ខេត្តកំពង់ស្ពឺ ៖ ចោរមួយក្រុមដែលមានបក្សពួកមិនតិចជាង៣នាក់ បានចូលធ្វើសកម្មភាពនៅផ្ទះលក់គ្រឿងទេសមួយមានទូលក់មាស និងដូរប្រាក់ផងដែរ ដោយខ្លះធ្វើជាទិញថ្មពិល ខ្លះទិញសាប៊ូ ប៊ីចេង នៅផ្សារក្រាំងចេក ក្នុងឃុំក្រាំងចេក ស្រុកឧដុង្គ ។ ឆ្លៀតពេលរញ៉េរញ៉ៃនោះចោរស្រីម្នាក់បានចាក់សោទូលក់មាស និងទុកប្រាក់ដុល្លារសម្រាប់ប្តូរយកប្រាក់ និងមាសអស់ពីទូភ្លាមៗ ប៉ុន្តែត្រូវបានអ្នកផ្សារ និងសមត្ថកិច្ចដេញប៉ផាប់ពភីង ឃាត់ខ្លួនបានស្ត្រីម្នាក់ ឯបក្សពួក២នាក់ទៀតដែលមានបុរសម្នាក់ផងនោះបានជិះម៉ូតូតាមផ្លូវលំចូលភូមិគេចខ្លួនបាត់ទៅ ។
មន្ត្រីប៉ូលិសប៉ុស្តិ៍រដ្ឋបាលឃុំក្រាំងចេកបានរៀបរាប់ថា ហេតុការណ៍នេះបានកើតឡើងវេលាម៉ោង៧និង៣០នាទីព្រឹកថ្ងៃទី២៨ សីហា នៅផ្សារក្រាំងចេក ក្នុងឃុំក្រាំងចេក ស្រុកឧដុង្គ។ ជនសង្ស័យមានបក្សពួកចំនួន៣នាក់ ក្នុងនោះមានស្ត្រី២នាក់ និងប្រុសម្នាក់នៅបញ្ឆេះម៉ូតូចាំរួចជាស្រេច ហើយស្ត្រី២នាក់ចូលបន្លំរកទិញសាប៊ូ ប៊ីចេង ថ្មពិល ធ្វើឱ្យអ្នកលក់គ្រឿងទេសម្នាក់ដែលដូរប្រាក់ដុល្លារ និងលក់មាសផង រវល់ភ្លេចដកសោទូមាស ។ ខណៈនោះស្ត្រីម្នាក់ក៏ឆក់ឱកាសចាក់សោទូដូរប្រាក់ប្រមូលយកប្រាក់ខ្មែរ ប្រាក់ដុល្លារ និងមាសផងដែរដាក់ក្នុងថង់ ហើយប្រញាប់ឡើងម៉ូតូជិះចេញយ៉ាងរហ័សសំដៅទៅផ្លូវជាតិលេខ៤ ។
បន្ទាប់ពីបាត់អស់ក៏ផ្អើលឆោឡោឡើង ទើបម្ចាស់ទូនាំគ្នាប្តឹងសមត្ថកិច្ច និងយករថយន្តដេញតាមប៉ផាប់ចាប់ពភីងតាមផ្លូវក្រាលកៅស៊ូពីផ្សារក្រាំងចេកសំដៅទៅផ្លូវជាតិលេខ៤ ។ ពេលមកដល់ចំណុចលូពីរក្នុងទឹកដីភូមិត្រពាំងជ្រៃ ឃុំព្នាយ ស្រុកសំរោងទង រថយន្តក៏បានកៀរម៉ូតូចោរឱ្យដួល និងចាប់បានស្ត្រីម្នាក់ដែលកំពុងរត់កាត់វាលស្រែសន្ទូងទៅណាពុំរួចក៏ត្រូវព័ទ្ធចាប់ខ្លួនបាន ។
ម្ចាស់តូបលក់គ្រឿងទេសនិងដូរប្រាក់លក់មាសក្នុងផ្សារក្រាំងចេកនេះឈ្មោះ ខូវ លៀងអិត អាយុ៤៥ឆ្នាំ ប្តីឈ្មោះចរិយា បានប្រាប់សមត្ថកិច្ចថា ព្រឹកនេះពួកគាត់ពុំបាននៅលក់ដូរទេ ទុកឱ្យកូនស្រីអាយុ១៧ឆ្នាំជាអ្នកលក់ដូរ ។ ឯឪពុកនៅក្នុងបន្ទប់ផ្ទះខាងក្រោយរៀបចំសម្លៀកបំពាក់ចេញទៅធ្វើការ ស្រាប់តែនៅម៉ោង៧និង៣០នាទីនោះកូនគាត់ឆោឡោឡើងផ្អើលអ្នកផ្សារក្រាំងចេកស្រែកថាចោរលួចចាក់សោទូយកលុយយកមាសអស់ហើយ ។ បន្ទាប់មកក្រុមអ្នកផ្សាររួមទាំងសមត្ថកិច្ចនាំគ្នាជួយអន្តរាគមន៍ដេញតាមជាបន្ទាន់ ដែលខណៈនោះចោរបានជិះម៉ូតូរត់គេចបានជាង១០គីឡូម៉ែត្រទៅហើយទើបរថយន្តតាមទាន់ហើយកៀរម៉ូតូផ្តួលចាប់បានតែស្ត្រីសង្ស័យម្នាក់ប៉ុណ្ណោះ ឯ២នាក់ទៀតជិះម៉ូតូរត់តាមផ្លូវលំចូលភូមិបាត់ស្រមោលទាំងព្រឹក ។ ម្ចាស់ផ្ទះរងគ្រោះឱ្យដឹងថា មាសដែលក្រុមចោរប្រមូលយកទៅនោះមានចំនួន៩តម្លឹងប្រាក់រៀលចំនួន៥លាន៥សែនរៀល និងប្រាក់ដុល្លារចំនួន៣ពាន់១រយដុល្លារ ។
ស្ត្រីម្នាក់ដែលចាប់ខ្លួនបាននេះឈ្មោះ យឿន ស្រីរ័ត្ន អាយុ១៧ឆ្នាំ ឆ្លើយថា ខ្លួនរស់នៅភ្នំពេញ ។ ក្នុងការតាមប្រមាញ់នោះគឺយកបានលុយរៀលចំនួន៥លាន៥សែនរៀលមកវិញ គ្រប់ចំនួនតែលុយដុល្លារបានតែ១០០ដុល្លារមកវិញ និងមាសបាន៧តម្លឹងមកវិញប៉ុណ្ណោះ នៅសល់២តម្លឹង និងលុយ៣.០០០ដុល្លារទៀតនៅលើដៃស្ត្រីម្នាក់ និងប្រុសម្នាក់ដែលគេចខ្លួនបាត់តាមម៉ូតូហុងដាឌ្រីមសេ១២៥ ស៊េរី២០១២ ។ ប្រាក់ និងមាសដែលរឹបអូសបានវិញពីស្ត្រីឈ្មោះ យឿន ស្រីរ័ត្ន ត្រូវបានប្រគល់ឱ្យម្ចាស់វិញទាំងអស់ ។
លោកអនុសេនីយ៍ឯក សម សាក់ នាយរងការិយាល័យនគរបាលព្រហ្មទណ្ឌកម្រិតធ្ងន់ខេត្តបានកសាងសំណុំរឿងបញ្ជូនខ្លួនជនសង្ស័យទៅសាលាដំបូងខេត្ត និងកំពុងតាមប្រមាញ់បក្សពួកជាបន្តទៀត ៕
ចែករំលែកព័តមាននេះ