ខេត្តបាត់ដំបង ៖ យុវជនម្នាក់បានចង.កសម្លាប់ខ្លួនលើដើមកកោះកណ្តាលវាលស្រែក្នុងភូមិបឹងសង្កែ ឃុំឃ្លាំងមាស ស្រុកបវេល ហើយត្រូវគេប្រទះឃើញសាកសពនៅម៉ោង៨ព្រឹកថ្ងៃទី២៧ សីហា ដែលមានសភាពហើមស្អុយទៅហើយ ។ តាមការសាកសួរថា យុវជននេះបានធ្វើអត្តឃាតដោយសារតូចចិត្តនឹងអាណាព្យាបាលដែលដណ្តឹងប្រពន្ធឱ្យហើយទុកយូរពេកមិនទាន់រៀបការឱ្យបានលឿនតាមសន្ទុះចិត្តរបស់ខ្លួនដែលស្រឡាញ់ណាស់ ។
លោក ឌី សារ៉េត អធិការរងស្រុកបវេលបានឱ្យដឹងថា សាកសពនោះឈ្មោះ សុខ ដានីន អាយុ១៨ឆ្នាំ នៅភូមិ-ឃុំកើតហេតុខាងលើ ។ លោកនិយាយថា សពយុវជននេះត្រូវក្រុមអ្នកដើររកសត្វប្រទះឃើញ ហើយក៏បានរាយការណ៍ទៅសមត្ថកិច្ចមូលដ្ឋាន លុះធ្វើការស្រាវជ្រាវទើបដឹងដល់ក្រុមគ្រួសារភ្លាមៗដែរ ។ ប៉ុន្តែសាកសពស្ថិតក្នុងស្ថានភាពហើមស្អុយទៅហើយ ដែលគេសង្ស័យថា អាចធ្វើអត្តឃាតយ៉ាងតិចជិតមួយសប្តាហ៍មុននេះដែរ ។ សមត្ថកិច្ចបានស្រង់សំដីអាណាព្យាបាលជនរងគ្រោះថា សុខ ដានីន បានបាត់ពីផ្ទះកាលពីថ្ងៃទី២០ សីហា ដោយពួកគាត់ស្មានថា គេទៅតំបន់ព្រំដែនទើបគ្មានអ្នកចាប់អារម្មណ៍ មិនដឹងថា មកចង.កសម្លាប់ខ្លួនដូច្នេះទេ ។ ម្តាយរបស់ជនរងគ្រោះថា កូនប្រុសគាត់ទំនងតូចចិត្តដោយសារតែរឿងមិនទាន់មានប្រាក់រៀបការប្រពន្ធ ដែលបានដណ្តឹងរួចហើយ ។ សមត្ថកិច្ចបានស្រង់សំដីគ្រួសារនេះទៀតថា មុនកើតហេតុកូនប្រុសរូបនេះបានបង្ខំម្តាយឱ្យឆាប់រៀបចំមង្គលការ ។ ប៉ុន្តែម្តាយប្រាប់ថា មិនទាន់មានប្រាក់គ្រប់គ្រាន់ និងបញ្ជាក់ប្រាប់កូនទៀតថា ចាំឆ្នាំក្រោយទៅពេលប្រមូលផលស្រូវរួចរាល់សិន តែកូនកម្លោះរូបនេះមិនព្រម ព្រោះមិនចង់ដណ្តឹងទុកយូរពេកណាមួយស្រឡាញ់គូដណ្តឹងខ្លាំងណាស់ ។ មូលហេតុនេះហើយដែលនាំឱ្យយុវជននេះក្តៅក្រហាយក៏សម្រេចធ្វើអត្តឃាតចោលក្រុមគ្រួសារ និងគូដណ្តឹងតែម្តងទៅព្រោះចាំយូពេក។
លោក ឌី សារ៉េត អធិការរងបានបញ្ជាក់ដែរថា នៅលើខ្លួនសាកសពគេរកឃើញរូបថតគូដណ្តឹង១សន្លឹកនាងឈ្មោះ ជូន សារ៉េត អាយុ១៨ឆ្នាំ នៅភូមិក្បែរគ្នា ។ លោកបញ្ជាក់បន្ថែមថា នៅលើរូបថតមានសរសេរពាក្យបណ្តាំប៉ុន្មានឃ្លាថា«បងសូមលាអូនទៅឆ្ងាយហើយ បងលាអូនរហូតហើយ អូនលេងបានឃើញមុខបងទៀតហើយ »នៅមានប៉ុន្មានម៉ាត់ទៀតដែលបណ្តាំទាំងនេះធ្វើឱ្យក្រុមគ្រួសារ និងនាងគូដណ្តឹងយំសោកសង្រែងយ៉ាងខ្លាំង រាប់ទាំងអ្នកភូមិខ្លះផង ។ លោកបានសន្និដ្ឋានផងដែរ តាមការបំភ្លឺពីអាណាព្យាបាលជនរងគ្រោះ និងអ្នកភូមិផងថា ការធ្វើអត្តឃាតរបស់យុវជននេះគឺដោយសារតែតូចចិត្តនឹងរឿងមង្គលការរបស់ខ្លួនដែលឪពុកម្តាយបានពន្យារពេលយូរពេលមិនរៀបចំឱ្យបានឆាប់ៗតាមបំណងរបស់ខ្លួន ៕
ចែករំលែកព័តមាននេះ