រាជធានីភ្នំពេញ ៖ លោកឧត្តមសេនីយ៍ឯក សុខ ផល អគ្គស្នងការរងនគរបាលជាតិ តំណាងលោកនាយឧត្តមសេនីយ៍អគ្គស្នងការនគរបាលជាតិ បានបើកកិច្ចប្រជុំផ្សព្វផ្សាយគោលការណ៍ណែនាំការងារគ្រប់ការស៊ីណូ ដែលប្រារព្ធធ្វើឡើងនៅសាលប្រជុំអគ្គស្នងការដ្ឋាននគរបាលជាតិ កាលពីព្រឹកថ្ងៃទី២៨ សីហា ដោយមានការចូលរួមពីម្ចាស់ក្រុមហ៊ុន និងតំណាងកាស៊ីណូជាង៦០ ។
នៅក្នុងកិច្ចប្រជុំនេះ លោកឧត្តមសេនីយ៍ទោ ឆៃ ស៊ីណារិទ្ធ ប្រធាននាយកដ្ឋានសន្តិសុខផ្ទៃក្នុងក្រសួងមហាផ្ទៃ បានគូសបញ្ជាក់ថា គិតត្រឹមខែសីហា ឆ្នាំ២០១២ ក្រុមហ៊ុនកាស៊ីណូដែលទទួលបានគោលការណ៍អនុញ្ញាតពីរាជរដ្ឋាភិបាល មានចំនួន៩៧ក្រុមហ៊ុន ក្នុងនោះបានដំណើរការអាជីវកម្មមានចំនួន៦១ក្រុមហ៊ុន ។ របាយការណ៍នេះបានបញ្ជាក់បន្ថែមថា ក្នុងនោះក្រុមហ៊ុនមានអាជ្ញាប័ណ្ណពីក្រសួងសេដ្ឋកិច្ច និងហិរញ្ញវត្ថុមានចំនួន៥០ក្រុមហ៊ុន និងមិនទាន់មានអាជ្ញាប័ណ្ណពីក្រសួងសេដ្ឋកិច្ច និងហិរញ្ញវត្ថុចំនួន១១ក្រុមហ៊ុន ។ ជាមួយគ្នានេះ ក្រុមហ៊ុនកាស៊ីណូដែលក្ស័យធនមានចំនួន៦ និង៣០ក្រុមហ៊ុនទៀតពុំទាន់បានដំណើរការអាជីវកម្មនៅឡើយ ។
ចំណុចមួយចំនួនដែលត្រូវបានកត់សម្គាល់នោះគឺ ទោះបីដំណើរការអាជីវកម្មកាស៊ីណូមានការរីកចម្រើន ប៉ុន្តែនៅមិនទាន់បានអនុវត្តឱ្យបានម៉ឺងម៉ាត់នូវគោលការណ៍របស់រាជរដ្ឋាភិបាលនៅឡើយទេ ដូចជាការហាមឃាត់ពលរដ្ឋខ្មែរចូលលេងល្បែងដែលធ្វើឱ្យមតិសាធារណៈយល់ថា អាជីវកម្មកាស៊ីណូកំពុងធ្វើឱ្យប៉ះពាល់ដល់ជីវភាពសង្គម ទន្ទឹមនេះបទល្មើសនៅក្នុងកាស៊ីណូ ក៏បានកើតឡើងជាបន្តបន្ទាប់ដូចជា ករណីឃាតកម្មជាដើម ។ តាមរបាយការណ៍បានបង្ហាញថា ក្នុងរយៈពេល៨ខែឆ្នាំ២០១២ បទល្មើសក្នុងកាស៊ីណូបានកើតឡើងចំនួន៧ករណី ក្នុងនោះមានការចាប់បង្ខាំងមនុស្សជំរិតទារប្រាក់ ករណីជួញដូរ និងប្រើប្រាស់គ្រឿងញៀន ករណីលេងបន្លំកាស៊ីណូ ការណីប្រើប្រាស់កាក់ក្លែងក្លាយ និងករណីធ្វើអាជីវកម្មអនឡាញខុសច្បាប់ ។
របាយការណ៍របស់នាយកដ្ឋានសន្តិសុខផ្ទៃក្នុង ក៏បានឱ្យដឹងដែរថា រយៈពេល៨ខែឆ្នាំ២០១២ នេះបានបង្ក្រាបបទល្មើសដែលកើតឡើងក្នុងកាស៊ីណូបានចំនួន៧ករណី និងបញ្ជូនជនត្រូវចោទទៅសាលាដំបូងចំនួន១៤នាក់ ក្នុងនោះកាស៊ីណូខេត្តស្វាយរៀងមានចំនួន៥ករណីរួមមាន ករណីបង្ខាំងមនុស្សជំរិតទារប្រាក់ចំនួន១ករណី នៅកាស៊ីណូបាវិត-ម៉ុកបាយ និងឃាត់ខ្លួនជនសង្ស័យចំនួន៣នាក់ រំដោះបានជនរងគ្រោះម្នាក់ និងកសាងសំណុំរឿងបញ្ជូនជនសង្ស័យ៣នាក់ទៅសាលាដំបូងខេត្តស្វាយរៀងដើម្បីចាត់ការតាមនីតិវិធី ។ ករណីប្រើកាក់កាស៊ីណូក្លែងបន្លំចំនួន១ករណី នៅកាស៊ីណូពិភពថ្មី ករណីធ្វើអាជីវកម្មអនឡាញខុសច្បាប់ចំនួន២ករណី នៅផ្ទះសំណាក់ជាលាង កាស៊ីណូបាវិត-ម៉ុកបាយ និងកាស៊ីណូក្រោនបាវិត ឃាត់ខ្លួន និងបញ្ជូនជនសង្ស័យទៅសាលាដំបូងខេត្តស្វាយរៀងចំនួន៦នាក់ ។ ករណីលេងបន្លំកាស៊ីណូចំនួន១ករណី នៅកាស៊ីណូឡាក់គី៨៩ ។
ចំណែកកាស៊ីណូនៅខេត្តបន្ទាយមានជ័យមាន២ករណីគឺ ករណីជួញដូរ ប្រើប្រាស់គ្រឿងញៀនខុសច្បាប់ចំនួន១ករណី នៅកាស៊ីណូហ្គោលឌិនក្រោន ដោយឃាត់ខ្លួនជនសង្ស័យម្នាក់ បញ្ជូនទៅសាលាដំបូងខេត្ត និងករណីបង្ខាំងមនុស្សជំរិតទារប្រាក់ចំនួន១ករណីនៅកាស៊ីណូស្តាវេហ្គាស់ ដោយរំដោះជនរងគ្រោះបានចំនួន៥នាក់ និងឃាត់ខ្លួនជនសង្ស័យបានចំនួន៤នាក់ បញ្ជូនទៅលាលាដំបូងខេត្តបន្ទាយមានជ័យ ។
លោកឧត្តមសេនីយ៍ទោ ឆៃ ស៊ីណារិទ្ធ បានសង្កត់ធ្ងន់ថា ម្ចាស់កាស៊ីណូពុំទាន់មានឆន្ទៈភ្ញាក់រលឹកអនុវត្តតាមគោលការណ៍របស់រាជរដ្ឋាភិបាល ដោយនៅតែបង្កើតឱ្យមានរចនាសម័្ពន្ធស្មុគស្មាញ មិនកំណត់ច្រកចេញចូលលេងល្បែងច្បាស់លាស់ និងមិនមានប៉ុស្តិ៍ត្រួតពិនិត្យត្រឹមត្រូវជាហេតុនាំឱ្យពលរដ្ឋខ្មែរលួចបន្លំចូលលេងល្បែងក្នុងកាស៊ីណូ ។ ជាមួយនេះ ម្ចាស់កាស៊ីណូមិនទាន់សហការល្អជាមួយសមត្ថកិច្ចលើការគ្រប់គ្រងអាជីវកម្មរណបការត្រួតពិនិត្យសកម្មភាពរបស់អ្នកលេងល្បែងក្នុងកាស៊ីណូ ។ ម្ចាស់កាស៊ីណូ មិនសហការផ្តល់ព័ត៌មានទាន់ពេលវេលាដែលជាហេតុនាំឱ្យជនល្មើសឆ្លៀតឱកាសប្រព្រឹត្តបទល្មើសក្នុងបរិវេណកាស៊ីណូ ឬក្នុងសណ្ឋាគាររបស់ខ្លួន ។
លោកឧត្តមសេនីយ៍ឯក សុខ ផល បានមានមតិផ្តាំផ្ញើ និងណែនាំដល់ម្ចាស់កាស៊ីណូ ត្រូវតែពង្រឹងការងារសន្តិសុខ សុវត្ថិភាព កុំឱ្យកើតមានអំពើអវិជ្ជមានមួយចំនួនដូចជា ការធ្វើភេរវកម្ម ការបង្កើតឱ្យមានអសន្តិសុខ អំពើកាប់សម្លាប់ ឬចាប់ជំរិតទារប្រាក់ដោយសារការចាញ់ល្បែងក្នុងកាស៊ីណូ ។ លោកឧត្តមសេនីយ៍ឯក បានជំរុញឱ្យម្ចាស់កាស៊ីណូត្រូវនាំគ្នាទប់ស្កាត់កុំឱ្យពលរដ្ឋខ្មែរចូលលេងល្បែងឱ្យសោះ ព្រោះច្បាប់បានចែងរួចហើយ និងព្យាយាមទប់ស្កាត់បាតុភាពផ្សេងៗដែលមានកើតក្នុងកាស៊ីណូរបស់ខ្លួន ព្រមទាំងគ្រប់គ្រងឱ្យម៉ឺងម៉ាត់ដោយសហការល្អជាមួយសមត្ថកិច្ច ៕
ចែករំលែកព័តមាននេះ