រាជធានីភ្នំពេញ ៖ នាព្រឹកថ្ងៃទី២៨ សីហា លោកកែប ជុតិមា អភិបាលរាជធានីបានអញ្ជើញទៅពិនិត្យតំបន់ស្ពានស្ទឹងមានជ័យ ដើម្បីពិនិត្យពីផលប៉ះពាល់ផង និងការត្រៀមរៀបចំដើម្បីធ្វើពិធីសែនក្រុងពាលី និងបើកការដ្ឋានសាងសង់ស្ពានអាកាសស្ទឹងមានជ័យនេះ ដែលជាស្ពានបត់បែនវាងចុះវាងឡើងរេរាំគួរឱ្យគយគន់ ។
ក្នុងឱកាសអញ្ជើញទៅពិនិត្យដោយផ្ទាល់នោះ អភិបាលរាជធានី បានណែនាំមន្ត្រីជំនាញក្រោមឱវាទឱ្យមើលថ្ងៃខែជ្រើសរើសយកថ្ងៃល្អដើម្បីបើកការដ្ឋានសាងសង់ស្ពានអាកាសស្ទឹងមានជ័យ ដែលសាលារាជធានីភ្នំពេញគ្រោងនឹងធ្វើឡើងនាអំឡុងពាក់កណ្តាលខែកញ្ញាខាងមុខ ។ បើតាមគម្រោងដែលគ្រោងទុក ពិធីបើកការដ្ឋានសាងសង់ស្ពានអាកាសស្ទឹងមានជ័យនេះស្ថិតក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត និងមានការចូលពីមន្ត្រីរាជការ ព្រមទាំងប្រជាពលរដ្ឋរាប់ពាន់នាក់ ។
លោកកែប ជុតិមា បានជំរុញឱ្យអាជ្ញាធរដែនដី និងមន្ត្រីពាក់ព័ន្ធ ខិតខំដោះស្រាយផលប៉ះពាល់ដែលនៅសេសសល់ឱ្យបានឆាប់រហ័ស ។ ជាមួយគ្នានេះ ចំពោះស្លាកផ្សាយពាណិជ្ជកម្ម ឬប៉ាណូផ្សេងៗ និងប្រព័ន្ធខ្សែកាប ទឹក ភ្លើង នានាក៏ត្រូវរុះរើចេញឱ្យបានទាន់ពេលវេលាដែរ។ លោកកែប ជុតិមា បានបញ្ជាក់ថា នៅពេលបើកការដ្ឋានសាងសង់ស្ពានអាកាសស្ទឹងមានជ័យ យើងនឹងបើកការដ្ឋានស្ថាបនាផ្លូវបេតុង២ខ្សែអមប្រឡាយមេបឹងសាឡាងប៉ែកខាងត្បូងស្ពានស្ទឹងមានជ័យទៅដល់ស្ពានថ្មមុខមន្ទីរពេទ្យមិត្តភាពខ្មែរ-សូវៀត ដើម្បីសម្រួលចរាចរណ៍លើ កំណាត់ផ្លូវលេខ២៧១ ក៏ដូចជាផ្លូវតំបន់ស្ពានស្ទឹងមានជ័យ ស្របពេលស្ពានអាកាសនេះចាប់ផ្តើមសាងសង់ ។
ស្ពានអាកាសស្ទឹងមានជ័យគឺជាស្ពានអាកាសទី៣ បន្ទាប់ពីស្ពានអាកាសក្បាលថ្នល់ និងស្ពានអាកាស៧មករា(មន្ទីរពេទ្យព្រះកុសុមៈ)ក្នុងរាជធានីភ្នំពេញ ដែលត្រូវសាងសង់នាពេលខាងមុខនេះដើម្បីរំដោះចរាចរណ៍ដែលតែងតែកកស្ទះជាញឹកញាប់តាមច្រកផ្លូវសំខាន់ៗក្នុងទីក្រុង ស្របពេលដែលចំនួនប្រជាពលរដ្ឋ និងមធ្យោបាយធ្វើដំណើរកើនឡើងឥតឈប់ឈរ ។
ពេលនេះ សាលារាជធានីភ្នំពេញ បាននិងកំពុងខិតខំដោះស្រាយផលប៉ះពាល់ទៅលើលំនៅឋានប្រជាពលរដ្ឋដែលប៉ះលើគម្រោងស្ថាបនាស្ពានអាកាសស្ទឹងមាននេះដែលមានទីតាំងស្ថិតនៅចំណុចកណ្តាល ឬព្រំប្រទល់៣ខណ្ឌ គឺខណ្ឌទួលគោក ខណ្ឌចំការមន និងខណ្ឌមានជ័យ ។ លំនៅឋានប្រជាពលរដ្ឋដែលមានផលប៉ះពាល់មានចំនួន១៥៨ខ្នង ក្នុងនោះផ្ទះដែលប៉ះពាល់ខ្លាំងមាន៧៥ខ្នង ។ ក្រៅពីនេះ មានការប៉ះពាល់ទៅលើបណ្តាញទឹកស្អាត កាបអុបទិក ប្រព័ន្ធលូ ដើមឈើ បង្គោលភ្លើងជាដើម តែការប៉ះពាល់ទាំងនេះត្រូវបានដោះស្រាយស្ទើរតែចប់អស់ហើយ ។
ទោះជាយ៉ាងណា លោកអភិបាលរាជធានីភ្នំពេញនៅតែសន្យាថា នឹងមានការដោះស្រាយជាមួយប្រជាពលរដ្ឋ ឬមានការឯកភាពពីប្រជាពលរដ្ឋ ប៉ុន្តែប្រជាពលរដ្ឋក៏ត្រូវគិតផងដែរថា នេះជាការគិតគូរសម្រាប់ផលប្រយោជន៍ជាតិ ជាពិសេសសម្រាប់ប្រជាពលរដ្ឋទាំងមូល ព្រមទាំងបន្សល់ទុកឱ្យកូនចៅយើងជំនាន់ក្រោយៗទៀតផងដែរ ។ ការស្ថាបនាស្ពានស្ទឹងមានជ័យនេះ ក្រោមគំនិតច្នៃប្រឌិតប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន ដែលបានចង្អុលបង្ហាញ និងតម្រង់ទិសដល់សាលារាជធានីភ្នំពេញ ក្នុងការគិតគូរដល់ប្រជាពលរដ្ឋ និងប្រទេសជាតិទាំងមូល ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ស្ពានអាកាសស្ទឹងមានជ័យ ដែលសាលារាជធានីភ្នំពេញស្ថាបនានាពេលខាងមុខនេះ មានចំនួន៥ខ្សែ ហោះឡើងលើ៤ខ្សែ និងមុជក្រោមដី១ខ្សែ។ ការសាងសង់គឺដោយក្រុមហ៊ុន OCIC មានរយៈពេល២៨ខែ គិតចាប់ពីថ្ងៃបើកការដ្ឋានទៅក្រោមការត្រួតពិនិត្យបច្ចេកទេសពីមន្ទីរសាធារណការ និងដឹកជញ្ជូនរាជធានីភ្នំពេញ ៕
ចែករំលែកព័តមាននេះ