រាជធានីភ្នំពេញ ៖ ស្ថានទូតសហភាពអឺរ៉ុបប្រចាំកម្ពុជា កាលពីថ្ងៃទី២៨ សីហា ២០១២ បានរៀបចំពិធីជួបសំណេះសំណាលជូនដំណើរនិស្សិតអាហារូបករណ៍ចំនួន៥៣នាក់ដែលចេញទៅបំពេញការសិក្សានៅតាមបណ្តាប្រទេសសហភាពអឺរ៉ុបក្នុងឆ្នាំសិក្សា២០១២-២០១៣ នេះ ។
លោក Jean Francois Cautain ប្រធានប្រតិភូសហភាពអឺរ៉ុបប្រចាំកម្ពុជាមានប្រសាសន៍នាឱកាសនោះថា កម្មវិធីអាហារូបករណ៍ Erasmus Mundus គឺជាកម្មវិធីចល័តភាពបំផុតមួយរបស់សហភាពអឺរ៉ុបក្នុងចំណោមកម្មវិធីចល័តភាពធំបំផុតទាំងអស់នៅក្នុងពិភពលោកដោយមានទំនាក់ទំនងទៅនឹងគ្រឹះស្ថានអប់រំកម្រិតឧត្តមសិក្សារបស់ប្រទេសនានាទូទាំងពិភពលោក ។ លោកបន្តថា ចាប់តាំងពីកម្មវិធីអាហារូបករណ៍ Erasmus Mundus ត្រូវបានបង្កើតនៅឆ្នាំ២០០៤ មកមាននិស្សិតកម្ពុជាសរុបចំនួន១៧រូប ត្រូវបានជ្រើសរើសក្នុងដំណាក់កាលទី១ ដើម្បីចូលសិក្សារួមថ្នាក់អនុបណ្ឌិតរយៈពេល៤ឆ្នាំ ហើយនិស្សិតកម្ពុជាចំនួន៦៦រូបទៀតបានចូលរួមបន្តការសិក្សារយៈពេលខ្លីនៅសភាពអឺរ៉ុបផងដែរ ។ ចំណែកដំណាក់កាលទី២និស្សិតដែលទទួលបានអាហារូបករណ៍ចូលសិក្សាក្នុងកម្មវិធី សិក្សាចល័តភាពរយៈពេលខ្លីក្រោមកម្មវិធីអាហារូបត្ថម្ភ Erasmus Mundus ក្នុងមួយឆ្នាំៗមានចំនួនកើនឡើងជិត២ដងឯណោះ ។
លោក Jean Francois Cautainបានបញ្ជាក់ផងដែរថា ក្រៅពីវគ្គសិក្សារួមថ្នាក់អនុបណ្ឌិត និងថ្នាក់បណ្ឌិត ដែលជាកម្មវិធីដើមរបស់សហភាពអឺរ៉ុប គម្រោងភាពជាដៃគូរវាងសាកលវិទ្យាល័យនៅអឺរ៉ុប និងសាកលវិទ្យាល័យនៅអាស៊ីក៏ត្រូវបានបង្កើតឡើងជារៀងរាល់ឆ្នាំក្រោមកម្មវិធីអាហារូបករណ៍ Erasmus Mundus ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ