរបួសធ្ងន់ហើយត្រូវបានក្រុមគ្រួសារបញ្ជូនមកសង្គ្រោះនៅមន្ទីរពេទ្យបង្អែកខេត្ត តែដោយសារស្ថានភាពរបួសធ្ងន់ពេកក៏បានស្លាប់ទៅនៅ ២ថ្ងៃក្រោយមក ។ ការរងរបួសធ្ងន់រហូតដល់ស្លាប់នេះ គឺដោយសារកូនប្រុសវាយព្រោះទ្រាំមិនបាននឹងការវាយធ្វើបាបម្តាយនិងកូនរាល់ថ្ងៃឱ្យតែស្រវឹង ឯកូនប្រុសដែលវាយឪពុកចុងស្លាប់នេះក៏បានរត់គេចខ្លួនបាត់ដែរ ។ ហេតុការណ៍នៃអំពើហិង្សានេះ បានកើតឡើងកាលពីព្រលប់ថ្ងៃទី២៧ សីហា នៅភូមិក្រាំងដៃ ឃុំធ្លក ស្រុកទ្រាំង ។
លោកទៀង ម៉ាលី អធិការនគរបាលស្រុកទ្រាំងឱ្យដឹងថា ឪពុកចុងដែលស្លាប់នេះ ឈ្មោះប៊ុន ប៊ន អាយុ៤៨ឆ្នាំ ប្រពន្ធឈ្មោះលឹម ហេង អាយុ៤៧ឆ្នាំ មានកូន៣នាក់ក្នុងនោះកូនប្តីមុនម្នាក់ ។ ក្រុមគ្រួសារមួយនេះមិនសូវមានសុភមង្គលទេ ព្រោះតែបុរសជាប្តីពេលស៊ីផឹកស្រវឹងត្រឡប់មកដល់ផ្ទះវិញតែងតែវាយបំផ្លាញទ្រព្យសម្បត្តិក្នុងផ្ទះនិងវាយធ្វើបាបប្រពន្ធកូនមិនដែលខានឡើយ ។ មុនពេលកើតហេតុ កាលពីថ្ងៃទី២៧ សីហា វេលាម៉ោង៦និង៣០នាទីល្ងាច ខណៈម្តាយនិងកូនកំពុងនៅក្នុងផ្ទះ ស្រាប់តែបុរសជាប្តីបានជេរទាំងស្រវឹងជោក ។ ពេលនោះដែរ កូនប្រុសឈ្មោះជ្រន ផារិន អាយុ១៧ឆ្នាំ ដែលធ្វើកម្មករនៅភ្នំពេញមកលេងផ្ទះឃើញឪពុកដើរចូលផ្ទះក៏សុំលុយ៥ម៉ឺនរៀលដើម្បីធ្វើសោហ៊ុយត្រឡប់ទៅធ្វើការងារវិញ តែឪពុកថាគ្មាន ព្រមទាំងហក់ទៅដាល់មុខកូនប្រុសនោះ២ទៅ៣ដៃធ្វើឱ្យប្រពន្ធកូនភ័យខ្លាចបាននាំគ្នារត់ចេញពីផ្ទះអស់ ។ ភ្លាមៗនោះដែរឪពុករូបនេះបានកាន់ពូថៅឡើងទៅលើផ្ទះហើយវាយបំផ្លាញទូរទស្សន៍១គ្រឿង និងធុងទឹកកក១ រួចស្រែកហៅប្រពន្ធឱ្យត្រឡប់មកចូលផ្ទះវិញនិងព្រមានថាបើមិនចូលផ្ទះទេនឹងដុតផ្ទះចោល ។ លុះពេលប្រពន្ធដើរចូលផ្ទះក៏ត្រូវប្តីនោះចាប់បោចសក់អុកទៅនឹងដីនិងយកពូថៅវាយពីក្រោយ ឯកូនប្រុសឃើញក៏រត់មកជួយម្តាយរបស់ខ្លួនដោយរុញឪពុក ឱ្យដួលផ្កាប់មុខទៅលើដី រួចយកមែកប្រេងខ្យល់វាយកញ្ចឹងកនិងខ្នងបណ្តាលឱ្យរងរបួសរហូតងើបលែងរួច ។ ពេលឃើញឪពុកងើបលែងរួច កូនប្រុសរូបនោះមានការភ័យខ្លាចក៏រត់បាត់តែម្តង ។
ស្ត្រីជាប្រពន្ធឈ្មោះលឹម ហេង និយាយរៀបរាប់ថា គាត់មានប្តីមុនមានកូនប្រុសម្នាក់ឈ្មោះជ្រន ផារិន នេះ តែបានលែងលះគ្នានិងមកយកប្តីរាល់ថ្ងៃនេះមានកូន២នាក់ទៀត(ប្រុសម្នាក់ ស្រីម្នាក់ )។ ពីមុនគ្រួសារគាត់ដូចជាមានសុភមង្គលដែរ តែក្រោយពីមានកូន២នាក់មក ប្តីតែងដើរស៊ីផឹករាល់ថ្ងៃហើយឱ្យតែត្រឡប់ចូលផ្ទះគឺរករឿងវាយបំផ្លាញទ្រព្យសម្បត្តិដែលមានបន្តិចបន្តួចខូចខាតអស់គ្មានសល់និងវាយគាត់ជាប្រពន្ធកូនមិនដែលខានឡើយ ។ នៅថ្ងៃកើតហេតុនោះកូនគាត់សម្រាកពីការងារធ្វើកម្មករនៅភ្នំពេញមកលេងផ្ទះ និងត្រូវត្រឡប់ទៅធ្វើការងារវិញនៅព្រឹកថ្ងៃទី២៨ សីហា ។ ដូចសព្វដងប្តីរបស់គាត់ខណៈមកពីជួយស្ទូងគេវិញតែងមានសភាពស្រវឹងជោក ឯកូនប្រុសគាត់ឃើញឪពុកមកផ្ទះក៏និយាយសុំលុយ៥ម៉ឺនរៀលធ្វើសោហ៊ុយត្រឡប់ទៅធ្វើការងារវិញ តែប្តីគាត់ថាគ្មានលុយ ហើយក៏វាយកូន២ទៅ៣ដៃ ធ្វើឱ្យភ័យខ្លាចទាំងគាត់ទាំងកូន ក៏នាំគ្នារត់ចេញពីផ្ទះ។
ស្ត្រីជាប្រពន្ធរៀបរាប់ទៀតថា ពេលនោះប្តីគាត់ឡើងលើផ្ទះវាយបំផ្លាញទូរទស្សន៍ ធុងទឹកកក និងហៅគាត់ឱ្យចូលផ្ទះ ដោយគំរាមដុតផ្ទះចោលទៀត ។ ដោយខ្លាចប្តីប្រមឹកដុតផ្ទះគាត់ក៏ចូលផ្ទះវិញ ស្រាប់តែត្រូវប្តីចាប់បោចសក់បោកក្បាលទៅលើដីនិងយកខ្នងពូថៅវាយត្រគាកគាត់មិនប្រណី។ ដោយឃើញឪពុកវាយគាត់ជាម្តាយបែបនេះកូនប្រុសគាត់ក៏រត់មកជួយដោយរុញប្តីគាត់ដែលស្រវឹងជោកឱ្យដួល រួចយកមែកប្រេងខ្យល់វាយ បណ្តាលឱ្យរបួសធ្ងន់។ បន្ទាប់មក រូបគាត់និងអ្នកជិតខាងបាននាំប្តីគាត់មកសង្គ្រោះនៅមន្ទីរពេទ្យបង្អែកខេត្ត តែដោយរបួសធ្ងន់ពេកគ្រូពេទ្យប្រាប់ថាឱ្យបញ្ជូនទៅព្យាបាលបន្តនៅភ្នំពេញ ហើយដោយគ្រួសារគាត់ក្រពេកក៏បញ្ជូនត្រឡប់មកផ្ទះវិញ ។ ស្ត្រីជាប្រពន្ធបន្តថា នៅយប់ថ្ងៃទី២៨ សីហា គាត់បានបញ្ជូនប្តីមកមន្ទីរពេទ្យបង្អែកម្តងទៀត តែក៏បានស្លាប់នៅវេលាម៉ោងជាង៥ព្រឹកថ្ងៃទី២៩ សីហា។
អ្នករស់នៅជិតខាងនិយាយថា បុរសដែលស្លាប់នោះឱ្យតែស្រវឹងស្រាពេលមកដល់ផ្ទះតែងតែវាយធ្វើបាបប្រពន្ធកូនពុំដែលខានហើយគ្មានអ្នកណាហ៊ានជួយឡើយ។ ពេលនេះមិនដឹងជាច្បាប់សម្រេចបែបណាទេ ឪពុកស្រវឹងធ្វើបាបម្តាយជារៀងរាល់ថ្ងៃ លុះកូនមកលេងផ្ទះជួបហេតុការណ៍ក៏ជួយម្តាយតែវាយជ្រុលដៃទើប២ថ្ងៃក្រោយមកឪពុកចុងក៏ស្លាប់ ៕
ចែករំលែកព័តមាននេះ