កីឡាករប្រដាល់អង់គ្លេសខាល ហ្វ្រច់នឹងឡើងសង្វៀនប្រកួតការពារខ្សែក្រវាត់ស្ថាប័ន IBFក្នុងប្រភេទទម្ងន់Super-Middleweight(៧៦.២គីឡូក្រាម)របស់ខ្លួនជាលើកទី១ប្រឆាំងនឹងកីឡាករអាមេរិក Yusaf Mackនៅថ្ងៃទី១៧ខែវិច្ឆិកាខាងមុខនេះ ។ ការប្រកួតត្រូវគេគ្រោងធ្វើនៅសង្វៀន Capital FM Arena ស្ថិតក្នុងទីក្រុង Nottingham ប្រទេសអង់គ្លេស។
ហ្វ្រច់បានក្លាយទៅជាម្ចាស់ជើងឯកពិភពលោក៣ជំនាន់និងជាម្ចាស់ខ្សែក្រវាត់ស្ថាប័ន IBFបន្ទាប់ពីបានផ្តួលកីឡាករកាណាដា លូស៊ាន ប៊ូតឱ្យសន្លប់ក្នុងទឹកទី៥នៅសង្វៀន Capital FM Arena កាលពីខែឧសភាកន្លងមក ។ កីឡាករវ័យ៣៥ឆ្នាំរូបនេះបានថ្លែងថា ៖«ចាប់តាំងពីបានបំបាក់លូស៊ាន ប៊ូតមក ខ្ញុំគិតថា មនុស្សកាន់តែច្រើនបានដឹងថា ខ្ញុំក្នុងពេលឥឡូវនេះ គឺជាកីឡាករស្ថិតនៅលំដាប់កំពូលមួយរូបហើយខ្ញុំសមនឹងទទួលបានការគោរពដែលមិនធ្លាប់មានពីមុនមក ។
តែយ៉ាងណា ខ្ញុំបានទុករឿងនោះមួយឡែក ។ ពេលនេះខ្ញុំមានឈ្មោះល្បី ហើយខ្ញុំពេញចិត្តចំពោះអ្វីដែលខ្ញុំបានទទួល ។ បើទោះណា ខ្ញុំអាយុ៣៥ឆ្នាំហើយក្តី តែនៅតែពេញចិត្ត ។ នៅមានការប្រកួតធំៗមួយចំនួនក្នុងថ្ងៃខាងមុខ ។ ខ្ញុំមានក្រុមហ៊ុនរៀបចំការប្រកួតដ៏ល្អបំផុតនៅក្នុងប្រទេស »។ និយាយពីការជួបជាមួយកីឡាករ Mackក្នុងពេលខាងមុខ ហ្វ្រច់មិនហ៊ានមើលស្រាលគូប្រកួតឡើយ ។ «ខ្ញុំបានស្គាល់គេយ៉ាងច្បាស់ ។ គេជាកីឡាករស្ថិតក្នុងលំដាប់កមពូលទាំង១០ ។
នៅក្នុងប្រភេទទម្ងន់នេះ កាលពីពេលមុន គេស្ថិតនៅលំដាប់ទី៤ តែឥឡូវលំដាប់ទី៦ ហើយកីឡាករណាដែលស្ថិតក្នុងចំណាត់ថ្នាក់នេះមានសិទ្ធិឡើងវាយដណ្តើមខ្សែក្រវាត់ពិភពលោកបាន ។ ដោយសាតែគេមកប្រកួតជាមួយខ្ញុំដល់ស្រុកកំណើត ដូច្នេះគេពិតនឹងមានអ្វីពិសេសជាងពេលធម្មតា២០ភាគរយ តែខ្ញុំបានត្រៀមខ្លួនរួចជាស្រេចដើម្បីផ្តល់មេរៀនដល់អ្នកដែលគិតចង់មកយកខ្សែក្រវាត់ពីខ្ញុំ ។ ដូច្នេះហើយ ខ្ញុំមិនអាចមើលស្រាលលើរូបគេបានទេ» ។
ហ្វ្រច់មានឯតទគ្គកម្មប្រកួតឈ្នះ២៩លើក ចាញ់២ និងផ្តួលដៃគូប្រកួតឱ្យសន្លប់ចំនួន ២១លើក ។ ចំណែកកីឡាករវ័យ៣២ឆ្នាំ Yusaf Mackវិញបានអួតក្តែងៗថា ខ្លួនមានសមត្ថភាពកំទេចខាល ហ្វ្រច់បាន ។ ចាប់ពីត្រូវសន្លប់ក្រោមកណ្តាប់ដៃកីឡាករ Librado Andradeក្នុងឆ្នាំ ២០០៧មក Mackមិនបានចេញប្រកួតនោះទេ ។ ប៉ុន្តែកាលពីខែកក្កដាកន្លងមកនេះ គេឡើងប្រកួតជាមួយកីឡាករ Sabou Ballogouក្នុងប្រភេទទម្ងន់ ៧៩គីឡូក្រាម ។ គេមិនដែលមានប្រវត្តិធ្លាប់ឈ្នះខ្សែក្រវាត់ពិភពលោកណាម្តងឡើយ ប៉ុន្តែកីឡាករអាមេរិករូបនេះមានជំនឿចិត្តថា ខ្លួនពិតជាអាចធ្វើឱ្យខាល ហ្វ្រច់រន្ធត់ចិត្ត ។
«គ្រប់ៗគ្នាដឹងថា ខ្ញុំនេះរាល់ការប្រកួតអាចស៊ូបានតែ៦-៧ទឹកប៉ុណ្ណោះ ប៉ុន្តែការប្រកួតដ៏ធំចុងក្រោយ ខ្ញុំបានផ្តួលកីឡាករ Omar Sheikaក្នុងទឹកទី១២ ។ ជាទម្លាប់ខ្ញុំចូលចិត្តមើលស្រាលគូប្រកួត ។ នៅពេលដែលការត្រៀមខ្លួនរបស់ខ្ញុំបានរួចរាល់ ខ្ញុំមិនគិតថា អ្នកណាម្នាក់អាចឈ្នះខ្ញុំបាននោះទេ»។Mackធ្លាប់ប្រកួតឈ្នះ៣១លើក ចាញ់៤ ស្មើ២ និងផ្តួលគូប្រកួតឱ្យសន្លប់បាន១៧លើក ៕
ចែករំលែកព័តមាននេះ