រថយន្តបង្កប់គ្រឿងផ្ទុះមួយបានផ្ទុះ កាលពី ថ្ងៃទី២៨ សីហា នៅកន្លែងធ្វើបុណ្យសពមួយនាជាយក្រុងដាម៉ាស់ បណ្តាលឱ្យមនុស្សស្លាប់២៧នាក់ ខណៈដែលកងទ័ពវាយប្រហារលើសង្កាត់នានានៃរដ្ឋធានី និងក្រុងអាឡែប ដើម្បីប៉ុនប៉ង កម្ទេចការតស៊ូរបស់ពួកឧទ្ទាម ។
ប្រធានាធិបតីស៊ីរីក្នុងសង្កថា មួយបានទទួលស្គាល់ថា កងទ័ពរបស់លោកនៅពុំទាន់អាចយកប្រៀបបានលើពួកឧទ្ទាមនៅឡើយ ។ នៅខេត្តអ៊ីដ ឡេប ភាគពាយ័ព្យប្រទេសជនស៊ីវិលយ៉ាងតិច១៧នាក់ ស្លាប់ក្នុងការបាញ់ផ្លោងរបស់កងទ័ពលើភូមិកាហ្វា ណាបែល ។ ប្រឈមមុខនឹងការកើនឡើងនៃអំពើហិង្សាប្រជាជនស៊ីរីកាន់តែច្រើននាំគ្នារត់ភៀសខ្លួនចេញពីប្រទេសទៅកាន់បណ្តាប្រទេសជិតខាង ។
យោងតាមទូរទស្សន៍រដ្ឋថា មនុស្ស១២នាក់ ស្លាប់និង៤៨នាក់ ត្រូវរបួសក្នុងការវាយប្រហារដោយរថយន្តបង្កប់គ្រឿងផ្ទុះមួយដែលសំដៅលើបុណ្យសពនៅចារ៉ាម៉ាណា ជាយក្រុងដាម៉ាស់ភាគអាគ្នេយ៍ ។ ក៏ប៉ុន្តែអង្គការសិទិ្ធមនុស្សស៊ីរី OSDH រៀបរាប់ពីមនុស្សស្លាប់ដល់ទៅ២៧នាក់ឯណោះ ដោយគូសបញ្ជាក់ថា បុណ្យនោះរៀបចំធ្វើសម្រាប់សពអ្នកគាំទ្ររបបស៊ីរី២នាក់ ហើយប្រជាជននៅចារ៉ាម៉ាណា ភាគច្រើនគាំទ្ររបបលោកអាសាដ ។ នៅក្រុងអាឡែប កងទ័ពបន្តវាយប្រហារលើទីតាំងទាំងឡាយរបស់ពួកឧទ្ទាម ។
នាថ្ងៃទី២៨ សីហា មនុស្សយ៉ាងតិច៩៧នាក់ ស្លាប់ក្នុងអំពើហិង្សានៅស៊ីរី ក្នុងនោះមានជនស៊ីវិល៦២នាក់ ពួកឧទ្ទាម១១នាក់ និងទាហាន២៤នាក់ ។ នេះជាតុល្យការបណ្តោះអាសន្នរបស់ OSDH ដែលពុំរាប់បញ្ចូលអ្នកស្លាប់ក្នុងការវាយប្រហារភេរវកម្មនៅជិតក្រុងដាម៉ាស់ផងទេ ៕
ចែករំលែកព័តមាននេះ