អ៊ែនឌី រ៉ូឌិកនិងនាងវេនីស វីលៀមអតីតម្ចាស់ជើងឯករួមនឹងនាងអានីយ៉េស្កា រែដវ៉ាន់ស្កាបានឈានចូលដល់ជុំទី២ក្របខណ្ឌ U.S Openកាលពីថ្ងៃអង្គារខណៈកីឡាករការពារជើងឯកសញ្ជាតិស៊ែប៊ីណូវ៉ាក៉យ៉ូកូវិចព្រមទាំងនាងស៊េរីណា វីលៀមកំពុងត្រៀមខ្លួនបញ្ចេញនូវអ្វីដែលខ្លួនមាន ។
រ៉ូឌិកដែលបានក្លាយជាម្ចាស់ពានជើងឯកក្របខណ្ឌធំចុងក្រោយរបស់អាមេរិកខណៈគេដណ្តើមពាន U.S Openឆ្នាំ ២០០៣បានយកឈ្នះកីឡាករមិត្តរួមជាតិរបស់ខ្លួន Rhyne Williamsយ៉ាងងាយស្រួល ។ ជាមួយនឹងលទ្ធផលជ័យជម្នះ៣សិតទល់នឹងសូន្យ ៦-៣,៦-៤និង៦-៤គឺជាការបើកផ្លូវដ៏រលូនមួយនៃការបង្ហាញខ្លួនក្នុងក្របខណ្ឌធំមួយនេះជាលើកទី១៣ ។ មួយវិញទៀតជ័យជម្នះនេះ វាបានកើតមានមុនថ្ងៃខួបកំណើត៣០ឆ្នាំរបស់គេតែ២ថ្ងៃប៉ុណ្ណោះ ។
កីឡាករលំដាប់ទី២០ក្នុងកម្មវិធីរូបនេះបានថ្លែងថា ៖«ខ្ញុំគិតថា ការប្រកួតកាន់តែត្រូវប្រើកម្លាំងកាយច្រើនហើយ »។ នៅជុំបន្ទាប់ រ៉ូឌិកនឹងប៉ះជាមួយកីឡាករអូស្ត្រាលី Bernard Tomic ឬកីឡាករ Carlos Berlocq ។ នាងវេនីស វីលៀមដែលជាម្ចាស់ពានឆ្នាំ២០០០និង២០០១ក៏បានឡើងទៅជុំបន្តផងដែរបន្ទាប់ពីបានបំបាក់កីឡាការិនីមិត្តរួមជាតិខ្លួន Bethanie Mattek-Sandsក្នុងលទ្ធផល៦-៣និង៦-១ ។
វេនីស វីលៀមដែលនេះជាការចូលរួមលើកទី១៤របស់នាងបានអវត្តមានពីកម្មវិធីប្រកួតចំនួន៩ខែបន្ទាប់ពីមានជំងឺហើយវិលចូលប្រកួតលើកនេះក្នុងនាមជាកីឡាការិនីលំដាប់ទី៤៦ ។ ជ័យជម្នះពេលនេះគឺជាការលួងលោមមួយចំពោះការឈឺចាប់នៃការបរាជ័យក្នុងជុំដំបូងរបស់នាងក្នុងក្របខណ្ឌធំ Wimbledon ខែកក្កដាកន្លងមកផងដែរ ។នៅជុំបន្ទាប់ កីឡាការិនីវ័យ៣២ឆ្នាំរូបនេះនឹងប៉ះជាមួយកីឡាការិនីអាល្លឺម៉ង់ Angelique Kerberដែលបានផ្តួលនាងក្នុងព្រឹត្តិការណ៍អូឡាំពិកក្រុងឡុងឆ្នាំ ២០១២ ។
ចំណែកនាងអានីយ៉េស្កា រែដវ៉ាន់ស្កាជ័យលាភីលេខ២ក្របខណ្ឌ Wimbledonឆ្នាំ ២០១២និងកីឡាការិនីស៊ែប៊ីអាណា អុីវ៉ាណូវិចក៏បានឆ្លងផុតជុំទី១ផងដែរ ។ ទាំងនាងរែដវ៉ាន់ស្កានិងនាងអុីវ៉ាណូវិចសុទ្ធតែមិនធ្លាប់មានប្រវត្តិឆ្លងផុតពីជុំទី៤ក្របខណ្ឌ U.S Openនេះទេពីមុនមក ប៉ុន្តែក្នុងក្របខណ្ឌធំ៣ផ្សេងទៀត ពួកគេធ្លាប់បានឈានចូលដល់វគ្គ១/៤ផ្តាច់ព្រ័ត្រ ។ សម្រាប់រែដវ៉ាន់ស្កា លទ្ធផលដ៏ល្អបំផុតរបស់នាងនៅទីនេះគឺក្នុងឆ្នាំ២០០៧ ប៉ុន្តែនៅឆ្នាំ ២០១១ នាងធ្លាក់ត្រឹមជុំទី២ ។ ជ័យជម្នះលើកនេះកើតមានបន្ទាប់ពីនាងបានបំបាក់កីឡាការិនីរុស្ស៊ី Nina Bratchikovaក្នុងលទ្ធផល ៦-១និង៦-១ ។
នៅជុំបន្ទាប់ នាងនឹងប៉ះជាមួយកីឡាការិនីអេស្ប៉ាញ Carla Suarez Navarro។ សូមបញ្ជាក់ថា រែដវ៉ាន់ស្កាគឺជាកីឡាការិនីប៉ូឡូញដំបូងគេដែលបានឈានចូលដល់វគ្គផ្តាច់ព្រ័ត្រក្របខណ្ឌ Wimbledonកាលពីខែកន្លងទៅ ។ កីឡាការិនីវ័យ២៣ឆ្នាំរូបនេះបានថ្លែងថា ៖«ចូលប្រកួតក្នុងនាមជាកីឡាការិនីចំណាត់ថ្នាក់លេខ២របស់កម្មវិធីគឺពិតជាពិបាកបន្តិចហើយ ។ នេះក៏ព្រោះតែមនុស្សជាច្រើនសង្ឃឹមថា ការប្រកួតរបស់យើងពិតជាបានល្អហើយអាចបន្តបានយូរ ។ ប៉ុន្តែយ៉ាងណា ខ្ញុំមិនគិតអំពីសម្ពាធទាំងនោះទេ ។ ខ្ញុំគ្មានពិន្ទុណាពីឆ្នាំមុនដែលត្រូវការពារនោះទេ ហើយនេះក៏ជារឿងល្អមួយផងដែរ »។រែដវ៉ាន់ស្កាបានទទួលស្គាល់ផងដែរថា របួសស្មាស្តាំរបស់ខ្លួននៅតែបង្កជាឧបសគ្គសម្រាប់នាងនៅឡើយ ។
សម្រាប់នាងអុីវ៉ាណូវិចវិញ គឺនាងធ្លាប់បានឈានចូលដល់ជុំទី៤ក្របខណ្ឌនេះចំនួន៣លើក(ឆ្នាំ២០០៧, ២០១០និង ២០១១) ។ ជ័យជម្នះក្នុងជុំទី១លើកនេះកើតមានក្រោយពីនាងបានបំបាក់កីឡាការិនីវ័យ១៧ឆ្នាំរបស់អ៊ុយក្រែន Elina Svitolinaក្នុងលទ្ធផល៦-៣និង៦-២ ។ នៅជុំបន្ទាប់នាងនឹងប៉ះជាមួយកីឡាការិនីស៊ុយអែត Sofia Arvidssonដែលបានបំបាក់កីឡាការិនីវ័យ៤១ឆ្នាំរបស់ជប៉ុន Kimiko Date Krummក្នុងលទ្ធផល ៦-៤និង៦-២ ។ ចំណែកនាង ប៉េង ស៊ូអាយកីឡាការិនីក្តីសង្ឃឹមអាស៊ីបានបរាជ័យក្រោមថ្វីដៃកីឡាការិនីរុស្ស៊ី Elena Vesninaក្នុងលទ្ធផល ៧-៦និង៦-១ ៕
ចែករំលែកព័តមាននេះ