សហព័ន្ធប្រណាំងរថយន្តអន្តរជាតិហៅកាត់ថា (FIA)បានប្រកាសឱ្យដឹងពីគម្រោងកម្មវិធីប្រណាំងថ្មីរបស់ខ្លួនដែលនឹងលេចចេញជារូបរាងនៅឆ្នាំ២០១៤ខាងមុខ ។ កម្មវិធីប្រណាំងថ្មីនោះត្រូវគេដាក់ឈ្មោះថា Formula E ។ ប៉ុន្តែអ្វីដែលខុសប្លែកពី Formula 1នោះគឺរថយន្តប្រណាំងរបស់ Formula E ប្រើថាមពលអាគុយ ។ បណ្តារោងចក្រផលិតទាំងឡាយកំពុងតែបានត្រូវអញ្ជើញឱ្យចូលរួមរច្ចនាម៉ូដនិងផលិតរថយន្តផ្ទាល់ខ្លួនរបស់ពួកគេ ។
ការប្រណាំងរថយន្តប្រភេទថ្មីនេះនឹងរៀបចំចាត់ចែងដោយ Formula E Holdingsដែលជាសហគមន៍អ្នកវិនិយោគទុនដឹកនាំដោយមហាសេដ្ឋីអេស្ប៉ាញឈ្មោះ Enrique Banuelos ។ប្រធាន FIA លោក Jean Todtដែលបានចុះហត្ថលេខាគាំទ្រកម្មវិធីប្រណាំងខាងលើបានថ្លែងថា៖«កម្មវិធីប្រណាំងនេះនឹងធ្វើនៅទីលានប្រណាំងកណ្តាលទីក្រុងនានា ហើយវានឹងទាក់ទាញអ្នកទស្សនាបានច្រើន ។ មួយវិញទៀត វាក៏នឹងផ្តល់នូវការកំសាន្តសប្បាយក៏ដូចជាឱកាសថ្មីមួយក្នុងការចូលរួមចែករំលែកតម្លៃរបស់ FIAនិងកម្មវត្ថុនៃថាមពលស្អាត ចលភាពទូលំទូលាយដែលមានការចូលរួមពីអ្នកទស្សនាវ័យក្មេងផងដែរ »។
សូមបញ្ជាក់ថា បណ្តារថយន្តប្រណាំង Formula E មួយគ្រឿងមានទម្ងន់ ៧៨០គីឡូក្រាមនិងមានល្បឿនអតិបរិមា ២២០គីឡូម៉ែត្រក្នុងមួយម៉ោង ។ ឯថាមពលអាគុយរបស់វាអាចប្រើបានលើផ្លូវប្រណាំងរយៈពេល២៥នាទីប៉ុណ្ណោះ ៕
ចែករំលែកព័តមាននេះ