រាជធានីភ្នំពេញ ៖ លោកទេសរដ្ឋមន្ត្រី ឱម យ៉ិនទៀង ប្រធានគណៈកម្មាធិការសិទ្ធិមនុស្សនិងជាប្រធានអង្គភាពរបស់រាជរដ្ឋាភិបាលកម្ពុជា បានមានប្រសាសន៍ថា គណបក្សប្រឆាំងមានឈ្មោះថា គណបក្សសង្គ្រោះជាតិ ដែលរួមគ្នាបង្កើតដោយគណបក្សសមរង្ស៊ី និងគណ បក្សសិទ្ធិមនុស្សនោះ មានផែនការបំផ្លាញគណៈកម្មាធិការជាតិរៀបចំការបោះឆ្នោត និងមានគម្រោងឲ្យសមាជិក២រូប របស់គណបក្សសមរង្ស៊ី ដើរចេញពីគណៈកម្មាធិការជាតិរៀបចំការបោះឆ្នោតនោះថែមទៀត ។
ថ្លែងប្រាប់ក្រុមអ្នករាយការណ៍ព័ត៌មាននៅព្រលានយន្តហោះអន្តរជាតិភ្នំពេញ ខណៈពេលដែលលោកទេសរដ្ឋមន្ត្រី ឱម យ៉ិនទៀង បានអញ្ជើញទៅជូនដំណើរសម្តេចនាយករដ្ឋមន្រ្តីទៅចូលរួមកិច្ចប្រជុំកំពូលលើកទី១៦នៃប្រទេសចលនាមិនចូលបក្សសម្ព័ន្ឋនៅប្រទេសអ៊ីរ៉ង់ នាព្រឹកថ្ងៃទី២៩ សីហា ២០១២ លោកឱម យ៉ិនទៀង ក៏មានប្រតិកម្មតបទៅនឹងរបាយការណ៍ពីសិទ្ធិមនុស្សនៅកម្ពុជា ដែលសរសេរដោយលោកសូរិយា ស៊ូប៊ែរឌីប្រេសិតពិសេសរបស់លោកអគ្គលេខាធិការអង្គការសហប្រជាជាតិទទួលបន្ទុកសិទ្ធិមនុស្សប្រចំាកម្ពុជា ដោយលើកឡើងថា លោកស៊ូប៊ែរឌីគួរតែទៅធ្វើជាទីប្រឹក្សារបស់គណបក្សប្រឆាំងជាជាងធ្វើជាអ្នករាយការណ៍ពិសេសរបស់អង្គការសហប្រជាជាតិ ។
គួរបញ្ជាក់ថា កាលពីថ្ងៃទី២៧ សីហា ឆ្នាំ២០១២ការិយាល័យឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្សប្រចាំកម្ពុជា បានចេញរបាយការណ៍ឆ្នាំ២០១២របស់លោកសូរិយា ស៊ូប៊ែរឌី ដោយក្នុងរបាយការណ៍នោះ លោកសូរិយា ស៊ូប៊ែរឌី បានថ្លែងថា កម្ពុជាទទួលបានអនុសាសន៍ជាច្រើនទាំងទ្វេភាគី និងពហុភាគី ដោយអង្គការផ្សេងៗ ប៉ុន្តែវា «គួរឲ្យសោកស្តាយ» ដែលអនុសាសន៍ភាគច្រើនបំផុតដែលកម្ពុជាទទួលបាន ដើម្បីកែលម្អស្ថានភាពសិទ្ធិមនុស្ស និងសិទ្ធិនយោបាយនៅតែមិនមានការអនុវត្តន៍ ។
នៅក្នុងរបាយការណ៍របស់លោកប្រេសិតពិសេសរបស់លោកអគ្គលេខាធិការអង្គការសហប្រជាជាតិទទួលបន្ទុកសិទ្ធិមនុស្សប្រចំាកម្ពុជា បានបន្តថា មានចំណុចគុណវិបត្តិចម្បងៗនៅក្នុងការគ្រប់គ្រងការបោះឆ្នោតក្នុងប្រទេសកម្ពុជា ហើយត្រូវធ្វើកំណែទម្រង់បន្ទាន់ និងរយៈពេលយូរ ដើម្បីផ្តល់ឲ្យកម្ពុជានូវទំនុកចិត្ត នៅក្នុងដំណើរការបោះឆ្នោតនិងនៅក្នុងការធ្វើការងាររបស់គណៈកម្មាធិការជាតិរៀបចំការបោះឆ្នោត ។ លោក ស៊ូប៊ែរឌី បានសរសេរនៅក្នុងរបាយការណ៍ថា ប្រជាជនកម្ពុជាមានភាពស៊ាំទៅនឹងការនិយាយថា ការបោះឆ្នោតប្រជាធិបតេយ្យ ហើយបញ្ហាប្រឈមចម្បង គឺជាការបន្ទុចបង្អាក់ការនាំលទ្ធិប្រជាធិបតេយ្យសម្រាប់ជនកម្ពុជាវ័យក្មេង។
គួរបញ្ជាក់ថា លោកស៊ូប៊ែរឌី ក៏បានរៀបចំឧបសម្ព័ន្ធបន្ថែមសម្រាប់របាយការណ៍របស់លោកផងដែរ ដែលនឹងចេញនៅខែកញ្ញា២០១២នេះ ហើយនឹងផ្តោតលើបញ្ហានៃផលប៉ះពាល់ដោយសារសម្បទានដីសេដ្ឋកិច្ច ។ លោកបន្តថា ការខាតបង់របស់ប្រជាជនពីសម្បទានបែបនោះ គឺមានកម្រិតខ្ពស់ ហើយឧបសម្ព័ន្ធនោះនឹងផ្តល់នូវការវិភាគ និងអនុសាសន៍ផងដែរ ដើម្បីឆ្លើយតបទៅនឹងផលប៉ះពាល់ទៅលើជីវិតប្រជាជនបណ្តាលមកពីបញ្ហាសម្បទានដីសេដ្ឋកិច្ចទាំងនោះ ជាពិសេសប្រជាជនក្រីក្រតាមជនបទ ប្រជាជនជាជនជាតិភាគតិច និងជនទាំងឡាយ ដែលមានភាពទន់ខ្សោយ ។
លោកស៊ូប៊ែរឌី បន្តថា ការបន្តដាក់កម្រិតលើសេរីភាពនៃការបញ្ចេញមតិ បានធ្វើឲ្យប៉ះពាល់ដល់សេរីភាព នៃការបញ្ចេញមតិក្នុងប្រទេសកម្ពុជា ។ ជាពិសេសអំពីហានិភ័យ និងបញ្ហាប្រឈមរបស់ក្រុមអ្នកការពារសិទ្ធិមនុស្ស ដែលកំពុងតែមាននិន្នាការកើនឡើង ក្នុងនោះក៏មានការប្រើកាំភ្លើងបាញ់លើប្រជាជនផងដែរ ។យ៉ាងណាក៏ដោយលោកទេសរដ្ឋមន្ត្រី ឱម យ៉ិនទៀង ប្រធានគណៈកម្មាធិការសិទ្ធិមនុស្សកម្ពុជាបានបញ្ជាក់ទៀតថា ស្ថានភាពសិទ្ធិមនុស្សនៅកម្ពុជា មានលក្ខណៈល្អប្រសើរមិនដូចអ្វីដែលលោកស៊ូប៊ែរឌី បានលើកឡើងនោះទេ ហើយថារបាយការណ៍របស់លោកសូរិយា ស៊ូប៊ែរឌីនោះ គ្រាន់តែនិយាយតាមអង្គការសង្គមស៊ីវិលមួយចំនួន និងនិយាយតាមបក្សប្រឆាំងប៉ុណ្ណោះ ៕
ចែករំលែកព័តមាននេះ