អង្គការទីបេសេរីមានមូលដ្ឋាននៅទីក្រុងឡុងដ៍រាយការណ៍ថា យុវជនទីបេ២នាក់ ស្លាប់កាលពីថ្ងៃទី២៧ សីហា បន្ទាប់ពីពួកគេដុតខ្លួនមក ដែលប្រការនេះធ្វើឱ្យជនទីបេដែលដុតខ្លួនឡើងដល់ចំនួន៥១នាក់ ហើយតាំងពីចាប់ផ្តើមមានសកម្មភាពបែបនេះពីឆ្នាំ២០០៩មក ។
យុវជនទីបេទាំង២នាក់នេះម្នាក់ជាសង្ឃអាយុ១៨ឆ្នាំ ហើយម្នាក់ទៀតជាសង្ឃដែរ អាយុ១៧ឆ្នាំបានដុតខ្លួននៅមុខវត្តKIRTI នៅញ៉ាបា ខេត្តស៊ីឈួន ដែលនៅទីនោះមានជនជាតិទីបេរស់នៅច្រើន ។បណ្តាអង្គការសិទ្ធិមនុស្សវាយតម្លៃថាក្នុងចំណោមជនជាតិទីបេ៥១នាក់ ដែលដុតខ្លួនដើម្បីតវ៉ាប្រឆាំងវត្តមានរបស់ចិននៅទីបេ យ៉ាងតិចពាក់កណ្តាលត្រូវស្លាប់ ។ ម្យ៉ាងវិញទៀតការចាប់ខ្លួនពួកទីបេដែលនាំគ្នាធ្វើបាតុកម្មក្រោយការដុតខ្លួនទាំងនេះក៏មានខ្ពស់ដែរ ។
ចិនចាត់ទុកពួកអ្នកដែលធ្វើពលីកម្មដោយដុតខ្លួនថាពួកភេរវករនិងជាឧក្រិដ្ឋជន ហើយចោទប្រកាន់សម្តេចសង្ឃទីបេដាឡៃឡាម៉ាថាជាអ្នកជំរុញឱ្យមានការដុតខ្លួនបែបនេះ ៕
ចែករំលែកព័តមាននេះ