រាជធានីភ្នំពេញ ៖ តាមការឱ្យដឹងរបស់មន្ត្រីអ្នកនាំពាក្យក្រសួងការបរទេស និងសហប្រតិបត្តិការអន្តរជាតិថា កម្ពុជា នឹងបញ្ជូនឯកអគ្គរាជទូតថ្មីទៅកាន់ប្រទេសហ្វ៊ីលីពីន នាពេលឆាប់ៗខាងមុខនេះ បន្ទាប់ពីឯកអគ្គរាជទូតមុនបានបញ្ចប់អាណត្តិ ។
លោកកុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានមានប្រសាសន៍ថា កម្ពុជាកំពុងតែរៀបចំបែបបទដើម្បីត្រៀមបញ្ជូនឯកអគ្គរាជទូតថ្មីទៅបំពេញបេសកកម្មការទូតនៅប្រទេសហ្វ៊ីលីពីនដែលជាការផ្លាស់ប្តូរឯកអគ្គរាជទូតមុនដែលត្រូវបញ្ចប់អាណត្តិ និងវិលមកមាតុប្រទេសវិញ ។
មន្ត្រីអ្នកនាំពាក្យរូបនោះបានប្រាប់អ្នកកាសែតនៅក្រោយជំនួបរវាងលោកឧបនាយករដ្ឋមន្ត្រី ហោ ណាំហុង និងលោកឯកអគ្គរដ្ឋទូតថ្មីប្រទេសម៉ុងហ្គោលី ប្រចាំកម្ពុជា កាលពីថ្ងៃទី២៧ សីហា នេះថា ប្រទេសកម្ពុជា និងប្រទេសហ្វ៊ីលីពីន នៅតែមានទំនាក់ទំនងល្អជាមួយគ្នាជាធម្មតា បើទោះបី ជាមានការផ្លាស់ប្តូរមន្ត្រីការទូតក៏ដោយ ។
លោកបញ្ជាក់បន្ថែមថា ការផ្លាស់ប្តូរមន្ត្រីការទូត គឺជារឿងផ្ទៃក្នុងរបស់កម្ពុជា មិនប៉ះពាល់ដល់ទំនាក់ទំនងរវាងប្រទេសទាំងពីរនោះឡើយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ