ខេត្តពោធិ៍សាត់ ៖ យ៉ាងហោចណាស់ក្នុងរយៈពេល២ថ្ងៃមានមនុស្ស៣នាក់ បានលង់ទឹកស្លាប់នៅកន្លែងផ្សេងគ្នាហើយមកដល់ពេលនេះរកសពមិនទាន់ឃើញនៅឡើយទេ ។
ប៉ូលិសឱ្យដឹងថា កាលពីថ្ងៃទី២៦ សីហា ២០១២ វេលាម៉ោង៤និង៣០នាទីរសៀលបុរសម្នាក់បានលង់ទឹកស្លាប់នៅរមណីយដ្ឋានកោះថាស ស្ថិតក្នុងឃុំបាក់ចិញ្ចៀន ស្រុកភ្នំក្រវាញ ។ ជនរងគ្រោះឈ្មោះញ៉ក់ ញឿន ភេទប្រុស អាយុ៣០ឆ្នាំ រស់នៅស្រុកកំរៀង ខេត្តបាត់ដំបង បាននាំក្រុមគ្រួសារ និងបងប្អូនមកលេងកោះថាស ។ ខណៈពេលក្រុមគ្រួសារកំពុងហូបចុកនៅលើគោកជនរងគ្រោះបានចុះងូតទឹកលេងម្នាក់ឯងក៏បាត់រហូតតែម្តង ។
ដោយឡែកកាលពីថ្ងៃទី២៧ សីហា វេលាម៉ោង៤រសៀលក្មេងស្រីម្នាក់ឈ្មោះអៀង ស្រីណា អាយុ៣ឆ្នាំ នៅភូមិក្បាលហុង សង្កាត់បន្ទាយដី ក្រុងពោធិ៍សាត់ បានចុះលេងទឹកស្ទឹងលង់ស្លាប់ ខណៈពេលឪពុកម្តាយជាប់រវល់ការងារពុំបានដឹង ។ នៅថ្ងៃដដែលវេលាម៉ោង៥ល្ងាចបុរសម្នាក់បានធ្លាក់ចូលក្នុងស្ទឹងទាំងរថយន្តទាំងមនុស្សលិចក្នុងទឹកជាច្រើនម៉ោង លុះពេលស្ទូចរថយន្តចេញមកមិនឃើញសពទេ ប៉ុន្តែបែកកញ្ចក់រថយន្តមុខក្រោយដែលធ្វើឱ្យអ្នកខ្លះថា ស្លាប់ និងអ្នកខ្លះទៀតថា អាចនៅរស់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ