ប្រធានាធិបតីចិនលោកហ៊ូជីនតាវ កាលពីរសៀលថ្ងៃទី២៨ សីហា បានរៀបចំពិធីទទួលស្វាគមន៍មួយនៅមហាវិមានប្រជាជនក្រុងបេ៉កាំង ជាកិត្តិយសដល់ប្រធានាធិបតីថ្មីអេហ្ស៊ីបលោកមូ៉ហាម៉េដម័រស៊ី ដែលមកបំពេញទស្សនកិច្ចនៅប្រទេសចិន ។បន្ទាប់ពីពិធីនោះប្រធានាធិបតីទាំង២ ត្រូវពិភាក្សាគ្នាពីទំនាក់ទំនងទ្វេភាគី និងបញ្ហានានាដែលមានផលប្រយោជន៍ ។ កិច្ចសហប្រតិបត្តិការសេដ្ឋកិច្ច និងពាណិជ្ជកម្មព្រមទាំងបញ្ហានានាដែលមានផលប្រយោជន៍រួម ក្នុងនោះមានសភាពការណ៍នៅស៊ីរី ស្ថិតក្នុងរបៀបវារៈសំខាន់នៃទស្សនកិច្ចនោះរបស់លោកម័រស៊ីនៅចិន ។
នេះជាទស្សនកិច្ចលើកដំបូងនៅចិនរបស់ប្រធានាធិបតីអេហ្ស៊ីបចាប់តាំងពីលោកចូលកាន់តំណែងកាលពីខែមិថុនា មក ។ ពេលស្នាក់អាស្រ័យនៅក្រុងប៉េកាំងពីថ្ងៃទី២៨ ដល់៣០ សីហា ប្រធានាធិបតីអេហ្ស៊ីបនឹងជួបជាមួយមេដឹកនាំចិនដទៃៗទៀត ក្នុងនោះមានប្រធានគណៈកម្មាធិការអចិន្ត្រៃយ៍សភាប្រជាជនចិនលោកវូបាងហ្គោ នាយករដ្ឋមន្ត្រីលោកវេនជាបាវ និងអនុប្រធានាធិបតីលោកស៊ីជីនពិញ ។
លោកម័រស៊ីបានមកដល់ក្រុងប៉េកាំង កាលពីរសៀលថ្ងៃទី២៨ សីហា ។ ក្រោយពីបំពេញទស្សនកិច្ចនៅចិនលោកនឹងទៅកាន់ទីក្រុងតេហេរ៉ង់ ចូលរួមក្នុងកិច្ចប្រជុំកំពូលចលនាមិនចូលបក្សសម្ព័ន្ធ ៕
ចែករំលែកព័តមាននេះ