រាជធានីភ្នំពេញ ៖ ថ្ងៃសៅរ៍ទី១ កញ្ញា ខាងមុខនៅសង្វៀនស្ថានីយទូរទស្សន៍បាយ័នបឹងស្នោ នឹងមានព្រឹត្តិការណ៍ប្រកួតជម្រុះដើម្បីរកបេក្ខភាពទៅដណ្តើមខ្សែក្រវាត់អាជ្ញាធរជាតិប្រឆាំងគ្រឿងញៀន ដោយមានកីឡាករអ៊ុង វីរៈ ចាន់ រតនា វ៉ែន សុវណ្ណ និងវ៉ោយ សុធន ធ្វើការប្រកួតគ្នារកជើងខ្លាំងតែម្នាក់ទៅណ្តើមខ្សែក្រវាត់ពីអូត ភូថង នៅចុងខែកញ្ញាខាងមុខនេះ ។
ស្របពេលដែលឱកាសបង្ហាញសមត្ថភាពរវាងជើងខ្លាំង៤រូបមិនទាន់ទាំងចាប់ផ្តើមដឹងសខ្មៅស្រួលបួលផង ស្រាប់តែម្ចាស់ខ្សែក្រវាត់អូត ភូថង បានបង្ហើបថា ក្នុងចំណោមអ្នកប្រដាល់ជើងខ្លាំង៤រូបនោះ លោកភ័យខ្លាចតែប៉ះជាមួយសិស្សប្អូនអ៊ុង វីរៈ ប៉ុណ្ណោះ ដោយលោកគិតថាពិបាកក្នុងការផ្តួលបំផុត ។ទោះយ៉ាងណា លោកមិនអាចមើលស្រាលកីឡាករបីរូបផ្សេងទៀតថា អន់ជាងខ្លួនបានឡើយ ដ្បិតវិជ្ជាគុនរបស់ពួកគេ ក៏មិនធម្មតាដែរ ពោលគឺសុទ្ធតែជាអ្នកល្បីក្នុងពិភពកីឡាប្រដាល់ ។
គេមិនដឹងថា ការលើកឡើងរបស់អូត ភូថង ថាខ្លាចប៉ះជាមួយអ៊ុង វីរៈ ជាសម្តីដាក់ខ្លួនដើម្បីធ្វើឱ្យដៃគូភ្លេចខ្លួន ឬជាការបារម្ភចេញពីចិត្តពិតប្រាកដ ឬយ៉ាងណាទេ ។ ឆ្លើយតបនឹងការងឿងឆ្ងល់នេះ កីឡាករអូត ភូថង ដែលមកពីក្លិប ក្រសួងការពារជាតិបានសារភាពថា ការពិតក្នុងចំណោមកីឡាករទាំងបួនរូបខាងលើ គឺមានតែអ៊ុង វីរៈ ម្នាក់បុ៉ណ្ណោះដែលធ្វើឱ្យលោករាងញញើតបន្តិចតាមដែលបានស្ទាបស្ទង់កន្លងមក ។ អូត ភូថង បានអះអាងថា ហេតុផលដែលលោកហា៊នសារភាពមុនបែបនេះ ព្រោះតែប្រវត្តិនៃការប៉ះគ្នាចំនួនពីរលើកមានឈ្នះ-ចាញ់ម្តងម្នាក់ ។ ប្រការនេះហើយទើបលោកអាចកត់សម្គាល់បានពីតិចនិកប្រដាល់របស់អ៊ុង វីរៈ គឺគាត់ពូកែខាងកម្លាំង ពេលស្ទុះមកម្តងៗពិបាកទប់បំផុតដែលកន្លងមកលោកមិនដែលជួបកីឡាករណាមានកម្លាំងដូចគាត់ទេ។ ទោះជាមានការសារភាពថា ញញើតចំពោះកីឡាករអ៊ុង វីរៈ ប៉ុន្តែកីឡាករអូត ភូថង សន្យាថាមិនបណ្តោយឱ្យអ្នកណាដណ្តើមខ្សែក្រវាត់ពីខ្លួនបានដោយងាយស្រួលពេកទេ ព្រោះតាំងពីឮដំណឹងថា មានកីឡាករខាងលើប្រកួតជម្រុះដើម្បីរកជើងខ្លាំងតែម្នាក់មកប្រកួតជាមួយ លោកបង្កើនការហ្វឹកហាត់ច្រើនជាងមុនដើម្បីរក្សាខ្សែក្រវាត់ឱ្យនៅគង់ និងកេរ្តិ៍ឈ្មោះជាអ្នកប្រដាល់ជើងខ្លាំងបញ្ចៀសការរិះគន់ពីសំណាក់ទស្សនិកជន ។
លោកអូត ភូថង ត្រូវបានគេផ្តល់រហស្សនាមថា ជាអ្នកប្រដាល់កែងឆេះ ជង្គង់ទិព្វ ដែលធ្លាប់ប្រកួត១៩០ដង ឈ្នះ១៥០ដង ចាញ់៣៨ដង ស្មើ២ និងធ្វើឱ្យគូប្រកួតសន្លប់៦០ដង ។ចាំមើលតើក្នុងចំណោមជើងខ្លាំងទាំងបួនរូប(វ៉ែន សុវណ្ណ ចាន់ រតនា វ៉ោយ សុធន និងអ៊ុង វីរៈ) តើនរណាមានឱកាសឡើងទៅតតាំងលើរេញជាមួយអូត ភូថង ដើម្បីដណ្តើមខ្សែក្រវាត់ ដែលគាត់កាន់កាប់រាងយូរក្រែលហើយនោះ ។
គួរបញ្ជាក់ថា កីឡាករជើងខ្លាំង៤រូបដែលត្រូវឡើងប្រកួតគ្នានោះមាន កីឡាករវ៉ោយ សុធន មកពីក្លិបរាជសីហ៍ខេត្តបន្ទាយមានជ័យ ប៉ះជាមួយកីឡាករចាន់ រតនា មកពីក្លិបខ្លាហោះកីឡា ។ កីឡាករវ៉ែន សុវណ្ណ មកពីក្លិបកងកេងខេត្តបាត់ដំបង ជួបប្រកួតជាមួយកីឡាករអ៊ុង វីរៈ មកពីក្លិបកងពលតូចឆត្រយោង៩១១ ។ អ្នកឈ្នះក្នុងចំណោមពីរគូនេះនឹងធ្វើការប្រកួតគ្នារកជើងខ្លាំងតែម្នាក់ប៉ុណ្ណោះទៅប្រកួតជាមួយកីឡាករអូត ភូថង ដើម្បីដណ្តើមខ្សែក្រវាត់អាជ្ញាធរជាតិប្រឆាំងគ្រឿងញៀន ដែលនឹងធ្វើឡើងនៅថ្ងៃទី២៩ កញ្ញា លើសង្វៀនបឹងស្នោដដែល ៕
ចែករំលែកព័តមាននេះ