រាជធានីភ្នំពេញ ៖ ព្រឹត្តិការណ៍ប្រកួតប្រដាល់ក្បាច់គុនបុរាណខ្មែរជាលក្ខណៈអន្តរជាតិដណ្តើមខ្សែក្រវាត់ MANSON’S WHISKY ទម្ងន់៦៧គីឡូក្រាម បានឈានចូលដល់វគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រហើយ ដែលការប្រកួតនេះធ្វើឡើងក្នុងពេលតែមួយតាមរយៈការចាប់គ្រាប់ប៉េងប៉ុងរើសគូប្រកួតដូចជាលើកមុនៗនៅលើសង្វៀនស្ថានីយទូរទស្សន៍ប៉ុស្តិ៍លេខ៣ នាថ្ងៃសៅរ៍ទី១ កញ្ញា ខាងមុខនេះ ។
ក្នុងចំណោមកីឡាករជើងខ្លាំងទាំង៤រូបដែលត្រូវឡើងមកប្រកួតជម្រុះក្នុងជុំទី២ ជាបន្តទៀតដើម្បីស្វែងរកតំណែងជាម្ចាស់ខ្សែក្រវាត់នោះមានកីឡាករពេជ្រ សីហា មកពីសមាគមកីឡាប្រដាល់ក្រសួងការពារជាតិ កីឡាករ Aday ton ជនជាតិប្រេស៊ីល កីឡាករ Simon Cec Chini ជនជាតិអីុតាលី និងកីឡាករ Pong Thong Jetsada ជនជាតិថៃ ។ កីឡាករទាំង៤រូបនេះសុទ្ធតែបានឆ្លងផុតពីវគ្គប្រកួតជម្រុះជុំទី១ទាំងអស់ ។
មុននឹងឡើងមកប្រកួតនៅវគ្គនេះ កីឡាករ Pong Thong Jetsada បានផ្តួលកីឡាករឡៅ ស៊ីណាត មកពីក្លិបកងពលតូចឆត្រយោង៩១១ ឱ្យសន្លប់ក្នុងទឹកទី៤ ខណៈកីឡាករ Aday ton ប្រកួតក្នុងថ្ងៃតែមួយ(ថ្ងៃទី៤ សីហា) បានផ្តួលកីឡាករឡុង សុវណ្ណឌឿន មកពីក្លិបសាលវ័ន្តកីឡា ឱ្យសន្លប់នៅត្រឹមទឹកទី១ ។ ដោយឡែកកីឡាករពេជ្រ សីហា ប្រកួតឈ្នះពិនុ្ទុកីឡាករភេឌី ម៉ឺនសុភា មកពីក្លិបយុវជនអង្គរនៅថ្ងៃទី១៨ សីហា ខណៈកីឡាករ Sinmon Cec Chini ជនជាតិអីុតាលី ប្រកួតឈ្នះកីឡាករ SHHE Jain Kia ជនជាតិម៉ាឡេស៊ី ដោយពិន្ទុ ។
ប៉ុន្តែសម្រាប់ការជួបគ្នានៅក្នុងវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រជាបន្តទៀតនោះ មិនទាន់ដឹងថា អ្នកណាមានសំណាងនោះទេ ។ សម្រាប់ Aday ton និង Pong Thong Jetsada សុទ្ធតែជាជើងខ្លាំងធ្លាប់មកប្រកួតជាមួយកីឡាករខ្មែរជាច្រើនលើករួចមកហើយ មិនដែលធ្លាប់ស្គាល់រសជាតិនៃការបរាជ័យម្តងណាឡើយ ។ កីឡាករ Pong Thong Jetsada ធ្លាប់មកប្រកួតនៅស្រុកខ្មែរ៦លើកឈ្នះទាំង៦លើក រីឯ Aday ton វិញ មកស្រុកខ្មែរ២លើក ឈ្នះទាំង២លើកដែរ ។ ប៉ុន្តែសម្រាប់កីឡាករពេជ្រ សីហា វិញ ធ្លាប់ចាញ់ក្រោមស្នៀតកណ្តាប់ដៃ Pong Thong Jetsada នៅទឹកទី៣រួចម្តងមកហើយ ។ លើកនេះក្តីសង្ឃឹមរបស់គេមានតែចាប់ឆ្នោតប៉ះ Simon Cec Chini ទេ ទើបអាចគេចផុតពីវគ្គពាក់កណ្តាលផ្តាច់ព្រ័ត្របាន បើសិនជាជួប Pong Thong Jetsada និង Adayton វិញ គឺចប់ហើយ ។
ឯគូប្រកួតមិត្តភាពវិញ ជន់ ជំនិត មកពីក្លិបស៊ីម៉ាក់ ជួបប្រកួតជាមួយវ៉ាន់ ចាន់វៃ មកពីក្លិបសិង្ហកីឡា និងសេង កំសត់ មកពីក្លិបខេមរិន្ទមានឫទ្ធិ ជួបប្រកួតជាមួយប៊ុន ឈុនហេង មកពីក្លិបសម្រែករាជសីហ៍បង្ក្រាបគ្រឿងញៀន ៕
ចែករំលែកព័តមាននេះ