រាជធានីភ្នំពេញ ៖ លោកឧត្តមសេនីយ៍ឯកសុខ ផល អគ្គស្នងការនគរបាលជាតិតំណាងដ៏ខ្ពង់ខ្ពស់លោកនាយឧត្តមសេនីយ៍អគ្គស្នងការនគរបាលជាតិ បានបើកកិច្ចប្រជុំផ្សព្វផ្សាយគោលការណ៍ណែនាំការងារគ្រប់គ្រងកាស៊ីណូ ដែលរៀបចំនៅសាលប្រជុំអគ្គស្នងការដ្ឋាននគរបាលជាតិ កាលពីព្រឹកថ្ងៃទី២៨ សីហា ២០១២ ដោយមានការចូលរួមពីម្ចាស់ ក៏ដូចជាតំណាងកាស៊ីណូជាង៦០។
នៅក្នុងកិច្ចប្រជុំនេះ លោកឧត្តមសេនីយ៍ទោឆៃ ស៊ីណារិទ្ធ ប្រធាននាយកដ្ឋានសន្តិសុខផ្ទៃក្នុងក្រសួងមហាផ្ទៃ បានគូសបញ្ជាក់ថា គិតត្រឹមខែសីហា២០១២ ក្រុមហ៊ុនកាស៊ីណូ ដែលទទួលបានគោលការណ៍អនុញ្ញាតពីរាជរដ្ឋាភិបាល មានចំនួន៩៧ក្រុមហ៊ុន ក្នុងនោះបានដំណើរការអាជីវកម្មមានចំនួន៦១ (មានអាជ្ញាប័ណ្ណពីក្រសួងសេដ្ឋកិច្ច និងហិរញ្ញវត្ថុចំនួន៥០ក្រុុមហ៊ុន និងមិនទាន់មានអាជ្ញាប័ណ្ណពីក្រសួងសេដ្ឋកិច្ច និងហិរញ្ញវត្ថុចំនួន១១) ។ ក្រុមហ៊ុន កាស៊ីណូដែលក្ស័យធនមានចំនួន៦ និង៣០ក្រុមហ៊ុនទៀត ពុំទាន់បានដំណើរការអាជីវកម្មនៅឡើយ ។
ទោះបីដំណើរការអាជីវកម្មកាស៊ីណូមានការរីកចម្រើន ប៉ុន្តែនៅមិនទាន់បានអនុវត្តម៉ឺងម៉ាត់នូវគោលការណ៍របស់រាជរដ្ឋាភិបាលក្នុងការហាមឃាត់ប្រជាពលរដ្ឋខ្មែរកុំឱ្យចូលលេងល្បែងដែលធ្វើឱ្យមតិសាធារណៈយល់ថា អាជីវកម្មកាស៊ីណូបានធ្វើឱ្យប៉ះពាល់ដល់ជីវភាពសង្គមទន្ទឹមនេះ បទល្មើសនៅក្នុងកាស៊ីណូបានកើតឡើងជាបន្តបន្ទាប់ដូចជាករណីឃាតកម្ម ។ ជាក់ស្តែងនៅក្នុងរយៈពេល៨ខែ ឆ្នាំ២០១២ បទល្មើសនៅក្នុងកាស៊ីណូបានកើតឡើងចំនួន៧ករណី ក្នុងនោះករណីបង្ខាំងមនុស្សជំរិតទារប្រាក់ ករណីជួញដូរ និងប្រើប្រាស់គ្រឿងញៀន ករណីលេងបន្លំកាស៊ីណូ ករណីប្រើប្រាស់កាក់ក្លែងក្លាយ និងករណីធ្វើអាជីវកម្មអនឡាញខុសច្បាប់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ