ខេត្តកំពង់ចាម ៖ ក្មេងស្រីជំទង់ម្នាក់ឈ្មោះ«ច.ហ» អាយុ១៤ឆ្នាំបានរត់ឡើងដើមស្វាយប៉ងធ្វើអត្តឃាត ព្រោះតែខឹងការលួងលោមចាប់នាងរំលោភបានសម្រេចរហូតដល់ទៅ២ដងពីបុរសជាមិត្តភក្តិឪពុកចុង ។ ហេតុការណ៍នេះកើតឡើងនៅម៉ោង៣រសៀលរហូតដល់ម៉ោង៥ល្ងាចថ្ងៃទី២៨ សីហា ហើយអ្នកភូមិ និងសមត្ថកិច្ចបានទៅជួយអង្វរទើបនាងព្រមចុះមកដីវិញ។
តាមលោកវរសេនីយ៍ត្រី កែវ ស៊ាងហ៊ន់ អធិការនគរបាលស្រុកព្រៃឈរ ប្រាប់ឱ្យដឹងថា ជនសង្ស័យ ឈ្មោះលឹម សុវ៉ាត អាយុ២២ឆ្នាំ រស់នៅភូមិទៀង ឃុំផ្តៅជុំ ស្រុកជើងព្រៃ ជាអ្នករំលោភ និងឈ្មោះប៉ិច រ៉ូប៊ី អាយុ២៩ឆ្នាំ ជាឪពុកចុងក្មេងស្រីរងគ្រោះជាអ្នកពាក់ព័ន្ធត្រូវបានចាប់ខ្លួននៅវេលាម៉ោង៣រសៀលថ្ងៃទី២៨ សីហា ។
លោកអធិការនគរបាលស្រុកបន្តថា កាលពីថ្ងៃទី២៧ សីហា ឈ្មោះសុវ៉ាត បានទៅលេងផ្ទះមិត្តភក្តិរបស់ខ្លួនឈ្មោះរ៉ូប៊ី នៅឃុំសំរោង ស្រុកព្រៃឈរ និងបានដេកនៅទីនោះ ។ លុះដល់វេលាម៉ោង១រំលងអធ្រាត្រឈានចូលថ្ងៃទី២៨ សីហា ឈ្មោះសុវ៉ាត បានលួងលោមក្មេងស្រីជំទង់ឈ្មោះ«ច.ហ»រំលោភបានសម្រេចម្តង លុះដល់ម៉ោង៣រំលងអធ្រាត្ររំលោភបានម្តងទៀត ។
នៅព្រឹកថ្ងៃទី២៨ សីហា បងស្រីអាយុ១៩ឆ្នាំ របស់ក្មេងស្រីរងគ្រោះ ក្រោយពីបានដឹងហេតុការណ៍នោះ ក៏ប្តឹងសមត្ថកិច្ចប៉ុស្តិ៍រដ្ឋបាលឃុំសំរោងឱ្យជួយអន្តរាគមន៍ ។ រហូតដល់ម៉ោង៣រសៀលថ្ងៃដដែល ជនសង្ស័យ២នាក់នោះ ត្រូវសមត្ថកិច្ចឃាត់ខ្លួន ហើយបញ្ជូនទៅកាន់ស្នងការដ្ឋាននគរបាលខេត្តនៅរសៀលថ្ងៃទី២៩ សីហា ។
ក្មេងស្រីរងគ្រោះឱ្យដឹងថា នៅខែកក្កដា ឆ្នាំ២០១២ ម្តាយនាងអាយុ៤៥ឆ្នាំ បានសែនព្រេនជាមួយបុរសពោះម៉ាយឈ្មោះប៉ិច រ៉ូប៊ី អាយុ២៩ឆ្នាំ យកគ្នាជាប្តីប្រពន្ធ ។ ទាក់ទិនការចាប់រំលោភនោះ នាងបញ្ជាក់ថា នាព្រឹកថ្ងៃទី២៧ សីហា មិត្តភក្តិឪពុកចុងឈ្មោះសុវ៉ាត បានមកលេងផ្ទះនាង ព្រមទាំងផឹកស្រា ។ នៅវេលាយប់ពេលនាងកំពុងដេកឈ្មោះសុវ៉ាត បានមកដេកលើភ្លៅនាង ទោះបីនាងដេញឱ្យចេញក៏មិនព្រមចេញទេ ។ លុះយប់ជ្រៅគេលួងលោមចាប់រំលោភនាងម្តងហើយម្តងទៀត ៕
ចែករំលែកព័តមាននេះ