រាជធានីភ្នំពេញ ៖ មន្ត្រីយោធាម្នាក់មានឋានន្តរស័ក្តិវរសេនីយ៍ត្រី(ស័ក្ក៤)ដែលមួម៉ៅចាញ់ល្បែងផង និងប្រពន្ធក៏សុំលែងលះទៀត បែរជាក្លាយទៅជាជនដ៏កំណាចបំផុតជាងសត្វតិរច្ឆានទៅទៀតដោយសារតែសម្លាប់កូនប្រុសបង្កើតរបស់ខ្លួន២នាក់ដោយចាប់អារ.ក ហើយបន្ទាប់មកបុរសជាឪពុកតិរច្ឆានរូបនោះបានយកកូនកាំបិតចាក់ផ្តាច់សរសៃឈាមកដៃខ្លួនឯងប៉ុនប៉ងសម្លាប់ខ្លួនដែរ ប៉ុន្តែមិនស្លាប់ត្រូវបានគេនាំទៅសង្គ្រោះបន្ទាន់នៅមន្ទីរពេទ្យកាល់ម៉ែត។ នេះគឺជារឿងមួយគួរឱ្យសង្វេគនិងរន្ធត់បំផុត មិនអាចអត់ឱនបាននោះឡើយចំពោះជនកំណាចឃោរឃៅបែបនេះ ព្រោះសូម្បីតែសត្វខ្លាក៏មិនស៊ីកូនឯងដែរ ។
ហេតុការណ៍គួរឱ្យភ្ញាក់ផ្អើលនោះបានកើតឡើងកាលពីវេលាម៉ោង៧និង៤០នាទីព្រឹកថ្ងៃទី២៨ សីហា ម្សិលមិញនៅក្នុងផ្ទះលេខI១៥ បុរីប៊ុនហួរដែលមានទីតាំងស្ថិតនៅតាមបណ្តោយផ្លូវជាតិលេខ៣ ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
ឪពុកកំណាចព្រៃផ្សៃនេះឈ្មោះកែវ ឡាដាំង អាយុ៣៨ឆ្នាំ ជានាយទាហានមានឋានន្តរសក្តិវរសេនីយ៍ត្រីផ្នែករដ្ឋបាលវិស្វកម្មអគ្គ បញ្ជាការដ្ឋានកងទ័ពជើងគោក និងមានទីលំនៅភូមិព្រៃជីសាក់ សង្កាត់ចោមចៅបានចាក់កដៃខ្លួនឯងរបួសធ្ងន់ ។
ដោយឡែកកូនប្រុសដែលត្រូវជននេះអារកសម្លាប់ដោយគ្មានទោសកំហុសបន្តិចណាសោះនោះ ម្នាក់ឈ្មោះកែវ សុវណ្ណ អាយុ៦ឆ្នាំ និងម្នាក់ទៀតឈ្មោះកែវ រ៉ា អាយុ៣ឆ្នាំត្រូវបានគេប្រទះឃើញដេកស្លាប់ទន្ទឹមគ្នានៅលើគ្រែពូកទាំង២នាក់ ។
តាមប្រភពព័ត៌មានពីកន្លែងកើតហេតុបានឱ្យដឹងថា បុរសរូបនោះទើបលែងលះគ្នាជាមួយប្រពន្ធឈ្មោះមាស ម៉ូលីកា អាយុប្រហែល៣០ឆ្នាំអស់រយៈពេល៥ខែ តាំងពីខែមេសាមកម៉្លេះ ហើយការលែងលះនោះបណ្តាលមកពីបុរសនោះញៀននឹងល្បែង និងលេងចាញ់អស់ប្រាក់រាប់ម៉ឺនដុល្លារ ទើបទីបំផុតប្រពន្ធក៏សុំលែង ។ ម្យ៉ាងទៀតការលែងលះគ្នានោះបានធ្វើឡើងតាមរយៈតុលាការ ប៉ុន្តែមិនទាន់មានសាលក្រមចេញនៅឡើយទេ ។ បន្ទាប់ពីចែកផ្លូវគ្នារួច ស្ត្រីជាប្រពន្ធបានទៅរស់នៅឯផ្ទះខាងម្តាយនៅឃុំរកាកោង ស្រុកមុខកំពូល ខេត្តកណ្តាល ។ ចំណែកឯបុរសជាប្តីរូបនេះបានរស់នៅជាមួយកូនប្រុសទាំងពីរនាក់ ។
ប្រភពដដែលបានបន្តទៀតថា បុរសនេះញៀននឹងល្បែងខ្លាំងណាស់ លេងចាញ់យ៉ាងផ្កាប់មុខអស់លុយពីខ្លួន ហើយកាលពីមុននេះបានរស់នៅក្នុងផ្ទះរបស់ខ្លួននៅឯភូមិជ្រៃកោង សង្កាត់ចោមចៅ លុះក្រោយមកបានជួលផ្ទះនោះទៅឱ្យគេ រួចបាននាំកូនប្រុសទាំងពីរនាក់ទៅរស់នៅជាមួយឪពុក ដែលមានឋានន្តរសក្តិជាឧត្តមសេនីយ៍នៅក្នុងផ្ទះកើតហេតុខាងលើនេះ ។
តាមប្រភពព័ត៌មានបានឱ្យដឹងថា នៅវេលាយប់ថ្ងៃទី២៧ សីហា មុនពេលកើតហេតុខាងលើនៅម៉ោង១រំលងអធ្រាត្រ បុរសកំណាចនាំកូនប្រុសទាំងពីរចូលដេកនៅក្នុងបន្ទប់លើផ្ទះជាន់ទី២ ពេលនោះមិនមាននរណាម្នាក់បានដឹងថាគាត់មានគំនិតអាក្រក់រៀបចំសម្លាប់កូនខ្លួនឯងបែបនេះឡើយ ។
ប្រភពដដែលបានបន្តទៀតថា រហូតដល់វេលាម៉ោងប្រមាណ៧និង៤០នាទីព្រឹកថ្ងៃទី២៨ សីហា ដោយសារមិនឃើញបុរសនោះនិងកូនៗក្រោកពីដំណេកស្រស់ស្រូបអាហារពេលព្រឹកដូចធម្មតា ទើបស្ត្រីជាម្តាយនិងត្រូវជាជីដូនបានទៅគោះទ្វារហៅឱ្យក្រោកដើម្បីស្រស់ស្រូបអាហារពេលព្រឹក ។ ខណៈនោះទ្វារជាប់គន្លឹះនៅខាងក្នុង ហើយនៅពេលគោះខ្លាំងពេកបុរសជាឃាតករសម្លាប់កូនឯងនោះបានលូនទៅបើកទ្វារឱ្យ ។ ពេលនោះស្ត្រីជាម្តាយនិងជាជីដូនមានការតក់ស្លុតយ៉ាងខ្លាំង ព្រោះបានឃើញចៅប្រុស២នាក់ដេកស្លាប់ក្បែរគ្នានៅក្នុងថ្លុកឈាមលើគ្រែពូកគួរឱ្យសង្វេគបំផុត ឯកូនប្រុសជាជនដៃដល់ មានរបួសនៅកដៃ ។ បន្ទាប់ពីបើកទ្វារឱ្យម្តាយហើយ ជនកំណាចនោះបានសន្លប់បាត់ស្មារតី ដោយនៅក្នុងដៃមានកាន់កូនកាំបិត១ផងដែរ និងមានកូនកាំបិតមួយទៀតស្ថិតនៅក្បែរគ្រែដេកនោះប្រឡាក់ទៅដោយឈាមក្រហមច្រាល ។
ប្រភពដដែលបន្តទៀតថា បន្ទាប់ពីបានឃើញស្ថានភាពបែបនេះស្ត្រីជាម្តាយនិងជាជីដូនបានស្រែកឆោឡោបង្កឱ្យមានការភ្ញាក់ផ្អើលឡើងយ៉ាងខ្លាំង និងបានហៅរថយន្តពេទ្យទៅដឹកជននោះទៅកាន់មន្ទីរពេទ្យកាល់ម៉ែត ដើម្បីសង្គ្រោះបន្ទាន់ ហើយនៅក្នុងខណៈនោះមានមនុស្សម្នាផ្អើលនាំគ្នាទៅចោមរោមមើលយ៉ាងកកកុញនិងសម្តែងនូវការរន្ធត់ចិត្ត ព្រមទាំងថ្កោលទោសចំពោះបុរសជាឪពុករូបនោះគ្រប់ៗគ្នាដែលមានចិត្តឃោរឃៅ ។ បន្ទាប់មកសមត្ថកិច្ចមូលដ្ឋានបានចុះទៅកាន់កន្លែងកើតហេតុធ្វើកោសលវិច័យលើខ្លួនសពក្មេងប្រុសទាំង២នាក់ ឃើញថាបុរសជាឪពុកបានអារនិងចាក់កកូនប្រុសខ្លួនឯង ទាំង២នាក់ ។
លោកវរសេនីយ៍ទោ ប៊ន សំអាតអធិការប៉ូលិសខណ្ឌពោធិ៍សែនជ័យបានមានប្រសាសន៍ថាលោកនឹងចាត់ការចាប់ខ្លួនជនជាឃាតករមកធ្វើការសាកសួរក្រោយពេលការព្យាបាលរបួសបន្ទាន់នៅមន្ទីរពេទ្យបានបញ្ចប់នោះ ៕
ចែករំលែកព័តមាននេះ