កីឡាករអាល្លឺម៉ង់ John Degenkolbទទួលបានក្តីរីករាយជាថ្មីម្តងទៀតបន្ទាប់ពីបានយកឈ្នះណាក់ទី១០នៃការប្រណាំងកង់កម្មវិធី Tour of Spainនៅប្រទេសអេស្ប៉ាញកាលពីថ្ងៃអង្គារទី២៨ខែសីហាកន្លងមកនេះ។ ការប្រណាំងក្នុងដំណាក់នេះត្រូវបានបញ្ចប់នៅទីក្រុង Sanxenxo។
Degenkolbដែលជាអ្នកជិះកង់ឱ្យក្រុមArgos-Shimanoបានយកឈ្នះដំណាក់មានចម្ងាយផ្លូវ១៩០គីឡូម៉ែត្រដោយការប្រណាំងចេញដំណើរពីទីក្រុង Ponteareasឆ្ពោះទៅកាន់ទីក្រុង Sanxenxoប្រទេសអេស្ប៉ាញ ។ Degenkolbបានប្រើអស់ថិរវេលាតិចជាងគេបំផុតគឺ៤ម៉ោង៤៧នាទីនិង២៤វិនាទីយកឈ្នះកីឡាករបារាំង Nacer Bouhanniជិះឱ្យក្រុម FDJ-Big Mat និងបានយកឈ្នះកីឡាករអុីតាលី Daniele Bennati ជិះឱ្យក្រុម Radioshack-Nissanដែលទាំង២នាក់ប្រើថិរវេលាស្មើៗគ្នា។
សម្រាប់ Degenkolb នេះគឺជាជ័យជម្នះក្នុងដំណាក់លើកទី៣ហើយខណៈជ័យជម្នះលើកទី១គឺនៅក្នុងដំណាក់ទី២និងលើកទី២ក្នុងដំណាក់ទី៥ ។ គេបានថ្លែងក្នុងក្តីរីករាយថា៖«ខ្ញុំពិតជាសប្បាយចិត្តណាស់ដែលបានយកឈ្នះ១ដំណាក់ជាថ្មីទៀត។ នេះពិតជាជ័យជម្នះយ៉ាងពិសេសមួយដ្បិតការប្រណាំងនៅដំណាក់នេះប្រជុំទៅដោយកីឡាករជើងខ្លាំងជាច្រើន។ សង្ឃឹមថាជ័យជម្នះនៅដំណាក់ក្រោយៗគឺជារបស់ខ្ញុំទៀត។ ខ្ញុំនឹងប្រឹងប្រែងឱ្យអស់ពីលទ្ធភាពដើម្បីបន្តនិរន្តរ៍ភាពនៃជ័យជម្នះ»។បើទោះជារូបគេបានយកឈ្នះការប្រណាំងក្នុងដំណាក់ជាលើកទី៣ក្តី ក៏ប៉ុន្តែនៅលើតារាងពេលថិរវេលាសរុប រូបគេនៅតែពុំទាន់អាចដណ្តើមបានការនាំមុខជាដដែល ដ្បិតកីឡាករអេស្ប៉ាញ Joaquim Rodriguezដែលបានបញ្ចប់ដំណាក់នេះក្នុងលំដាប់ទី៤៦នោះ សន្សំពេលវេលាបានយ៉ាងល្អបំផុតគ្រងអាវកាក់ពណ៌ក្រហមក្នុងនាមជាអ្នកនាំមុខគេសម្រាប់ការប្រណាំងដដែល ។
ឆ្លងកាត់ការប្រណាំងចំនួន១០ដំណាក់មកនេះ Joaquim Rodriguezដែលជិះឱ្យក្រុម Katusha Teamបានប្រើអស់ថិរវេលាតិចជាងគេបំផុតគឺ៣៩ម៉ោងនិង៣២នាទីនិង២៣វិនាទីនាំមុខកីឡាករអង់គ្លេស Christopher Froomeដែលប្រើថិរវេលាច្រើនជាង៥៣វិនាទី។ ចំណែកកីឡាករអេស្ប៉ាញម្នាក់ទៀតអាល់បឺតូ កុងតាឌ័រស្ថិតនៅលំដាប់ទី៣បន្ទាប់ពីបានប្រើថិរវេលាច្រើនជាងកីឡាករ Rodriguez ១នាទី ។
សូមបញ្ជាក់ថាការប្រណាំងកម្មវិធី Tour of Spainឆ្នាំនេះចែកចេញជា២១ដំណាក់និងមានចម្ងាយផ្លូវសរុប៣៣៦០គីឡូម៉ែត្រ។ ដោយឡែកដំណាក់ទី១១ដែលជាដំណាក់បន្តមានចម្ងាយផ្លូវ៣៩.៤គីឡូម៉ែត្រដោយការប្រណាំងចាប់ចេញដំណើរពីទីក្រុង Cambados ឆ្ពោះទៅកាន់ទីក្រុង Pontevedraប្រទេសអេស្ប៉ាញ ៕
ចែករំលែកព័តមាននេះ