ម៉ូ ហ្វារ៉ាបានបង្ហាញឱ្យឃើញនូវសមត្ថភាព របស់ខ្លួនសាជាថ្មីក្នុងនាមជាម្ចាស់មេដាយមាសអូឡាំពិកទីក្រុងឡុងឆ្នាំ ២០១២លើវិញ្ញាសារត់ចម្ងាយ៥ពាន់ម៉ែត្រនិង១ម៉ឺនម៉ែត្រដោយបានយកឈ្នះជើងឯកកម្មវិធី Diamond Leagueនៅទីក្រុង Birminghamប្រទេសអង់គ្លេសកាលពីថ្ងៃចន្ទទី២៧សីហា ។
ជ័យជម្នះក្នុងកម្មវិធីដែលមានចម្ងាយប្រហែលជា៣គីឡូម៉ែត្រខាងលើបានផ្តល់នូវការលើកទឹកចិត្តនិងក្តីរីករាយជាខ្លាំងដល់អត្តពលិកវ័យ២៩ឆ្នាំ ម៉ូ ហ្វារ៉ាខណៈកាលពីថ្ងៃសុក្រ ភរិយារបស់គេទើបតែប្រសូត្របានកូនស្រីភ្លោះពី២នាក់ ។
គេបានថ្លែងថា ៖«នេះជាឆ្នាំដ៏អស្ចារ្យមួយសម្រាប់ខ្ញុំ ។ វាប្រហែលជាមិនអាចកើតមានជាថ្មីបានទេ ។ ដណ្តើមបានមេដាយមាស២គ្រឿងរួមជាមួយនិងកូនស្រី២នាក់ ។ វាពិតជាមិនមែនជារឿងងាយស្រួលខណៈកូនស្រី២នាក់ទើបតែកើតហើយខ្ញុំបន្តការប្រកួតក្នុងកម្មវិធីនានា ។ មុនការចាប់ផ្តើមរត់ ខ្ញុំហាក់បារម្ភបន្តិចដែរ ដ្បិតខ្ញុំមិនបានហ្វឹកហាត់ច្រើននោះទេ ។ ដូច្នេះជ័យជម្នះនេះគឺពិតជាអស្ចារ្យខ្លាំងណាស់ »។
លើវិញ្ញាសារត់ចម្ងាយ១០០ម៉ែត្រផ្នែកនារីវិញ ម្ចាស់មេដាយប្រាក់អូឡាំពិកក្រុងឡុង Carmelita Jeterបំបាក់ម្ចាស់មេដាយមាសនាង Shelly-Ann Fraser-Pryce។ សម្រាប់អ្នកទាំង២ នេះគឺជាលើកទី២ហើយក្នុងរយៈពេល៤ឆ្នាំដែលពួកគេបានចូលរួមរត់ចម្ងាយ១០០ម៉ែត្រ ។ Carmelita Jeterបានឆ្លងកាត់គំនូសខ្សែព្រ័ត្រក្នុងថិរវេលា ១០.៨១វិនាទីដូចគ្នានឹងថិរវេលាដែលនាងធ្វើបាននៅទីក្រុង Lussaneប្រទេសស្វ៊ីសដើមសប្តាហ៍នេះ ។
លើវិញ្ញាសាលោតកំពស់វិញ អត្តពលិក Robbie Grabarzដណ្តើមបានជ័យជម្នះបន្ទាប់ពីលោតបានកំពស់ ២.៣២ម៉ែត្រ ។ ម្ចាស់មេដាយសំរឹទ្ធិអូឡាំពិកក្រុងឡុងរូបនេះបាននិយាយថា៖«ឆ្នាំទៅមិញ ខ្ញុំបានយកឈ្នះជើងខ្លាំងជាច្រើននាក់ទើបមានឱកាសចូលរួមក្នុងព្រឹត្តិការណ៍អូឡាំពិក ។ ពេលនេះ ការប្រកួតខ្ញុំមានការរីកចំរើនច្រើនខ្លាំង »៕
ចែករំលែកព័តមាននេះ