ប្រធានសហគមន៍ត្រួតពិនិត្យមហារីកអន្តរជាតិ(UICC)បាននិយាយកាលពីថ្ងៃចន្ទសប្តាហ៍នេះថា កីឡាករឡេន អាមស្ត្រងដែលត្រូវគេលាបពណ៌ថាបានប្រើប្រាស់សារធាតុញៀននិងជាប់បម្រាមមួយជីវិតនៅតែអាចរកបានការគាំទ្ររបស់ខ្លួនពីសហគមន៍ជំងឺមហារីក ។
អាមស្ត្រងជាជនទី១ដែលរួចរស់ជីវិតពីជំងឺមហារីកត្រូវបានគេដកហូតយកពានជើងឯក Tour de Franceទាំង៧ជំនាន់របស់គេបន្ទាប់ពីកីឡាករអាមេរិករូបនេះបានបោះបង់ចោលសិទ្ធិប្តឹងឧទ្ធរណ៍ប្រឆាំងនឹងការចោទប្រកាន់របស់ភ្នាក់ងារសារធាតុញៀនអាមេរិក (USADA)។
ទោះជាយ៉ាងណា ប្រធានសហគមន៍ត្រួតពិនិត្យជំងឺមហារីកអន្តរជាតិ Mary Gospdarowiczបានប្រាប់ទីភ្នាក់ងារព័ត៌មាន AFPថា សហគមន៍មហារីកគាំទ្ររូបគេជានិច្ច ។ការថ្លែងបែបនេះរបស់លោកស្រីGospdarowiczធ្វើឡើងនៅអំឡុងកិច្ចប្រជុំស្តីពីជំងឺមហារីកពិភពលោកនៅក្នុងទីក្រុងម៉ុងរ៉េអាល់ ប្រទេសកាណាដា ។ តាមលោកស្រីឱ្យដឹងថា នៅថ្ងៃពុធ អាមស្ត្រងនឹងបើកសន្និសីទកាសែតមួយ ហើយអំណោយផ្តល់ជូនក្នុងមូលនិធិរបស់គេនឹងនៅតែបន្តឥតស្រាកស្រាន្តឡើយ ។
រហូតមកទល់ពេលនេះ យុទ្ធនាការឈ្មោះ Livestrongរបស់អាមស្ត្រងរៃអង្គាសបានប្រាក់ជិត ៥រយលានដុល្លារអាមេរិក ។ ទឹកប្រាក់នេះនឹងត្រូវបានប្រើជួយអ្នកកើតមហារីកនិងសម្រាប់មូលនិធិស្រាវជ្រាវមហារីកផងដែរ ៕
ចែករំលែកព័តមាននេះ