ខេត្តកណ្តាល៖ យុវជនម្នាក់បានត្រូវចោទប្រកាន់ថា ឆបោកយកម៉ូតូរបស់អនាគតប្អូនថ្លៃ និងអ្នកជិតខាងជាបន្តបន្ទាប់អស់ចំនួន២គ្រឿង ហើយគេចខ្លួនបាត់ដោយទុកឱ្យប្អូនស្រីក្លាយជាស្ត្រីមេម៉ាយខាន់ស្លា ដោយសារតែខាងប្រុសផ្តាច់ពាក្យវិញ ទោះបីជាប្អូនស្រីមិនមានកំហុសក្តី ។ ហេតុការណ៍ឆបោកយកម៉ូតូនេះបានកើតឡើងជាបន្តបន្ទាប់ ដែលមួយគ្រឿង កាលពីថ្ងៃទី១៧ សីហា នៅភូមិលេខ៤ ឃុំស្វាយរលំ ស្រុកស្អាង និងមួយគ្រឿងទៀតកាលពីថ្ងៃទី២០ សីហា នៅរាជធានីភ្នំពេញ ។
អធិការរងនគរបាលស្រុកស្អាងលោក លន ចាន់ថា បានឱ្យដឹងថា ម្ចាស់ម៉ូតូមាន២នាក់ម្នាក់ឈ្មោះ សេក វណ្ឌី ភេទប្រុស អាយុ៣២ឆ្នាំ មុខរបរលក់ដូរ ជាម្ចាស់ម៉ូតូហុងដាសេ១២៥ ស៊េរីឆ្នាំ២០១២ ពណ៌ខ្មៅ និងត្រូវជាអនាគតប្អូនថ្លៃជនសង្ស័យ និងម្នាក់ទៀតឈ្មោះ ភី ភ័ណ ភេទប្រុស អាយុ៣៥ឆ្នាំ មុខរបរលក់ដូរ ជាម្ចាស់ម៉ូតូSLពណ៌ទឹកប្រាក់ ពាក់ស្លាកលេខភ្នំពេញ1AQ-1995 អ្នកទាំង២នាក់មានទីលំនៅក្នុងភូមិលេខ៤ ឃុំស្វាយរលំ ស្រុកស្អាង ។ ចំណែកជនសង្ស័យឈ្មោះ ចែម វិចិត្រ ភេទប្រុស អាយុ២៦ឆ្នាំ មានស្រុកកំណើតនៅភូមិជើងព្រៃ ឃុំជើងព្រៃ ស្រុកបាធាយ ខេត្តកំពង់ចាម បច្ចុប្បន្នស្នាក់នៅរាជធានីភ្នំពេញ ។
លោកអធិការរងបានឱ្យដឹងទៀតថា កាលពីថ្ងៃទី១៣ កក្កដា ឆ្នាំ២០១២ ឈ្មោះ សេក វណ្ឌី បាននាំម្តាយឪពុករបស់គេមកចូលស្តីដណ្តឹងនាងជី ស្រីមុំ អាយុ១៨ឆ្នាំ ព្រមទាំងបានរៀបចំពិធីភ្ជាប់ពាក្យត្រឹមត្រូវដោយមានចាស់ទុំទាំងសងខាងដឹងឮផង ។ ក្រោយពីភ្ជាប់ពាក្យរួច ឈ្មោះ ចែម វិចិត្រ បានចេញចូលផ្ទះព្រមទាំងបានរាប់រកអ្នកជិតខាងជាធម្មតា និងបានលក់ម៉ូតូសេ១២៥ ស៊េរី២០១២មួយគ្រឿងមកឱ្យឈ្មោះ សេក វណ្ឌី ដែលជាអនាគតប្អូនថ្លៃ តែម៉ូតូនោះនៅពុំទាន់បានធ្វើស្លាកលេខនៅឡើយទេ ។ លុះនៅថ្ងៃទី១៧ សីហា ឈ្មោះ ចែម វិចិត្រ និយាយថា គេយកម៉ូតូទៅធ្វើស្លាកលេខនៅភ្នំពេញឱ្យហើយក៏ជិះម៉ូតូមកភ្នំពេញបាត់ទៅ រហូតដល់ព្រឹកថ្ងៃទី១៨ សីហា ក៏ជិះម៉ូតូត្រឡប់មកផ្ទះវិញ ហើយប្រាប់ថា មិនទាន់បានស្លាកលេខទេ ទើបនៅព្រឹកថ្ងៃទី១៩ សីហា អនាគតបងថ្លៃនេះបានយកម៉ូតូជិះដោយប្រាប់ថាទៅយកស្លាកលេខម្តងទៀត ។
នៅល្ងាចថ្ងៃទី១៩ សីហា ឈ្មោះ ចែម វិចិត្រ បានទូរស័ព្ទប្រាប់ថា មិនទាន់បានយកម៉ូតូត្រឡប់ទៅផ្ទះទេ ព្រោះមេប្រើឱ្យចុះតាមខេត្ត ហើយចាប់តាំងពីពេលនោះមកឈ្មោះនេះក៏បានទាក់ទងមកផ្ទះជារៀងរាល់ថ្ងៃ ។ លុះមកដល់ថ្ងៃទី ២០ សីហា ក៏បានទូរស័ព្ទមកប្រាប់ថា ចង់ទិញម៉ូតូSLមួយគ្រឿងជិះ ហើយគេបានឱ្យសេក វណ្ឌី បបួលឈ្មោះ ភី ភ័ណ ទៅជួយមើលដើម្បីទិញម៉ូតូនៅឃ្លាំងក្នុងរាជធានីភ្នំពេញ ។ បន្ទាប់ពីឮបងថ្លៃប្រាប់ អនាគតប្អូនថ្លៃក៏បានទៅបបួលឈ្មោះ ភី ភ័ណ ដែលជាអ្នកជិតខាងទៅជាមួយ ដោយជិះម៉ូតូSLរបស់ឈ្មោះ ភី ភ័ណ ។ ពេលទៅដល់ភ្នំពេញក៏បានជួបឈ្មោះចែម វិចិត្រ ហើយត្រូវបានឈ្មោះនេះខ្ចីជិះសាកម៉ូតូម៉ាកSLនោះព្រោះខ្លួនត្រៀមនឹងទិញដែរក៏ជិះទៅបាត់មួយគ្រឿងទៀត ។
លោកអធិការរងបានឱ្យដឹងទៀតថា ជនសង្ស័យឈ្មោះ ចែម វិចិត្រ ធ្លាប់ជាប់ចោទពីបទឆបោក ហើយឈ្មោះនេះក៏ធ្លាប់ជាប់ពន្ធនាគារដែរ ។ លោកអធិការរងបានបញ្ជាក់ថា លោកនឹងបន្តស្រាវជ្រាវដើម្បីឈានទៅដល់ការឃាត់ខ្លួនជនសង្ស័យឈ្មោះ ចែម វិចិត្រ នេះយកមកផ្តន្ទាទោសតាមច្បាប់៕
ចែករំលែកព័តមាននេះ