ខេត្តបាត់ដំបង ៖ យុវជនម្នាក់បានចង.កសម្លាប់ខ្លួនលើដើមកកោះកណ្តាលវាលស្រែ ក្នុងភូមិបឹងសង្កែ ឃុំឃ្លាំងមាស ស្រុកបរវេល ហើយត្រូវគេប្រទះឃើញសពកាលពីវេលាម៉ោង៨ព្រឹកថ្ងៃទី២៧ សីហា ដែលមានសភាពហើមស្អុយទៅហើយ ។ តាមការសាកសួរថា យុវជននេះបានធ្វើអត្តឃាតដោយសារតូចចិត្ត នឹងអាណាព្យាបាលដែលដណ្តឹងប្រពន្ធឱ្យហើយ ទុកយូរពេកមិនរៀបការឱ្យបានលឿន។
លោកឌី សារ៉េត អធិការរងស្រុកបរវេល បានឱ្យដឹងថា សពយុវជនរងគ្រោះនោះឈ្មោះសុខ ដានីន អាយុ១៨ឆ្នាំ នៅភូមិ-ឃុំកើតហេតុខាងលើ ។ លោកបន្តថា សពយុវជននេះ ត្រូវក្រុមអ្នកដើររកសត្វប្រទះឃើញ ហើយក៏បានរាយការណ៍ទៅសមត្ថកិច្ចមូលដ្ឋាន លុះធ្វើការស្រាវជ្រាវ ទើបដឹងដល់ក្រុមគ្រួសារភ្លាមៗដែរ ។ ប៉ុន្តែសពស្ថិតក្នុងស្ថានភាពហើមស្អុយទៅហើយ ដែលគេសង្ស័យថា អាចធ្វើអត្តឃាតយ៉ាងតិចជិតមួយសប្តាហ៍នោះ ។
សមត្ថកិច្ចបានស្រង់សម្តីអាណាព្យាបាលជនរងគ្រោះថា សុខ ដានីន បានបាត់ពីផ្ទះកាលពីថ្ងៃទី២០ សីហា ដោយពួកគាត់ស្មានថា គេទៅតំបន់ព្រំដែនទើបគ្មានអ្នកចាប់អារម្មណ៍ តែមិនដឹងថា មកចង.កសម្លាប់ខ្លួនដូច្នេះទេ ។ ម្តាយរបស់ជនរងគ្រោះថា កូនប្រុសគាត់ទំនងតូចចិត្តដោយសារតែរឿងមិនទាន់មានប្រាក់រៀបការប្រពន្ធដែលបានដណ្តឹងរួចហើយ ។ ប្រភពបន្តទៀតថា មុនកើតហេតុកូនប្រុសរូបនេះបានបង្ខំម្តាយឱ្យឆាប់រៀបចំមង្គលការខ្លួន ប៉ុន្តែម្តាយប្រាប់ថា មិនទាន់មានប្រាក់គ្រប់គ្រាន់ និងបញ្ជាក់ប្រាប់កូនទៀតថា ចាំឆ្នាំក្រោយទៅពេលប្រមូលផលស្រូវរួចរាល់សិន តែកូនកំលោះរូបនេះមិនព្រម ព្រោះមិនចង់ដណ្តឹងទុកយូរពេក ។ មូលហេតុនេះហើយទើបនាំឱ្យយុវជននេះក្តៅក្រហាយក៏សម្រេចធ្វើអត្តឃាតចង.កសម្លាប់ខ្លួនចោលក្រុមគ្រួសារ និងគូដណ្តឹងតែម្តងទៅ ព្រោះចាំយូរពេក ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ