រាជធានីភ្នំពេញ ៖ អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា នឹងបើកសវនាការសាធារណៈលើកាយសម្បទា និងបញ្ញាស្មារតីជនជាប់ចោទអៀង ធីរិទ្ធ សាជាថ្មីនៅថ្ងៃទី៣០ សីហា ២០១២ ដើម្បីស្តាប់ការវាយតម្លៃរបស់អ្នកជំនាញវេជ្ជសាស្ត្រលើស្ថានភាពកាយសម្បទា និងបញ្ញាស្មារតីរបស់លោកស្រីនៅក្នុងការចូលរួមការជំនុំជម្រះក្តី ។ មន្ត្រីនាំពាក្យរបស់សាលាក្តីខ្មែរក្រហមលោកនេត្រ ភក្ត្រា បានថ្លែងឱ្យដឹងនៅថ្ងៃទី២៩ សីហា ថា សវនាការលើកាយសម្បទា និងបញ្ញាស្មារតីនេះធ្វើឡើងបន្ទាប់ពីក្រុមអ្នកជំនាញវេជ្ជសាស្ត្របានធ្វើការព្យាបាលដល់លោកស្រី អៀង ធីរិទ្ធ អស់រយៈពេល៦ខែរួចមក តាមការបញ្ជារបស់អង្គជំនុំជម្រះតុលាការកំពូល ហើយនៅពេលនេះ គឺ ដល់ពេលវេលាកំណត់ក្នុងការពិនិត្យឡើងវិញ លើកាយសម្បទារបស់លោកស្រី អៀង ធីរិទ្ធ ។
បើតាមការឱ្យដឹងរបស់លោកនេត្រ ភក្ត្រា សវនាការរយៈពេល២ថ្ងៃចាប់ពីថ្ងៃទី៣០-៣១ សីហា ២០១២ ត្រូវបានរៀបចំឡើងដើម្បីឱ្យអ្នកជំនាញវេជ្ជសាស្ត្របង្ហាញអំពីលទ្ធផលនៃការពិនិត្យរបស់គាត់ និងដើម្បីបើកឱ្យមានការពិភាក្សានៅក្នុងតុលាការរវាងអ្នកជំនាញវេជ្ជសាស្ត្រជាមួយមេធាវីការពារក្តីរបស់លោកស្រី អៀង ធីរិទ្ធ សហព្រះរាជអាជ្ញា និងសហមេធាវីនាំមុខតំណាងដើមបណ្តឹងរដ្ឋប្បវេណី ។ ដោយសារតែសវនាការនេះ គឺទាក់ទងតែលោកស្រី អៀង ធីរិទ្ធ ជនជាប់ចោទនួន ជា និងខៀវ សំផន នឹងមិនមានភាពចាំបាច់ចូលរួមក្នុងសវនាការនេះទេ ប៉ុន្តែសម្រាប់លោកអៀង សារី ដោយសារតែគាត់មានទំនាក់ទំនងពិសេសនៅក្នុងនាមជាស្វាមីភរិយាជាមួយលោកស្រី អៀង ធីរិទ្ធ និងមេធាវីរបស់គាត់ត្រូវបានអង្គជំនុំជម្រះសាលាដំបូងអនុញ្ញាតឱ្យចូលរួមក្នុងសវនាការក្នុងនាមជាអ្នកសង្កេតការណ៍ ដោយមិនអនុញ្ញាតឱ្យមានការចោទសួរអ្វីឡើយ ។
គួរបញ្ជាក់ថា បន្ទាប់ពីមានការពិនិត្យ និងវាយតម្លៃដោយអ្នកជំនាញវេជ្ជសាស្ត្រចំនួន៥រូប អង្គជំនុំជម្រះសាលាដំបូងបានធ្វើសេចក្តីសម្រេចមួយកាលពីថ្ងៃទី១៧ វិច្ឆិកា ២០១១ ថា ជនជាប់ចោទអៀង ធីរិទ្ធ ពុំមានសមត្ថភាពកាយសម្បទា និងបញ្ញាស្មារតីគ្រប់គ្រាន់ដើម្បីចូលរួមការជំនុំជម្រះទេ ដោយសារគាត់មានជំងឺវង្វេងវង្វាន់ (ឬអាចជាជំងឺបាត់ការចងចាំ) ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ