ម្ចាស់មេដាយមាសអូឡាំពិកក្រុងឡុងឆ្នាំ២០១២អ៊ែនឌី មូរ៉េបានបង្ហាញឱ្យឃើញនូវភាពខ្លាំងរបស់ខ្លួនជាថ្មីម្តងទៀតបន្ទាប់ពីបានឆ្លងផុតជុំទី១ក្របខណ្ឌធំ U.S Openនៅទីលាន USTA Billie Jean King National Tennis Centerក្រុងញូវយ៉កសរដ្ឋអាមេរិកកាលពីថ្ងៃចន្ទទី២៧សីហា ។ ក្នុងពេលដំណាលគ្នានោះ កីឡាការិនីរុស្ស៊ីម៉ារីយ៉ា សារ៉ាប៉ូវ៉ាដែលជាម្ចាស់មេដាយប្រាក់អូឡាំពិកក្រុងឡុងនិងកីឡាការិនីចិនលីណាក៏បានឆ្លងផុតជុំទី១នោះផងដែរ ។
នៅក្នុងការប្រកួតដែលមានរយៈពេលជាង២ម៉ោង មូរ៉េបានយកឈ្នះកីឡាកររុស្ស៊ី Alex Bogomolovក្នុងលទ្ធផល ៦-២, ៦-៤និង៦-១ ។ គេបានថ្លែងថា៖« ការប្រកួតរបស់ខ្ញុំបានល្អគួរសម ។ ចាប់ផ្តើមដំបូង ពួកយើងបានវាយសម្រុកលើគ្នាទៅវិញទៅមកយ៉ាងខ្លាំង ។ ខ្ញុំពិតជាដឹងថា ការវាយសឺវីសពេលចាប់ផ្តើមដំបូងរបស់ខ្ញុំមិនល្អទេ ប៉ុន្តែខ្ញុំបានប្រឹងប្រែងរហូតអាចយកឈ្នះ៣សិតផ្ទួនៗគ្នា »។
មូរ៉េដែលកំពុងព្យាយាមដណ្តើមយកពានក្របខណ្ឌធំឱ្យខាងតែបានជាលើកទី១ក្នុងអាជីពនៅជុំទី២នឹងប៉ះជាមួយកីឡាករក្រូអាស៊ី Ivan Dodigឬកីឡាករជប៉ុន Hiroki Moriya ។ ចំណែកនាងម៉ារីយ៉ា សារ៉ាប៉ូវ៉ាមិនដូចជាឆ្នាំមុនទេគឺបានឡើងទៅជុំបន្តយ៉ាងងាយស្រួលខណៈបានបំបាក់គូប្រកួតមកពីប្រទេសហុងគ្រីMelinda Czinkក្នុងលទ្ធផល២សិតទល់នឹងសូន្យគឺ ៦-២និង ៦-២ ។ គេនៅចាំបានថា កាលពីឆ្នាំទៅមិញក្នុងក្របខណ្ឌនេះ សារ៉ាប៉ូវ៉ាឆ្លងផុតជុំទី១ទាំងប្រវេប្រវាដោយឈ្នះកីឡាការិនីលំដាប់ទី១០២របស់អង់គ្លេសហេឌ័រ វ៉តសុនក្នុងលទ្ធផល៣-៦,៧-៥និង៦-៣ ។
ដោយឡែកនៅជុំទី១ឆ្នាំនេះ នាងសារ៉ាប៉ូវ៉ាដែលធ្លាប់ឈ្នះពានជើងឯកក្របខណ្ឌធំចំនួន៣លើកនិងជាម្ចាស់ពាននេះកាលពីឆ្នាំ ២០០៦ធ្វើបានល្អគួរសមដោយនាងអាចយកឈ្នះកីឡាការិនីលំដាប់ទី៨៨ពិភពលោក Melinda Czink តែក្នុង៦៧នាទីប៉ុណ្ណោះ ។
ថ្លែងបន្ទាប់ពីបញ្ចប់ការប្រកួត នាងបានបញ្ជាក់ថា ៖«នាង Melinda Czinkពិតជាខ្លាំងមែន ។ ការប្រកួតរបស់នាងក្នុងសិតទី១ពិតជាល្អខ្លាំងណាស់។ ចំណែកខ្ញុំវិញធ្វើឱ្យមានកំហុសច្រើន»។ នាងបានបន្តថា៖«ការព្យាយាមដោយអំណត់់ទីបំផុតខ្ញុំអាចយកឈ្នះការប្រកួតបាន»។
នាង Melinda Czinkវិញបាននិយាយថា៖«ការប្រកួតក្នុងថ្ងៃនេះសម្រាប់ខ្ញុំគឺពោរពេញទៅដោយភាពរីករាយ។ ខ្ញុំទទួលបានការលើកទឹកចិត្តយ៉ាងច្រើនពីសំណាក់អ្នកទស្សនា ។ ខ្ញុំឮគេស្រែកហៅខ្ញុំថា ស៊ីនដេរីឡា។ ខ្ញុំពិតជា ភ្ញាក់ផ្អើលខ្លាំងដែលពួកគេបានប្តូរឈ្មោះខ្ញុំដូច្នេះ។ ផ្ទុយពីការគិតរបស់ខ្ញុំនៅមុនការប្រកួតដែលថា នឹងមានការគាំទ្រលើនាងសារ៉ាប៉ូវ៉ាច្រើនជាមិនខាន»។
នៅជុំបន្ទាប់សារ៉ាប៉ូវ៉ានឹងជួបប្រកួតជាមួយកីឡាការិនីអេស្ប៉ាញ Lourdes Dominguez Lino ។
នាងលីណាដែលដណ្តើមបានពានជើងឯកក្របខណ្ឌ French Openកាលពីឆ្នាំ២០១១ក៏បានឈានចូលដល់ជុំទី២ផងដែរបន្ទាប់ពីបានយកឈ្នះកីឡាការិនីអង់គ្លេសហេឌ័រ វ៉តសុនក្នុងលទ្ធផល៦-២និង៦-៣ ។ នាងបាននិយាយថា ៖«ពេលនេះ ខ្ញុំមានជំនឿចិត្តលើខ្លួនឯងកាន់តែច្រើនឡើង ។ ខ្ញុំពិតជាសប្បាយចិត្តខ្លាំងដែលបានឈ្នះការប្រកួតជុំទី១ ។ ២-៣ឆ្នាំមុន ខ្ញុំតែងតែបរាជ័យនៅក្នុងជុំនេះ » ។
លីណានៅក្នុងការប្រកួតលើកនេះដែលបានប្រើពេលអស់១ម៉ោងនិង២១នាទីបានយកឈ្នះពិន្ទុសឺវីសទី១ចំនួន ៧៥ភាគរយហើយគ្មានកំហុស Double faultឡើយ ។ នៅជុំបន្ទាប់ នាងនឹងប៉ះជាមួយកីឡាការិនីអូស្ត្រាលី Casey Dellacqua ។ រវាងពួកគេទាំងពីរគឺធ្លាប់ជួបគ្នាចំនួន៣លើករួចមកហើយដែលលើកចុងក្រោយនៅឆ្នាំ ២០០៨ ។ នៅក្នុងការជួបគ្នាចំនួន៣លើកនោះ លីណាឈ្នះទាំងអស់ ៕
ចែករំលែកព័តមាននេះ