ខេត្តកំពត ៖ ប្តីប្រពន្ធ២នាក់របួសធ្ងន់ និងកូនតូចម្នាក់អាយុជាង២ខែបានស្លាប់ក្នុងគ្រោះថ្នាក់ចរាចរណ៍មួយបង្កឡើងដោយរថយន្តបុកជាមួយម៉ូតូកាលពីវេលាម៉ោង៩និង៣០នាទីព្រឹកថ្ងៃទី២៩ សីហា តាមបណ្តោយផ្លូវជាតិលេខ៣៣ ចំណុចខាងកើតស្ពានក្បាលរមាស ចម្ងាយ៣៥០ម៉ែត្រ ស្ថិតនៅភូមិជុំគ្រាល ឃុំជុំគ្រាល ស្រុកទឹកឈូ ។
មន្ត្រីនគរបាលចរាចរដែលបានចុះទៅដល់កន្លែងកើតហេតុបានឱ្យដឹងថា រថយន្តខាងលើបើកបរក្នុងទិសដៅពីកើតទៅលិចបញ្ច្រាសទិសជាមួយម៉ូតូ លុះមកដល់ចំណុចកើតហេតុរថយន្តស្រាប់តែរេចង្កូតទៅបុកម៉ូតូម៉ាកសេ១២៥ ស៊េរី២០១០ ដែលកំពុងជិះឌុបគ្នាប្តីប្រពន្ធ និងកូន បណ្តាលឱ្យកូនស្លាប់ ដោយបែកក្បាលធ្លាយខួរ ឯស្ត្រីជាម្តាយរបួសបាក់ជើងឆ្វេង២-៣កំណាត់ ដោយឡែកបុរសជាប្តីបែកក្បាលចេញឈាមតាមត្រចៀកសន្លប់ស្តូក ។ ប៉ូលិសបញ្ជាក់ថា បន្ទាប់ពីបុកម៉ូតូហើយរថយន្តបានបន្តទៅបុកដើមអម្ពិលនៅចិញ្ចើមផ្លូវជាប់នឹងដើមអម្ពិលនោះ ទៅមុខលែងរួចតែម្តង ។ ក្រោយពេលកើតហេតុអ្នកបើកបរបានរត់គេចខ្លួនបាត់ ។ ប៉ូលិសសន្និដ្ឋានថា មូលហេតុនៃការបុកនេះអាចបណ្តាលមកពីអ្នកបើកបររថយន្តស្រវឹង ឬងងុយដេក ព្រោះនៅក្នុងកាប៊ីនរថយន្តឃើញមានកំប៉ុងស្រាបៀរជាច្រើនកំប៉ុងផងដែរ ។ ប្តីប្រពន្ធដែលរងរបួសធ្ងន់ត្រូវប៉ូលិសបញ្ជូនទៅមន្ទីរពេទ្យ ឯសពក្មេងរងគ្រោះនៅកន្លែងកើតហេតុនៅឡើយ រង់ចាំសាច់ញាតិមកទទួលយកទៅធ្វើបុណ្យ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ