រាជធានីភ្នំពេញ ៖ ក្រុមប្រឹក្សាជាតិគណនេយ្យវិទ្យាស្ថានគណនេយ្យករជំនាញ និងសវនករកម្ពុជា និងសមាគមគណនេយ្យករជំនាញអង់គ្លេស ACCA ប្រចាំនៅកម្ពុជាបានរៀបចំសន្និសីទជាតិស្តីពីគណនេយ្យក្រោមប្រធានបទ «គណនេយ្យករ និងទីផ្សរមូលធននៅកម្ពុជា» នៅសណ្ឋាគារសូហ្វីតែល កាលពីព្រឹកថ្ងៃទី២៩ សីហា ២០១២ ក្រោមអធិបតីភាពឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ។
លោកងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគណនេយ្យបានថ្លែងក្នុងសន្និសីទនោះថាជាការពិតសន្និសីទជាតិនៅថ្ងៃនេះ នឹងនាំមកនូវមេរៀន និងបទពិសោធន៍ជាច្រើនពីសំណាក់វាគ្មិនល្បីៗរបស់យើងដែលនឹងឆ្លុះបញ្ចាំងឱ្យឃើញអំពីបញ្ហាប្រឈមដែលកើតមាននៅក្នុងដំណើរការអភិវឌ្ឍ និងទិដ្ឋភាពជាក់ស្តែងនៃកិច្ចប្រតិបត្តការទីផ្សារមូលធននៅក្នុងប្រទេសកម្ពុជា ។ សន្និសីទជាតិនេះ ក៏នឹងបង្ហាញឱ្យឃើញពីសារសំខាន់នៃស្ថាប័នកំណត់ស្តង់ដា និងបញ្ហាប្រឈមរបស់គណនេយ្យករក្នុងកិច្ចអភិវឌ្ឍន៍ទីផ្សារមូលធនដ៏ក្មេងខ្ចីរបស់យើងផងដែរ ។ ដើមឡើយវិជ្ជាជីវៈគណនេយ្យមានតួនាទីផ្តល់នូវជំនឿទុកចិត្តដល់សមាជិកដែលជាម្ចាស់របស់ក្រុមហ៊ុននាពេលបច្ចុប្បន្នវិជ្ជាជីវៈគណនេយ្យមានតួនាទីទូលំទូលាយជាងនេះនោះ គឺការផ្តល់នូវការធានាអះអាងចំពោះអ្នកដែលមានការពាក់ព័ន្ធដែលរួមមានរាជរដ្ឋាភិបាល ប្រព័ន្ធធនាគារនិយ័តករ និងមហាជន។ ដោយសារតែអ្នកមានការពាក់ព័ន្ធទាំងនោះពឹងផ្អែកខ្លាំងលើវិជ្ជាជីវៈគណនេយ្យដូចនេះគណនេយ្យករត្រូវទទួលស្គាល់ថា ខ្លួនត្រូវបន្តស្រូបយកនូវអនិស្សរភាព និងសេចក្តីជឿទុកចិត្តពីអ្នកដែលមានការពាក់ព័ន្ធប្រសិនបើខ្លួនត្រូវរក្សានៅភាពជាប់ពាក់ព័ន្ធនឹងការបន្ថែមតម្លៃឱ្យខ្លួនឯង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ